Buchi Babu: ఆ దేవత ఆశీర్వాదంతో రామ్ చరణ్ సినిమా.. బుచ్చి బాబు
ABN, Publish Date - Nov 22 , 2024 | 08:19 AM
గ్లోబల్ స్టార్ రామ్ చరణ్, బుచ్చి బాబు కాంబోలో ఓ మూవీ తెరకెక్కనున్న విషయం తెలిసిందే. మార్చిలో పూజ కార్యక్రమం పూర్తి చేసుకున్న ఈ సినిమా ఎట్టకేలకు సెట్స్ పైకి వెళ్ళింది. ఈ నేపథ్యంలో డైరెక్టర్ బుచ్చి బాబు ఏం చేశారంటే..
గ్లోబల్‌స్టార్‌ రామ్‌చరణ్‌ (Ram Charan) హీరోగా ఉప్పెన ఫేం సాన బుచ్చిబాబు (Sana Buchibabu) 'ఆర్‌సీ16’ (RC 16) వర్కింగ్‌ టైటిల్‌తో ఓ చిత్రం తెరకెక్కించనున్న సంగతి తెలిసిందే. మైత్రీ మూవీ మేకర్స్‌, సుకుమార్‌ రైటింగ్స్‌ సమర్పణలో వృద్థి సినిమాస్‌పై వెంకట సతీష్‌ కిలారు ఈ చిత్రాన్ని నిర్మిస్తున్నారు. శ్రీదేవి కూతురు జాన్వీకపూర్‌ చరణ్ సరసన హీరోయిన్‌గా నటిస్తోంది. కన్నడ స్టార్ శివ రాజ్‌కుమార్‌ పవర్‌ఫుల్‌ రోల్‌ పోషించనున్నారు. ఈ చిత్రం ప్రకటించి చాలా కాలమే అయినా ఇంకా సెట్స్ మీదకు వెళ్లలేదు. మార్చ్ నెలలో పూజా కార్యక్రమాలతో లాంఛనంగా మొదలైన ఈ చిత్రం ఇప్పుడు రెగ్యులర్‌ షూట్‌కి వెళ్లనుంది. నేటి నుండి (నవంబర్ 22) నుంచి కర్నాటక రాష్ట్రంలోని మైసూర్‌లో మొదటి షెడ్యూల్‌ ప్రారంభం కానుంది. రామ్ చరణ్, జాన్వీలపై కీలక సన్నివేశాలు తెరకెక్కించనున్నారు దర్శకుడు బుచ్చిబాబు. వీరితోపాటు ముఖ్య తారాగణం కూడా ఉంటారు.
ఈ క్రమంలోనే డైరెక్టర్ బుచ్చిబాబు తన సోషల్ మీడియా నుండి ఆసక్తికరమైన పోస్ట్‌ని షేర్ చేశారు. మైసూర్‌లోని చాముండేశ్వరి మాత ఆలయాన్ని ఆయన దర్శించుకున్నారు. ఈ ఫోటోని షేర్ చేస్తూ.. "ది మోస్ట్ అవెయిటెడ్ మూమెంట్" అంటూ రాసుకొచ్చారు. అలాగే చాముండేశ్వరి మాత బ్లెసింగ్స్‌తో ఈ సినిమాని మొదలు పెడుతున్నట్లు పేర్కొన్నారు.
మైసూరు‌లో నాన్‌స్టాప్‌గా 15 రోజులపాటు షూటింగ్‌ చేస్తారని తెలిసింది. ఈ చిత్రానికి ఏఆర్‌ రెహమాన్‌ సంగీతం అందిస్తున్నారు. మట్టి లాంటి కథ ఇదని ఇప్పటికే రామ్‌చరణ్‌ చెప్పారు. ఇప్పటి వరకూ చేసిన చిత్రాలో ఈ చిత్రం ది బెస్ట్‌ అవుతుందని కూడా ఆయన ఓ వేదికపై వెల్లడించారు. ఉప్పెనతో భారీ విజయం అందుకుని నేషనల్‌ అవార్డు అందుకున్న దర్శకుడు సాన బుచ్చిబాబు ఈ చిత్రాన్ని ప్రతిష్టాత్మకంగా తీసుకున్నారు. పూర్తిస్థాయి కథతో పకడ్భందీగా సెట్స్ మీదకెళ్తున్నారు. ఇక రామ్‌చరణ్‌ హీరోగా శంకర్‌ దర్శకత్వం వహించిన ‘గేమ్‌ ఛేంజర్‌’ సంక్రాంతి కానుకగా జనవరి 10న పాన్‌ ఇండియా స్థాయిలో విడుదల కానుంది. ఇప్పటికే ఈ సినిమా ప్రమోషన్స్‌ మొదలయ్యాయి. కియారా అడ్వాణీ కథానాయికగా నటించిన ఈ చిత్రంలో సునీల్‌, సముద్రఖని, అంజలి కీలక పాత్రధారులు.