Star Director: సెన్సేషనల్ స్టార్ డైరెక్టర్ సూసైడ్.. షాక్‌లో సినీ ప్రముఖులు
ABN, Publish Date - Nov 03 , 2024 | 04:05 PM
మొదటి రెండు సినిమాలతో కన్నడ సినీ ఇండస్ట్రీలో సంచలనం సృష్టించిన ఓ స్టార్ డైరెక్టర్ మరణంతో సినీ ఇండస్ట్రీ మూగబోయింది. ఇంతకీ ఆ డైరెక్టర్ ఎవరు, ఏమైందంటే..
మొదటి రెండు సినిమాలతో కన్నడ సినీ ఇండస్ట్రీలో సంచలనం సృష్టించిన ఓ స్టార్ డైరెక్టర్ మరణంతో సినీ ఇండస్ట్రీ మూగబోయింది. ఒక వైపు నటుడిగా, రచయితగా, డైరెక్టర్‌గా, రియాలిటీ షో జడ్జిగా రాణించిన ఆ డైరెక్టర్ మరణానికి కారణమేమిటంటూ అరా తీస్తున్నారు. ఇటీవల 'రంగనాయక' అనే సినిమాతో డిజాస్టర్ చవిచూసిన ఈ డైరెక్టర్ అప్పుల్లో కూరుకుపోయారు. మరోవైపు రెండో పెళ్లి చేసుకున్నారు. ఇంతకీ ఆ డైరెక్టర్ ఎవరు, ఏమైందంటే..
'మఠ', 'ఎద్దేలు మంజునాథ' సినిమాలతో కన్నడ ఇండస్ట్రీలో సంచలన విజయాలు అందుకున్న డైరెక్టర్ 'గురుప్రసాద్'. కెరీర్ ