Chandini Chowdary: చాందినీ ‘సంతాన ప్రాప్తిరస్తు’ లుక్ విడుదల
ABN , Publish Date - Oct 23 , 2024 | 10:28 PM
విక్రాంత్, చాందిని చౌదరి హీరో హీరోయిన్లుగా నటిస్తున్న చిత్రం ‘సంతాన ప్రాప్తిరస్తు’. బుధవారం చాందిని చౌదరి పుట్టినరోజు సందర్భంగా ఈ చిత్రానికి సంబంధించిన ఆమె ఫస్ట్ లుక్‌ని మేకర్స్ వదిలారు. ఈ ఫస్ట్ లుక్ ఎలా ఉందంటే..
విక్రాంత్, చాందిని చౌదరి (Chandini Chowdary) హీరో హీరోయిన్లుగా నటిస్తున్న చిత్రం ‘సంతాన ప్రాప్తిరస్తు’. ఈ చిత్రాన్ని మధుర ఎంటర్టైన్మెంట్, నిర్వి ఆర్ట్స్ బ్యానర్లపై మధుర శ్రీధర్ రెడ్డి, నిర్వి హరిప్రసాద్ రెడ్డి సంయుక్తంగా నిర్మిస్తున్నారు. ‘ఏబీసీడీ మూవీ’, ‘అహ నా పెళ్లంట’ వెబ్ సిరీస్‌లను తెరకెక్కించిన యంగ్ డైరెక్టర్ సంజీవ్ రెడ్డి ఈ సినిమాకు దర్శకుడు. ఆయన రీసెంట్‌గా మెగాస్టార్ చిరంజీవితో తెలంగాణ ప్రభుత్వానికి చెందిన యాంటీ డ్రగ్స్ యాడ్‌ను రూపొందించి ప్రశంసలు అందుకున్న విషయం తెలిసిందే. బుధవారం హీరోయిన్ చాందిని చౌదరి పుట్టిన రోజు సందర్భంగా ఆమె క్యారెక్టర్ ఫస్ట్ లుక్ పోస్టర్‌ను మేకర్స్ రిలీజ్ చేశారు. (Happy Birthday Chandini Chowdary)
Also Read-Pushpa 2 The Rule: ఒక రోజు ముందే థియేటర్లలోకి..
ఈ ‘సంతాన ప్రాప్తిరస్తు’ సినిమాలో చాందినీ చౌదరి కల్యాణి ఓరుగంటి అనే పాత్రలో నటిస్తోంది. ప్రభుత్వ ఉద్యోగి తన జీవిత భాగస్వామిగా కావాలని, సాఫ్ట్‌వేర్ ప్రొఫెషనల్స్‌ వద్దని ఆమె కోరుకుంటున్నట్లు ఈ ఫస్ట్ లుక్ పోస్టర్ ద్వారా రివీల్ చేశారు. ప్రస్తుతం చాలామంది ఎదుర్కొంటున్న సమస్య సంతానలేమి. ఆ సమస్యను ‘సంతాన ప్రాప్తిరస్తు’ సినిమాలో వినోదాత్మకంగా చూపించబోతున్నట్లుగా మేకర్స్ చెబుతున్నారు. ప్రస్తుతం ఈ సినిమా రెగ్యులర్ షూటింగ్ జరుపుకుంటోంది.
‘వెంకటాద్రి ఎక్స్ ప్రెస్, ఏక్ మినీ కథ, ఎక్స్ ప్రెస్ రాజా’ వంటి సూపర్ హిట్ సినిమాలకు స్క్రీన్‌ప్లే అందించిన రచయిత షేక్ దావూద్ జి ఈ సినిమాకు స్క్రీన్ ప్లే రాస్తున్నారు. మ్యూజికల్ ఫ్యామిలీ ఎంటర్ టైనర్‌గా ఈ సినిమా రూపుదిద్దుకుంటోంది. వెన్నెల కిషోర్, శ్రీలక్ష్మి, అభినవ్ గోమటం, మురళీధర్ గౌడ్, హర్షవర్ధన్, బిందు చంద్రమౌళి, జీవన్ కుమార్, తాగుబోతు రమేష్, అభయ్ బేతిగంటి, అనిల్ గిలా, కిరీటి, సద్దాం తదితరులు ఇతర పాత్రలలో నటిస్తున్న ఈ చిత్రానికి సునీల్ కశ్యప్ సంగీతం అందిస్తున్నారు.