‘మైనా’ ఫేం సేతు హీరోగా ‘మైయల్‌’

‘మైనా’ ఫేం సేతు హీరోగా నటించిన కొత్త చిత్రానికి ‘మైయల్‌’ అనే టైటిల్‌ ఖరారు చేశారు. ఒక ముఖ్యమైన సామాజిక ఇతివృత్తంతో డీప్లీ ఎమోషనల్‌ మూవీగా తెరకెక్కింది.

ఐకాన్‌ సినీ క్రియేషన్స్‌ ఎల్‌ఎల్‌పీ సమర్పణలో నిర్మాతలు ఆర్‌.వేణుగోపాల్‌, అనుపమ విక్రమ్‌ సింగ్‌ నిర్మాణంలో ఏపీజీ ఏళుమలై (APG Elumalai) దర్శకత్వంలో ‘మైనా’ ఫేం సేతు (Mynaa Sethu) హీరోగా నటించిన కొత్త చిత్రానికి ‘మైయల్‌’ (Maiyal) అనే టైటిల్‌ ఖరారు చేశారు. చక్కటి కథలతో రూపొందే చిత్రాలు భాషా సరిహద్దులకు అతీతంగా ఆదరణ పొందుతున్నాయి.

ఇటీవలి కాలంలో తమిళ చిత్రపరిశ్రమలో ఇలాంటి మంచి కంటెంట్‌ చిత్రాలకు విశేష ఆదరణ లభిస్తోంది. అలాంటి చిత్రాల్లో ఒకటి ‘మైనా’. ఇందులో భాస్కర్‌ పాత్రలో నటించిన సేతు.. ఇపుడు ఒక ముఖ్యమైన సామాజిక ఇతివృత్తంతో డీప్లీ ఎమోషనల్‌ మూవీగా తెరకెక్కిన ‘మైయల్‌’లో హీరోగా నటించారు.

ఈ సినిమా గురించి దర్శకుడు ఏళుమలై మాట్లాడుతూ, ‘ఒక సాధారణమైన వ్యక్తి హక్కులు కాపాడేందుకు, అతనికి జీవితాన్ని ప్రసాదించేందుకు న్యాయ వ్యవస్థ తీసుకున్న ఒక నిర్ణయం కారణంగా నిజమైన ప్రేమ విచ్ఛిన్నమైపోతుంది. అది ఎలా అన్నదే ఈ చిత్ర కథ అని అన్నారు. హీరోయిన్‌గా కన్నడ నటి సమృతి (Samritha Thaara) కోలీవుడ్‌కు పరిచయమవుతోంది. ఈ సినిమా షూటింగ్‌ను 37 రోజుల్లోనే పూర్తి చేయ‌గా తిరువణ్ణామలై సమీపంలోని కల్వరాయన్‌ కొండ ప్రాంతంలోని అందమైన లొకేషన్‌లలో చిత్రీకరించారు.