C Aswani Dutt: అమితాబ్ నా కాళ్లకి నమస్కరించినప్పుడు.. నా పరిస్థితి ఇదే!

నాగ్ అశ్విన్ దర్శకత్వంలో తెరకెక్కిన సైన్స్ ఫిక్షన్ ఎపిక్ మాగ్నం ఓపస్ చిత్రం ‘కల్కి 2898 AD’. ఈ విజువల్ వండర్‌లో ఇండియన్ బిగ్గెస్ట్ సూపర్ స్టార్స్ అమితాబ్ బచ్చన్, కమల్ హాసన్, ప్రభాస్, దీపికా పదుకొణె లీడ్ రోల్స్‌లో నటించారు. వైజయంతీ మూవీస్ బ్యానర్‌పై నిర్మాత సి. అశ్వనీదత్ ఈ చిత్రాన్ని నిర్మించారు. ఈ మూవీ సక్సెస్ నేపథ్యంలో నిర్మాత అశ్వనీదత్ మీడియాతో తన ఆనందాన్ని పంచుకున్నారు.

నాగ్ అశ్విన్ (Nag Ashwin) దర్శకత్వంలో తెరకెక్కిన సైన్స్ ఫిక్షన్ ఎపిక్ మాగ్నం ఓపస్ చిత్రం ‘కల్కి 2898 AD’ (Kalki 2898 AD). ఈ విజువల్ వండర్‌లో ఇండియన్ బిగ్గెస్ట్ సూపర్ స్టార్స్ అమితాబ్ బచ్చన్, కమల్ హాసన్, ప్రభాస్, దీపికా పదుకొణె లీడ్ రోల్స్‌లో నటించారు. వైజయంతీ మూవీస్ బ్యానర్‌పై నిర్మాత సి. అశ్వనీదత్ ఈ చిత్రాన్ని నిర్మించారు. ఈ సినిమా జూన్ 27న గ్రాండ్‌గా విడుదలై ప్రపంచ వ్యాప్తంగా అన్ని వర్గాల ప్రేక్షకులని మెప్పిస్తూ..యునానిమాస్ ఎపిక్ బ్లాక్ బస్టర్‌గా, రికార్డ్ బ్రేకింగ్ కలెక్షన్స్‌తో దూసుకెళుతోంది. ఈ నేపధ్యంలో నిర్మాత సి. అశ్వనీదత్ (C Aswani Dutt) మీడియాకు తన సంతోషాన్ని తెలియజేశారు.

‘కల్కి 2898 AD’.. మీ అంచనాలకి తగ్గ రిజల్ట్ అందుకుంది కదా.. ఎలా అనిపిస్తుంది?

చాలా చాలా హ్యాపీగా వున్నాను. నిన్న మార్నింగ్ షో నుంచే.. తెలుగు రాష్ట్రాలు, ముంబై, మద్రాస్, బెంగళూరు, ప్రపంచవ్యాప్తంగా రెవల్యూషనరీ రిపోర్ట్ వచ్చింది. నేను ఏదైతే అనుకున్నానో అలాంటి అఖండ విజయం వచ్చింది. హ్యాట్సాప్ టు నాగ్ అశ్విన్. ఐయామ్ వెరీ వెరీ హ్యాపీ. (C Aswani Dutt Interview)

నాగ్ అశ్విన్ ఇలాంటి వైల్డ్ డెప్త్ వున్న సబ్జెక్ట్ ని హ్యాండిల్ చేయగలడనే కాన్ఫిడెన్స్ మీకు ఎప్పుడు వచ్చింది?

