Shraddha Srinath: నటసింహం బాలయ్యపై శ్రద్ధా శ్రీనాథ్ ఆసక్తికర వ్యాఖ్యలు
ABN, Publish Date - Jan 08 , 2025 | 06:45 PM
గాడ్ ఆఫ్ మాసెస్ నందమూరి బాలకృష్ణ హీరోగా నటిస్తున్న ‘డాకు మహారాజ్’ సినిమాలో హీరోయిన్‌గా నటిస్తున్న శ్రద్ధా శ్రీనాథ్ చిత్ర విశేషాలను మీడియాకు చెబుతూ బాలయ్య గురించి ఆసక్తికర విషయాలను తెలిపింది. సెట్‌లో బాలయ్య ఎలా ఉంటారు? దర్శకుడికి ఆయన ఎలా గౌరవం ఇస్తారు? వంటి విషయాలను ఆమె షేర్ చేసుకున్నారు.
గాడ్ ఆఫ్ మాసెస్ నందమూరి బాలకృష్ణ ‘డాకు మహారాజ్’గా సంక్రాంతి బరిలోకి దిగుతున్నారు. వరుస ఘన విజయాలతో దూసుకుపోతున్న ఆయన ఈ సినిమాతోనూ బ్లాక్‌బస్టర్ సక్సెస్ అందుకుంటారనేలా ఇప్పటికే విడుదలైన ప్రమోషనల్ కంటెంట్ ప్రామిస్ చేస్తోంది. బ్లాక్ బస్టర్ దర్శకుడు బాబీ కొల్లి ఈ చిత్రానికి దర్శకత్వం వహిస్తున్నారు. శ్రీకర స్టూడియోస్ సమర్పణలో సితార ఎంటర్టైన్మెంట్స్, ఫార్చ్యూన్ ఫోర్ సినిమాస్‌ పతాకాలపై సూర్యదేవర నాగవంశీ, సాయి సౌజన్య భారీ బడ్జెట్‌తో ఈ సినిమాను నిర్మిస్తున్నారు. ఎస్. థమన్ సంగీతం అందిస్తున్న ఈ చిత్రంలో శ్రద్ధా శ్రీనాథ్, ప్రగ్యా జైస్వాల్ హీరోయిన్లుగా నటించారు. సంక్రాంతి కానుకగా జనవరి 12న ఈ సినిమా ప్రపంచ వ్యాప్తంగా భారీస్థాయిలో విడుదలకు సిద్ధమవుతోంది. చిత్ర ప్రమోషన్స్‌లో భాగంగా హీరోయిన్ శ్రద్ధా శ్రీనాథ్ మీడియాకు చిత్ర విశేషాలను తెలిపారు. ఈ సందర్భంగా ఆమె మాట్లాడుతూ..
‘‘ఎన్నో ఏళ్ళ నుంచి సినీ పరిశ్రమలో ఉన్నా.. నేనొక బిగ్ స్టార్‌ని అనే అహం బాలకృష్ణగారిలో కొంచెం కూడా ఉండదు. సెట్స్‌లో అందరితో సరదాగా ఉంటారు. తనకంటే చిన్నా పెద్దా అని చూడకుండా దర్శకుడికి ఆయన ఎంతో గౌరవం ఇస్తారు. సినిమా కోసం దర్శకుడు ఏం చెప్తే అది చేయడానికి ఎప్పుడూ సిద్ధంగా ఉంటారు. దర్శకుడు బాబీ ప్రతిభ గల దర్శకుడు. సినిమా పట్ల ఆయనకు ఎంతో ప్యాషన్ ఉంది. అలాగే, బాబీగారిలో మంచి నటుడు కూడా ఉన్నాడు. అద్భుతమైన సూచనలు ఇస్తూ, నటీనటుల నుంచి మంచి నటనను రాబట్టుకుంటారు.
Also Read-Kabir Duhan Singh: పేరుకే విలన్.. ఈ నటుడు చేసేది తెలిస్తే ఫ్యాన్ అయిపోతారు
నేను ఇప్పటివరకు కొన్ని విభిన్న సినిమాలు చేశాను. అయితే ఈ చిత్రం మాత్రం ఒక పూర్తి ప్యాకేజ్‌లా ఉంటుంది. ఇలాంటి పాత్రను నేను ఇప్పటి వరకు చేయలేదు. కామెడీ, యాక్షన్, ఎమోషన్ అన్నీ ఉంటాయి. పైగా బాలకృష్ణ గారి సినిమా అంటే ఎక్కువ మంది ప్రేక్షకులకు నా ప్రతిభను చూపించే అవకాశం ఉంటుంది. ఇందులో నా పాత్ర పేరు నందిని. చాలా సాఫ్ట్‌గా ఉంటుంది. ఓపిక ఎక్కువ. అదే సమయంలో ఎప్పుడు మాట్లాడాలో స్పష్టంగా తెలుసు. నా పాత్రలో ఎంతో డెప్త్ ఉంటుంది. నటనకు కూడా ఎంతో ఆస్కారమున్న రోల్ చేశాను. ఈ సినిమాపైనా, ఇందులో నేను పోషించిన నందిని పాత్ర పైనా ఎంతో నమ్మకంగా ఉన్నాను. నందిని పాత్రతో ప్రేక్షకులకు మరింత చేరువ కానున్నాను.
నటిగా ఈ సినిమా నుంచి ఎంతో నేర్చుకున్నాను. ముఖ్యంగా ఇందులో డైలాగ్‌లు అద్భుతంగా పండాయి. డబ్బింగ్ చెప్పడానికి ఎక్కువ సమయం తీసుకున్నాను. ప్రతి డైలాగ్ మీద ఎంతో కేర్ తీసుకొని డబ్బింగ్ చెప్పించారు. ‘జెర్సీ’, ‘డాకు మహారాజ్’ సినిమాలలో ఏది బెస్ట్ అంటే మాత్రం రెండూ వేటికవే ప్రత్యేకం. ‘జెర్సీ’లో నేను పోషించిన సారా పాత్ర నా మనసుకి బాగా నచ్చిన పాత్ర. ప్రేక్షకులు కూడా ఎంతో ఆదరించారు. ఇప్పుడు ‘డాకు మహారాజ్’లోని నందిని పాత్ర కూడా ప్రేక్షకులకు ఆ స్థాయిలో చేరువ అవుతుందనే నమ్మకం ఉంది.
సితార ఎంటర్టైన్మెంట్స్ నాకు ‘జెర్సీ’ వంటి మెమరబుల్ ఫిల్మ్‌ని ఇచ్చింది. నాపై నమ్మకం ఉంచి, ఇప్పుడు ‘డాకు మహారాజ్’లో మరో మంచి పాత్ర ఇవ్వడం ఎంతో ఆనందంగా ఉంది. సితార ఎన్నో మంచి మంచి సినిమాలను నిర్మిస్తూ ఉంటుంది. అలాంటి గొప్ప బ్యానర్‌లో సినిమా చేయడం ఎప్పుడూ గౌరవంగానే భావిస్తాను. నాకు అన్ని రకాల సినిమాలు చేయాలని ఉంది. నిజ జీవితానికి దగ్గరగా ఉండే పాత్రలు పోషించడానికి ఎక్కువ ఇష్టపడతాను..’’ అని చెప్పుకొచ్చారు.