RC16: రామ్‌చరణ్‌ కోసం బాలీవుడ్‌ నటుడు
ABN , Publish Date - Nov 30 , 2024 | 07:44 PM
'ఆర్‌ఆర్‌ఆర్‌'తో గ్లోబల్‌ సక్సెస్‌ను అందుకుని ప్రపంచ వ్యాప్తంగా అభిమానులు, సినీ ప్రేక్షకులను మెప్పించిన రామ్‌ చరణ్‌ ఇప్పుడు 'ఆర్‌సీ16' షూటింగ్‌ను ప్రారంభించిన సంగతి తెలిసిందే.
'ఆర్‌ఆర్‌ఆర్‌'తో గ్లోబల్‌ సక్సెస్‌ను అందుకుని ప్రపంచ వ్యాప్తంగా అభిమానులు, సినీ ప్రేక్షకులను మెప్పించిన రామ్‌ చరణ్‌ (Ram Charan) ఇప్పుడు 'ఆర్‌సీ16' (RC 16) షూటింగ్‌ను ప్రారంభించిన సంగతి తెలిసిందే. ఇటీవల ఈ చిత్రం షూటింగ్‌ మైసూర్‌లో మొదలుపెట్టారు. ఉప్పెనతో భారీ విజయం అందుకున్న దర్శకుడు బుచ్చిబాబు సానా (Buchchibabu Sana) మైత్రీ మూవీ మేకర్స్‌, సుకుమార్‌ రైటింగ్స్‌ బ్యానర్స్‌ సమర్పణలో ఈ భారీ పాన్‌ ఇండియా సినిమాను వృద్థి సినిమాస్‌ బ్యానర్‌పై వెంకట సతీష్‌ కిలారు నిర్మిస్తున్నారు. కన్నడ శివరాజ్‌కుమార్‌ ఈ చిత్రంతో తెలుగు సినిమాల్లోకి ఎంట్రీ ఇస్తున్నారు. జగపతిబాబు కీలక పాత్ర పోషిస్తున్నారు. ఆయన చాలా పవర్‌ఫుల్‌ పాత్రలో మెప్పించబోతున్నారు.
తాజాగా ఇప్పుడు బాలీవుడ్‌ యంగ్‌ సెన్సేషన్‌ దివ్యేందు ఈ చిత్రంలో కీలక పాత్ర పోషించనున్నారు. మీర్జాపూర్‌లో మున్నా భయ్యా పాత్రలో తనదైన నటనతో ప్రేక్షకులను మెప్పించిన దివ్యేందు ఆర్‌సీ16తో టాలీవుడ్ ఎంట్రీ ఇస్తుండటం విశేషం. ఈ సందర్భంగా దర్శకుడు బుచ్చిబాబు దివ్యేందు పాత్రకు సంబంధించి స్పందిస్తూ తనకు ఆర్‌సీ16 ఎంతో ఇష్టమైన పాత్ర ఇదేనని పేర్కొంటూ తన లుక్‌ పోస్టర్‌ను విడుదల చేశారు. మెలి తిప్పిన మీసం, రగ్డ్‌ లుక్‌తో దివ్యేందు సరికొత్త పాత్రలో మెప్పించబోతున్నారని స్పష్టమవుతుంది. ఈ చిత్రానికి ఎ.ఆర్‌.రెహమాన్‌ సంగీతం అందిస్తున్నారు. బాలీవుడ్‌ బ్యూటీ క్వీన్‌ జాన్వీ కపూర్‌ కథానాయిక.