తన మొదటి సినిమా నుంచి తనతో జర్నీ చేస్తున్నాం. తను ఎంత పెద్ద సినిమా అయినా తీయగలడనే కాన్ఫిడెన్స్ నాకు మొదటి నుంచి వుంది. అదే మా అమ్మాయిలతో చెప్పాను. తను ఏ సబ్జెక్ట్ చెప్పినా వెంటనే దూకేయమని అన్నాను. ఈ శతాబ్దంలో ఒక దర్శకుడు మా ఇంట్లోనే దొరికాడు(నవ్వుతూ). నా మొదటి సినిమా ఎదురులేని మనిషి నుంచి ఇప్పటివరకూ దర్శకుడు చెప్పింది వినడం, తనకు కావల్సినది సమకూర్చడం తప్పా మరో డిస్కర్షన్ పెట్టను. ఇది అందరికీ తెలుసు. ఈ సినిమా మొదలైనప్పటి నుంచి ఇప్పటివరకూ ఇంకా ఏం కావాలని అడగడం తప్పా నేను ఎప్పుడు ఎక్కడ ఇంటర్ఫియర్ కాలేదు.

బిగ్ బిని నాగ్ అశ్విన్ అద్భుతంగా చూపించారు కదా.. ఆయన్ని అలాంటి పాత్రలో చూడటం మీకు ఎలా అనిపించింది?

డైరెక్టర్ ఏం అనుకున్నారో అలానే తీస్తారని తెలుసు, అలానే తీశారు కూడా. హ్యాట్సాప్ టు హిమ్. అమితాబ్‌గారిని అలా చూడటం చాలా చాలా సంతోషంగా అనిపించింది.

అమితాబ్ (Amitabh), నిర్మాతగా మీకు గౌరవం ఇస్తూ మీ కాళ్ళకి నమస్కరించినప్పుడు మీ ఫీలింగ్ ఏమిటి?

నాకు తలకాయ కొట్టేసినంత పనైయింది (నవ్వుతూ). మేము కలిసినప్పుడు పరస్పరం నమస్కరించుకుంటాం. అక్కడితో ఆగిపోతాం. అయితే స్టేజ్ మీద మాత్రం ఆయన అలా చేయడం నేను అస్సల్ ఊహించలేదు. అమితాబ్ గారు లెజెండ్. హ్యాట్సాప్ టు హిమ్.

ఇందులో బుజ్జి (కారు)ని కూడా ఒక పాత్రగా చూపెట్టారు.. ఆ ఆలోచనపై మీ అభిప్రాయం?

ఇదంతా నాగ్ అశ్విన్ విజన్. ఈ కాన్సెప్ట్ గురించి చెప్పినప్పుడు చాలా అద్భుతంగా అనిపించింది. సినిమాలో చాలా గొప్పగా ప్రజెంట్ చేశారు.

ఈ కథ అనుకున్నప్పుడే పార్ట్ 2 ఐడియా ఉందా?

అవునండీ. ఈ స్టోరీ అనుకున్నప్పుడే పార్ట్ 2 థాట్ వచ్చింది. కమల్ గారు ఎంటరైన తర్వాత పార్ట్ 2 డిసైడ్ అయిపోయాం. కమల్ గారిది అద్భుతమైన పాత్ర.

ఈ సినిమా విషయంలో ఎలాంటి టెన్షన్ పడ్డారు?

టెన్షన్ ఏమీ లేదండీ. మిడ్ సమ్మర్‌లో రిలీజ్ అయితే బావుంటుందని అనుకున్నాం. అయితే మే 9 విడుదల చేయాలని అనుకున్నాం. కానీ వాయిదా వేయాల్సి వచ్చింది. తర్వాత జూన్ 27 కరెక్ట్ అనుకోని ఆ డేట్‌కి తీసుకొచ్చాం. నాగీ, స్వప్న, ప్రియాంక ఈ ముగ్గురే కాపీ చూశారు. దేవుడి దయ. సినిమా అద్భుతమైన విజయం సాధించింది. ఈ సినిమా అఖండ విజయం సాధిస్తుందనే ఉద్దేశంతోనే తీశాం. ఆ ఉద్దేశం నెరవేరింది.

పార్ట్ 2 రిలీజ్ ఎప్పుడు?

ఇప్పుడే ఏం తెలీదండి. నెక్స్ట్ ఇయర్ మళ్లీ ఇదే టైంలోనే రావచ్చు.

