Tollywood: దీపావళి సినిమా కలెక్షన్లు ఎలా ఉన్నాయంటే..
ABN, Publish Date - Nov 01 , 2024 | 03:17 PM
దీపావళి కానుకగా విడుదలైన తెలుగు చిత్రాలు 'లక్కీ భాస్కర్', 'క' పాజిటివ్ టాక్ తో దూసుకెళ్తున్నాయి. ఈ రెండు చిత్రాల తొలి రోజు కలెక్షన్స్ ను మేకర్స్ తెలియ జేశారు. ఆ వివరాలు
దుల్కర్‌ సల్మాన్‌ (Dulquer salman) హీరోగా, వెంకీ అట్లూరి దర్శకత్వంలో తెరకెక్కిన చిత్రం ‘లక్కీ భాస్కర్’ (lucky Bhaskar). మీనాక్షి చౌదరి కథానాయిక. దీపావళి కానుకగా గురువారం ప్రేక్షకుల ముందుకొచ్చిందీ చిత్రం. కథ, కథనం, దుల్కర్‌ నటన, సినిమా నడిచిన తీరును ప్రేక్షకులతోపాటు విమర్శకులు కూడా మెచ్చుకున్నారు. ఈ నేపథ్యంలోనే చిత్రబృందం మొదటి రోజు కలెక్షన్స్ వివరాలు వెల్లడించింది. ఈమేరకు నిర్మాణ సంస్థ సితార ఎంటర్‌టైన్‌మెంట్స్‌ పోస్టర్‌ షేర్‌ చేసింది. ప్రపంచవ్యాప్తంగా తొలిరోజు రూ.12.7 కోట్లకు పైగా గ్రాస్‌ (Lucky Bhaskar colelctions) వసూలు చేసిందని తెలిపింది. ఈ సినిమా దీపావళి బ్లాక్‌ బస్టర్‌ అని పేర్కొంది.
‘క’.. ఆరు కోట్ల పైనే... (Ka Collections)
కిరణ్‌ అబ్బవరం హీరోగా నటించిన చిత్రం ‘క’. దర్శక ద్వయం సుజీత్‌ - సందీప్‌ దర్శకత్వం వహించారు. సస్పెన్స్‌ థ్రిల్లర్‌ నేపథ్యంలో రూపుదిద్దుకున్న చిత్రమిది. కిరణ్‌ అబ్బవరం తన రెగ్యులర్‌ జానర్‌ను పక్కన పెట్టి కొత్తగా ప్రయత్రించిన చిత్రమిది. సినిమా అద్భుతంగా ఉందని వీక్షకులు ప్రశంసిస్తున్నారు. సినిమాకు క్లైమాక్స్‌ ప్రధాన ఆకర్షణ అని చెబుతున్నారు. దీంతో కిరణ్‌ అబ్బవరం ఖాతాలో మంచి విజయం పడినట్లు అయింది. ఈమేరకు తొలిరోజు వసూళ్లను చిత్రబృందం ప్రకటించింది. రూ.6.18 కోట్లకు పైగా గ్రాస్‌ సొంతం చేసుకుందని చెప్పింది. పాన్‌ ఇండియా మూవీగా ఒకేసారి దీనిని విడుదల చేయాలని చిత్రబృందం భావించింది. అయితే వివిధ రాష్ర్టాల్లో థియేటర్లు దొరక్కపోవడంతో తెలుగులో మాత్రమే విడుదల చేశారు.