Hit 3: శైలేష్ కొలను ఆవేదనకు కారణం అదేనా

'హిట్ 3'లో తమిళ స్టార్ హీరో కార్తీ గెస్ట్ అప్పీయరెన్స్ ఇవ్వబోతున్నాడు. ఈ వార్త మేకర్స్ చెప్పకముందే... సోషల్ మీడియాలో చక్కర్లు కొట్టడం సదరు దర్శకుడిని ఆవేదనకు గురిచేసిందట.

ఇవాళ సినిమాలకు సంబంధించిన సర్ ప్రైజెస్ అంటూ ఏమీ మిగలడం లేదు. చిత్ర బృందం కాస్తంత గోప్యత పాటించి, కొన్నింటిని దాచిపెట్టాలని చూసినా... ఏదో చోటు నుండి ఆ సమాచారం బయటకు వచ్చేస్తోంది. సినిమా అనేది వన్ మ్యాన్ షో కాదు. స్క్రిప్ట్ రాయడం నుండి విడుదల వరకూ వందలాది మంది పనిచేస్తుంటారు. కొన్ని విషయాలను ఎంత రహస్యంగా ఉంచాలని చూసినా అది సాధ్యమయ్యే పనికాదు. మూవీ కంటెంట్ ను సెల్ ఫోల్స్ లో తీయకుండా కొంతమేరకు నియంత్రించవచ్చేమో కానీ సమాచారాన్ని ఆపడం ఎవరి వల్లా కాదు. బట్... తాము గోప్యంగా ఉంచాలనుకున్నది బయటకు అనధికారికంగా వచ్చేనప్పుడు మేకర్స్ అప్ సెట్ కావడం సహజం.

'హిట్' (Hit) తో దర్శకుడిగా మారి చక్కని విజయాన్ని అందుకున్న డాక్టర్ శైలేష్ కొలను (Dr Sailesh Koalnu) పరిస్థితి ఇప్పుడు అలానే ఉంది. 'హిట్' తర్వాత తీసిన'హిట్ 2' మూవీ కూడా చక్కని విజయాన్ని అందుకుంది. మొదటి సినిమాలో విశ్వక్ సేన్ (Vishwaksen) హీరోగా నటించగా, రెండో సినిమాలో అడివి శేష్ (Adivi Sesh) చేశాడు. ఇప్పుడీ 'హిట్ 3'లో ఆ చిత్ర నిర్మాతల్లో ఒకరైన నాని (Naani) నటించాడు. మే 1న ఈ సినిమా జనం ముందుకు రాబోతోంది. 'హిట్ 2' చివరిలోనే 'హిట్ 3' (Hit 3) లో నాని నటించబోతున్నాడంటూ హిట్ ఇస్తూ ఓ సీన్ పెట్టారు. అది ఆడియెన్స్ ను థ్రిల్ కు గురిచేసింది. ఇప్పుడు కూడా అలానే 'హిట్ 3' చివరిలో ఈ ఫ్రాంచైజ్ తర్వాతి భాగంలో తమిళ హీరో కార్తి (Karthi) నటించబోతున్నట్టుగా ఓ కీలక సన్నివేశాన్ని ఇటీవల అల్యూమినియం ఫ్యాక్టరీలో చిత్రీకరించారు. అయితే ఈ విషయాన్ని వీలైనంత వరకూ గోప్యంగా ఉంచాలని మేకర్స్ భావించారు. ఒక్కసారిగా కార్తిని తెర మీద చూసి ప్రేక్షకులు థ్రిల్ అవుతారని అనుకున్నారు. కానీ వందలాది మంది పాల్గొనే షూటింగ్ వివరాలు బయటకు రాకుండా ఎలా ఉంటాయి!? 'హిట్ -3'లో కార్తీ చేస్తున్నాడనే న్యూస్ బయటకు వచ్చేసింది. దాంతో సోషల్ మీడియాలో దానిని కొందరు పోస్ట్ చేసేశారు.

ఇదే శైలేష్‌ కొలను ను ఆవేదనకు గురిచేసిందని తెలుస్తోంది. ఈ విషయాన్ని డైరెక్ట్ గా ఆయన సోషల్ మీడియాలో ప్రస్థావించకుండా... తన మనసులోని బాధను వ్యక్తం చేశాడు. గతంలో సినిమా పాత్రికేయులకు కొన్ని విషయాలు తెలిసినా... వాటిని గోప్యంగా ఉంచేవారని, కానీ ఇప్పుడు అలాంటి పరిస్థితి లేదని వాపోయాడు. తమకు తెలిసిన విషయాన్ని మరో ఆలోచన లేకుండా సోషల్ మీడియాలో పోస్ట్ చేస్తున్నారని అన్నాడు. జర్నలిజం ఇవాళ చాలా దారుణంగా మారిపోయిందని తెలిపాడు. కొన్ని అంశాలను ప్రేక్షకులకు తెలియచేయకుండా గోప్యత పాటిస్తే... వారు వాటిని ఆస్వాదించే ఆస్కారం ఉంటుందని, కానీ ఆ ధ్రిల్ కు ఆడియెన్స్ ను మీడియా దూరం చేస్తోందని ఆవేన వ్యక్తం చేశాడు. నిజానికి ఇవాళ సోషల్ మీడియా పెరిగిపోయిన నేపథ్యంలో ఏదీ గోప్యంగా ఉండే ఆస్కారం లేదు. ఇవాళ కాకపోతే రేపు, రేపు కాకపోతే ఎల్లుండి ఇలాంటి రహస్యాలు బయటకు వచ్చేస్తుంటాయి. కాబట్టి ఫిల్మ్ మేకర్సే తమ కష్టాన్ని గురించి, తాము ఏ విషయంలో ప్రేక్షకులకు థ్రిల్ ఇవ్వబోతున్నామో ముందే చెప్పేస్తే బెటర్ అని కొందరంటున్నారు.

Also Read: Ramgopal Varma: శారీ మూవీ రివ్యూ

మరిన్ని సినిమా వార్తల కోసం ఇక్కడ క్లిక్ చేయండి