గతంలో శక్తి పీఠాలు నేపధ్యంలో ‘శక్తి’ చేసినప్పుడు అలాంటి సబ్జెక్ట్ ఎందుకని కొందరు చెప్పారని అన్నారు. ఇప్పుడు దానికంటే పవర్ ఫుల్ మహాభారతం సబ్జెక్ట్ చేయడం భయం అనిపించలేదా?

లేదండీ. నాగీ ఈ కథ చెప్పినప్పుడే చాలా పగడ్భందీగా ఫెంటాస్టిక్‌గా చెప్పారు. దీంతో నేను ఎలాంటి ప్రశ్నా వేయలేదు.

స్వప్న రికార్డ్స్ గురించి అడిగితే సినిమాపై ప్రేమతో చేశామని అన్నారు? మీరు ఏం చెప్తారు?

రికార్డ్స్ ఎప్పుడూ వస్తూనే ఉంటాయండి. కానీ ఈసారి వస్తున్న రికార్డ్స్ చాలా అద్భుతం. ప్రభాస్, అమితాబ్ బచ్చన్, కమల్ హాసన్, నాగ్ అశ్విన్ ఈ అద్భుతాన్ని చేశారు. ఈ విజయాన్ని ఆస్వాదిస్తున్నాం.

ప్రభాస్ (Prabhas) కోపరేషన్ ఎలా వుంది?

చాలా బావుంది అండీ. ప్రభాస్‌గారి కోపరేషన్ లేకపోతే అసలు సినిమా బయటికి రాదు. డార్లింగ్ అంటే నిజంగా డార్లింగ్ లానే పని చేశారు.

రాజమౌళి-ప్రభాస్‌గారి ఎపిసోడ్ గురించి?

రాజమౌళి-ప్రభాస్ ఎపిసోడ్ ఫన్నీగా పెట్టిందే. అలాగే బ్రహ్మానందం, రామ్ గోపాల్ వర్మ క్యామియోస్‌ని కూడా ప్రేక్షకులు చాలా ఎంజాయ్ చేస్తున్నారు.

వైజయంతి మూవీస్ 50 ఇయర్స్ సెలబ్రేషన్స్ చేస్తున్నారా?

ఇదొక అద్భుతమైన ప్రయాణం. నా మొదటి సినిమా నుంచి, నేటి కల్కి వరకూ అందరికీ రుణపడి వుంటాను. నటీనటులు, టెక్నిషియన్స్ అందరు సొంత మనిషిలా నన్ను దగ్గరకి చేర్చుకొని సినిమాలు చేశారు. అందరికీ హ్యాట్సాప్.

మీ అమ్మాయిలు వరల్డ్ రేంజ్ సినిమాని తీశారు. తండ్రిగా మీ ఫీలింగ్?

నేను గొప్ప అదృష్టవంతుడిని. మా అమ్మాయిలు సంస్థని గొప్ప శిఖరాలకి తీసుకెళుతున్నారు. తండ్రిగా చాలా గర్వపడుతున్నాను.

మీకు పొలిటికల్ అలైన్స్ వుంది. టీడీపీకి మీరు చాలా క్లోజ్‌గా వుంటారు. ఇప్పుడు వారు అధికారంలోకి వచ్చారు. ఇండస్ట్రీకి ఎలా ఉండబోతుంది?

ఇకపై చింతపడాల్సిన అవసరం లేదు. చంద్రబాబుగారు అద్భుతంగా అభివృద్ధి చేస్తారు. పరిశ్రమకు అద్భుతంగా వుంటుంది.

ఈ సినిమా సినిమాటిక్ యూనివర్స్‌లో ఇంకా ఎన్ని పార్ట్స్ ఉండొచ్చు?

ఈ రెండే వస్తాయి. తర్వాత ఎలా వుంటుందనే స్క్రిప్ట్ బట్టి చూడాలి.

వైజయంతీ మూవీస్ నుంచి రాబోయే సినిమాలు గురించి?

హీరో శ్రీకాంత్‌గారి అబ్బాయితో ఓ సినిమా వుంటుంది. అలాగే దుల్కర్ సల్మాన్‌తో ఓ సినిమా చేస్తున్నాం.