Bandi: బిగ్‌బాస్‌ ఆదిత్య ఓం.. ‘బంధీ’ టీజర్ రిలీజ్‌

డిఫరెంట్ కాన్సెప్ట్, కంటెంట్ చిత్రాలను చేస్తున్న ఆదిత్య ఓం న‌టించిన చిత్రం ‘బంధీ’ ప్రేక్ష‌కుల ముందుకు వ‌చ్చేందుకు రెడీ అయింది. తాజాగా ఈ చిత్రం నుంచి టీజర్‌ విడుదల చేశారు.

డిఫరెంట్ కాన్సెప్ట్, కంటెంట్ చిత్రాలను చేస్తున్న ఆదిత్య ఓం (Aditya Om) న‌టించిన చిత్రం ‘బంధీ’ (Bandi)ప్రేక్ష‌కుల ముందుకు వ‌చ్చేందుకు రెడీ అయింది. తిరుమల రఘు (Raghava T) ఈ సినిమాకు ద‌ర్శ‌క‌త్వం వ‌హించ‌డంతో పాటు వెంకటేశ్వర రావు దగ్గుతో క‌లిసి గల్లీ సినిమా బ్యానర్ మీద ఈ మూవీని నిర్మిస్తున్నారు. తాజాగా ఈ చిత్రం నుంచి టీజర్‌ విడుదల చేశారు.

ఈ సంద‌ర్భంగా దర్శక నిర్మాత రఘు తిరుమల (Raghava Tమాట్లాడుతూ.. ‘ఇది నాకు మొదటి చిత్రం. ఈ ప్రయాణంలో ఎన్నో నేర్చుకున్నాను. ఆదిత్య ఓం సపోర్ట్ వల్లే ఈ మూవీని చేయగలిగాను. ఆయన ద్వారా ఎంతో నేర్చుకున్నాను. సినిమాలో కేవలం ఒక్క కారెక్టరే ఉంటుంది. ఆదిత్య వర్మ అనే పాత్రతోనే ఈ మూవీ ఉంటుంది. ప్రకృతిని నాశనం చేస్తున్న కార్పోరేట్ కంపెనీలకు సపోర్ట్ చేసే పాత్రలో ఆదిత్య కనిపిస్తారు. అలాంటి లీగల్ అడ్వైజర్ పాత్రని అడవిలో వదిలేస్తే ఏం జరుగుతుంది? అనేది ఆసక్తికరంగా ఉంటుంది. ప్రకృతిని ఎలా కాపాడుతాడు? అన్నది చివరకు చూస్తారన్నారు.

కరోనా తరువాత ప్రకృతి మీద అందరికీ అవగాహన ఏర్పడింది. అందుకే ఈ కథను రాసుకున్నాను. ఆదిత్య ఓం ఎంతో ఒదిగి ఉండేవారు. మూడేళ్లలో ఆయన్ను చాలా దగ్గర్నుండి చూశాను. ఆరేడు నెలల క్రితమే షూటింగ్ పూర్తయింది. ప్రస్తుతం కొంత పని జరుగుతోంది. ఆదిత్య గారు సినిమాలో ఎక్కడా కూడా డూప్ వాడనివ్వలేదు. సొంతంగా యాక్షన్ సీక్వెన్స్ చేశారు. ఆయన ఇప్పుడు బిగ్ బాస్ షోలో ఉన్నారు. పంచభూతాలతో అడవిలో మమేకమై ఉన్నారు. ఇప్పుడు బిగ్ బాస్ షోతో భిన్నమనస్తత్వాలు కూడిన మనుషులతో కలిసి ఉన్నాడు. సక్సెస్ అయి వస్తాడని ఆశిస్తున్నాను’ అని అన్నారు.

నరకాసుర నిర్మాత కారుమూరు మాట్లాడుతూ.. ‘రఘు ఈ చిత్రాన్ని బాగా తీశారు. సినిమాకి ఏం కావాలో అది చేశారు. ఆదిత్యను ఇరవై ఏళ్ల క్రితం కలిశాను. ఆయన నన్ను ఇన్నేళ్లుగా ఎంకరేజ్ చేస్తూనే ఉన్నారు. సినిమాకు ఎంతో కొంత మంచి జరుగుతుందని అనుకున్నారు. మన అందరి కోసమే బిగ్ బాస్ షోకి వెళ్లారు. ఆయన వల్లే నాకు ఈ సినిమా అవకాశం వచ్చింది’ అని అన్నారు.

యూఎస్ డిస్ట్రిబ్యూటర్, వీఎఫ్ఎక్స్ హెడ్ జాకబ్ మాట్లాడుతూ.. ‘డైరెక్టర్ రఘుని హైద్రాబాద్‌లో కలిశాను. రంపచోడవరంలో షూటింగ్ చేసినప్పుడు చూశాను. రఘు ఎంతో ప్యాషన్‌తో ఈ సినిమాను తీశారు. ఆదిత్య ఓం నటించిన లాహిరి లాహిరి లాహిరిలో, ధనలక్ష్మీ ఐలవ్యూ ఎన్నో చిత్రాలు విజయాన్ని సాధించాయి. ఇది యూనివర్సల్ కాన్సెప్ట్. ప్రకృతి కోసం తీసిన ఈ చిత్రం అన్ని ప్రాంతాలకు వర్తిస్తుంది. ఇండియా, అమెరికా అన్ని చోట్లా ఈ కాన్సెప్ట్ వర్కౌట్ అవుతుంది. నేను ఈ చిత్రాన్ని చూశాను. యూఎస్‌లో డిస్ట్రిబ్యూట్ చెయ్యడానికి సన్నాహాలు చేస్తున్నాను’ అని అన్నారు.