Pushpa 2: 'పుష్ప'కు ఆ సెంటిమెంట్‌ బాగా వర్కవుట్‌ అవుతుందనే నమ్మకం
ABN, Publish Date - Oct 26 , 2024 | 10:34 AM
'పుష్ప’ (Pushpa) చిత్రం సక్సెస్‌తో దానికి కొనసాగింపుగా పుష్ష 2’ (Pushpa 2) వస్తున్న సంగతి తెలిసిందే! ఈ చిత్రానికి సంబంధించి ఆసక్తికర విషయం బయటకొచ్చింది.
'పుష్ప’ (Pushpa) చిత్రం సక్సెస్‌తో దానికి కొనసాగింపుగా పుష్ష 2’ (Pushpa 2) వస్తున్న సంగతి తెలిసిందే! ప్రపంచ వ్యాప్తంగా ఉన్న తెలుగు ఆడియన్స్‌ ఈ చిత్రం కోసం ఎంతో ఆతురతగా ఎదురుచూస్తున్నారు. పార్ట్‌2లో పుష్పరాజ్‌ ఏం చేయబోతున్నారో చూడటానికి ప్రేక్షకులు ఆసక్తిగా ఉన్నారు. అయితే ఈ చిత్రానికి తొలి ప్రేక్షకుడిగా మారే అవకాశం ఓ దర్శకుడికి దక్కింది. ఆయనే దర్శకధీరుడు ఎస్‌ఎస్‌ రాజమౌళి (SS Rajamouli). రాజమౌళికీ సుకుమార్‌కీ మధ్య మంచి అనుబంధం ఉంది. తీసే సినిమాల గురించి అప్పుడప్పుడు ఐడియాలు షేర్‌ చేసుకుంటుంటారు. సుకుమార్‌ టేకింగ్‌, రైటింగ్‌ను రాజమౌళి బాగా ఇష్టపడతారు. ఈ విషయాన్ని ఆయనే చాలా వేదికలపై చెప్పారు. ‘పుష్ప’ జరుగుతున్నప్పుడు అందులోని కొన్ని సన్నివేశాల్ని సుకుమార్‌ ముందుగా రాజమౌళికి చూపించారు. ‘ఈ సినిమాని పాన్‌ ఇండియా స్థాయిలో రిలీజ్‌ చేయండి..’ అనే సలహా రాజమౌళినే ఇచ్చారని అప్పట్లో టాక్‌ వినిపించింది.
ఇప్పుడు ‘పుష్ష 2’ విషయంలోనూ అదే సీన్‌ రిపీట్‌ అయ్యింది. ‘పుష్ష 2’ షూటింగ్‌ రామోజీ ఫిల్మ్‌సిటీలో జరుగుతున్నప్పుడు అక్కడే మహేష్‌తో ఆయన చేయబోతున్న ఎస్‌ఎస్‌ఎంబీ ప్రీ ప్రొడక్షన్‌ వర్క్‌లో బిజీగా ఉన్న రాజమౌళి, సరదాగా పుష్ష 2’ షూటింగ్‌ స్పాట్‌కి వెళ్లారు. అక్కడ ‘పుష్ష 2’లోని కొన్ని కీలకమైన సన్నివేశాల్ని సుకుమార్‌.. రాజమౌళికి చూపించారట. ఈ విషయం తాజాగా బయటకు వచ్చింది. ఆ సీన్స్ చూసి జక్కన్న బాగా ఇంప్రెస్‌ అయ్యారని సమాచారం. ఆ సమయంలో బన్నీ కూడా సెట్లోనే ఉన్నారట. అలా ‘పుష్ష’కు మొదటి ప్రేక్షకుడు రాజమౌళినే. ఆ సినిమా సూపర్‌ హిట్‌ అయ్యింది. అదే సెంటిమెంట్‌తో ఈ సినిమాలోని కొన్ని సీన్స్ ముందుగానే చూపించేశారు. ఈ సారీ కూడా ఆ సెంటిమెంట్‌ బలంగా వర్కవుట్‌ అవుతుందని పుష్ప బృందం నమ్ముతోంది.
అల్లు అర్జున్‌, రష్మిక మందన్నా జంటగా నటిస్తున్న ఈ చిత్రానికి సుకుమార్‌ దర్శకుడు. మైత్రీ మూవీ మేకర్స్‌ సంస్థ భారీ వ్యయంతో నిర్మిస్తోంది. దేవిశ్రీ ప్రసాద్‌ సంగీతం అందిస్తున్నారు. డిసెంబరు 6న ‘పుష్ష 2’ని విడుదల చేయాలనుకున్నారు మేకర్స్‌. అయితే ఒకరోజు ముందుగానే డిసెంబరు 5న ఈ సినిమా ప్రేక్షకుల ముందుకు తీసుకొస్తున్నారు. ఓవర్సీస్‌లో 4వ తేదీనే షోలు వేయనున్నారు. ఇటీవల జరిగిన సమావేశంలో నిర్మాతలు ఈ విషయాన్ని వెల్లడించారు.