Arjun: వియ్యంకుడు హీరో.. అల్లుడు దర్శకుడు
ABN, Publish Date - Nov 22 , 2024 | 09:25 PM
తన వియ్యంకుడుపై యాక్షన్ కింగ్ అర్జున్ ఆసక్తికర వ్యాఖ్యలు చేశారు. వియ్యంకుడు తంబి రామయ్య హీరోగా నటించిన చిత్రం, తన అల్లుడు డైరెక్ట్ చేసిన చిత్ర వేదికపై ఉన్నందుకు అర్జున్ హ్యాపీగా ఫీలయ్యారు. ఈ సందర్భంగా ఆయన ఏమన్నారంటే..
తన వియ్యంకుడు కథానాయకుడిగా నటించిన చిత్రానికి మా ఇంటి అల్లుడు దర్శకత్వం వహించిన అరుదైన సంఘటన ‘రాజాకిలి’ చిత్రంలో చోటుచేసుకుందని యాక్షన్ కింగ్ అర్జున్ అన్నారు. ‘మానాడు’ వంటి సూపర్‌ హిట్‌ చిత్రాన్ని నిర్మించిన సురేష్‌ కామాక్షి ‘వి హౌప్‌’ పతాకంపై నిర్మించిన చిత్రం ‘రాజాకిలి’ ఈ నెల 29న విడుదలకానుంది. సీనియర్‌ నటుడు తంబి రామయ్య ప్రధాన పాత్ర పోషించగా, ఇతర పాత్రల్లో సముద్రఖని, శ్వేత, శుభ, ప్రవీణ్‌, క్రిష్‌, ముసాఫిర్‌, దర్శకుడు మూర్తి తదితరులు ఇతర పాత్రల్లో నటించారు. తంబి రామయ్య కుమారుడు ఉమాపతి దర్శకత్వం వహించారు. ఈ చిత్రం ఆడియో, ట్రైలర్‌ విడుదల కార్యక్రమం తాజాగా చెన్నై నగరంలో జరిగింది. (Rajakili Audio Launch)
Also Read-Kushboo: నాకేమైనా ఛాన్స్ ఉందా.. అంటూ ఆ హీరో అసభ్యకరంగా మాట్లాడాడు
కామాక్షి సురేష్‌ నాకు అవకాశం ఇవ్వలేదు
ఈ కార్యక్రమానికి ముఖ్య అతిథిగా పాల్గొన్న యాక్షన్ కింగ్ అర్జున్ మాట్లాడుతూ.. మంచి నటీనటులను ఎంపిక చేసి చిత్రాలు నిర్మిస్తారనే పేరు నిర్మాత కామాక్షి సురేష్‌కు ఉంది. కానీ, ఆయన ఇప్పటివరకు నాకు ఒక్క అవకాశం కూడా ఇవ్వలేదు’ అన్నారు. నా అల్లుడు ఉమాపతి రామయ్య ఈ చిత్రానికి దర్శకత్వం వహిస్తే, వియ్యంకుడు తంబి రామయ్య కథానాయకుడిగా నటించారు. ఇది అరుదైన విషయం. నాకు స్పెషల్‌ మూవీ. నేను కూడా ఇప్పటివరకు నటించని రొమాంటిక్‌ పాత్ర తంబి రామయ్య పోషించారు. నేను, నా అల్లుడు కలిసి ఒకే వేదిక పంచుకోవడం ఇదే తొలిసారి. భవిష్యత్‌లో ఇలాంటి వేదికలు మరిన్ని చూస్తారు. ఈ సినిమా అందరికీ నచ్చిలే ఉంటుందని అన్నారు.
నటుడు సముద్రఖని మాట్లాడుతూ, ‘ఎవరికి ఏం ఇవ్వాలో కాలమే నిర్ణయిస్తుంది’ అన్నారు. తంబి రామయ్య మాట్లాడుతూ, ‘వినోదయ సిత్తం’ అనే చిత్రం లేకుంటే ఇపుడు ఈ సినిమా లేదన్నారు. నిర్మాత సురేష్‌ మాట్లాడుతూ, ‘రాజాకిలి’లో దివంగత నటుడు రఘువరన్‌కు మరో వెర్షన్‌గా క్రిష్‌ను చూస్తారన్నారు. దర్శకుడు ఉమాపతి మాట్లాడుతూ, ‘ఈ సినిమా కోసం మా నాన్నను ఎంతో కష్టపెట్టాను. నేలపై నూనె పోసి నటింపజేశాను’ అని పేర్కొన్నారు. ఈ చిత్రానికి కథ, మాటలు, పాటలు, సంగీతం తంబి రామయ్య సమకూర్చడం గమనార్హం.