Mahesh Babu: 'గుంటూరు కారం' అంటుకుంది, పండగకి రచ్చ రచ్చే, ఫోటోస్ వైరల్
ABN, Publish Date - Jan 01 , 2024 | 05:46 PM
మిగతా సినిమాల మాట ఎలా వున్నా, సంక్రాంతి పండగకి వస్తున్న మహేష్ బాబు 'గుంటూరు కారం' కోసం అభిమానులు అప్పుడే సందడి మొదలెట్టేసాడు. ఈ సినిమా ఎప్పుడెప్పుడు విడుదలవుతుందా అని వెయ్యి కళ్ళతో ఎదురుచూస్తున్న అభిమానులు, థియేటర్స్ ముందు మహేష్ బాబు కట్ ఔట్స్ పెట్టి హంగామా చెయ్యడం కూడా మొదలెట్టేసారు.
సూపర్ స్టార్ మహేష్ బాబు (Mahesh Babu), మాటల మాంత్రికుడు త్రివిక్రమ్ శ్రీనివాస్ (Trivikram Srinivas) ముచ్చటగా మూడోసారి చేతులు కలిపారు. 'అతడు', 'ఖలేజా' వంటి క్లాసికల్ చిత్రాలను అందించిన నటుడు-దర్శకుడు కలయికలో వస్తున్న సినిమా కావడంతో 'గుంటూరు కారం' #GunturKaaram పై అంచనాలు ఆకాశాన్ని తాకాయి.
ఇప్పటికే ఈ సినిమా నుంచి 'దమ్ మసాలా', 'హే బేబీ' అనే రెండు పాటలను, అలాగే మునుపెన్నడూ లేని విధంగా మహేష్ బాబు యొక్క మాస్ అవతార్ ను పరిచయం చేస్తూ టీజర్ ను విడుదల చేసింది. సంక్రాంతి పండుగకు ప్రపంచవ్యాప్తంగా బాక్సాఫీస్ వద్ద భారీ ఎత్తున రమణ గాడి రుబాబు ఉంటుందని ఈ చిత్ర నిర్వాహకులు హామీ ఇస్తున్నారు.
సంగీత దర్శకుడు ఎస్ఎస్ థమన్ (S Thaman) ఈ చిత్రానికి పాటలు సమకూర్చారు. 'దమ్ మసాలా' పాట విడుదల కాగానే సోషల్ మీడియాలో వైరల్ అయ్యింది. 'హే బేబీ' పాట కూడా సామజిక మాధ్యమాల్లో ట్రోల్ చేసినా, ఆ పాటపై అనేక రీల్స్ మరియు షార్ట్‌లు వస్తున్నాయి.
ఇప్పుడు చిత్ర నిర్వాహకులు మూడో పాటగా హై వోల్టేజ్‌ మాస్ నంబర్‌ 'కుర్చీ మడతపెట్టి' ని విడుదల చేసింది. మహేష్ బాబు అభిమానులకు న్యూ ఇయర్ వేడుకలు ఈ పాటతో మరింత మాస్‌గా, ఉత్తేజంగా, ఉల్లాసంగా సంబరంగా జరిగాయి.
ఈ పాటలో గ్రామీణ ప్రాంతాల్లో సహజంగా వినపడే జానపద శైలి సాహిత్యం ఉన్నాయి. సరస్వతీపుత్ర రామజోగయ్య శాస్త్రి ఈ పాటకు సాహిత్యం అందించారు. 'రాజమండ్రి రాగ మంజరి... మాయమ్మ పేరు తెల్వనోళ్లు లేరు మేస్తిరి', 'తూనీగ నడుములోన తూటాలెట్టి ... తుపాకీ పేల్చినావే తింగరి చిట్టి... మగజాతినట్టా మడతపెట్టి..' వంటి పదాలు మరియు పదబంధాలు 80ల నాటి సూపర్‌స్టార్ కృష్ణ గారి యొక్క క్లాసిక్ మాస్ చిత్రాలను గుర్తు చేస్తున్నాయి.
మహేష్ బాబు తండ్రి, లెజెండరీ నటుడు కృష్ణ ఇటువంటి ఎనర్జిటిక్ పాటలు, మాస్ నంబర్లతో మాస్ నటుడు అయ్యారు. ఇప్పుడు ఈ పాట ఆయన కుమారుడు మహేష్ బాబు నటించిన 'గుంటూరు కారం' చిత్రం నుంచి ఆ లెజెండ్‌కు నివాళిగా అనిపిస్తుంది.
టాలీవుడ్ లో సంచలనం సృష్టిస్తున్న నటి శ్రీలీల ఈ సినిమాలో కథానాయికగా నటిస్తోంది. మహేష్ బాబుతో కలిసి ఆమె వేసిన డ్యాన్స్ స్టెప్పులు చాలా ఎనర్జిటిక్‌గా ఉన్నాయి. ఈ స్టెప్పులకు థియేటర్లు ఖచ్చితంగా షేక్ అవుతాయి అని చిత్ర నిర్వాహకులు అంటున్నారు. ఈ చిత్రంలో మీనాక్షి చౌదరి మరో కథానాయికగా నటిస్తోంది. ఇంకా రమ్య కృష్ణ, ప్రకాష్ రాజ్ సహా పలువురు ప్రముఖ నటీనటులు నటిస్తున్నారు.
గుంటూరు కారం చిత్రం షూటింగ్ పూర్తి చేసుకుంది, సంక్రాంతి కానుకగా జనవరి 12, 2024 న ప్రపంచవ్యాప్తంగా భారీస్థాయిలో విడుదల కానుంది. ఇప్పటికే రాజమండ్రి, ఏలూరు, విశాఖపట్నం, విజయవాడ లాంటి పట్టణాల్లో మహేష్ బాబు కట్ అవుట్ లు భారీ గా థియేటర్స్ ముందు పెట్టి, అభిమానులు హంగామా చేస్తున్నారు. ఈసారి పండగకి భారీ ఎత్తున మహేష్ సినిమా విడుదలవుతోందని, అందుకు భారీగా ఓపెనింగ్స్ ఉండాలనే ఉద్దేశంతో అభిమానుల సందడి మొదలయింది.
త్రివిక్రమ్ శ్రీనివాస్, మహేష్ బాబు సినిమా అంటే అభిమానుల్లో ఒక ఆసక్తి ఉంటుంది. చాలా సంవత్సరాల తరువాత ఈ ఇద్దరూ 'గుంటూరు కారం' సినిమాతో కలవటం, అందులో మహేష్ బాబును ఒక మాస్ అవతార్ లో చూపించటం, అభిమానులకు ఈసారి పండగే అని ఒక వార్త వినపడుతోంది. ఇక సినిమా థియేటర్స్ దగ్గర రచ్చ రచ్చే అని అంటున్నారు అభిమానులు.
సామజిక మాధ్యమాల్లో మహేష్ అభిమానులు సందడి ఇంతా అంతా కాదు. మహేష్ బాబు సినిమా 'సర్కారువారి పాట' 2022 సంవత్సరంలో విడుదలైంది, తరువాత చాలా గ్యాప్ తీసుకోవటం, ఈ 'గుంటూరు కారం' ఈ సంక్రాంతి పదంగాకి రావటం, అభిమానులకి ఒక పండగలా వుంది అని అంటున్నారు.
అటు ఆంధ్రాలో ముఖ్య పట్టణాలతో పాటు, ఇటు తెలంగాణాలో కూడా అభిమానులు మహేష్ బాబు కట్ అవుట్ లు థియేటర్స్ ముందు పెడుతున్నారు. ఆర్టీసీ క్రాస్ రోడ్స్ దగ్గర సుదర్శన్ థియేటర్ మహేష్ బాబు కి బాగా లక్కీ థియేటర్ అని అంటారు. ఆ థియేటర్ లో మహేష్ బాబు సినిమాలు ఎన్నో ఆడాయి, ఇప్పుడు ఈ 'గుంటూరు కారం' కూడా అక్కడే విడుదలవుతోంది. అప్పుడే అక్కడ సందడి మొదలయింది. శ్రీలీల కథానాయిక, మీనాక్షి చౌదరి ఇంకో కథానాయిక.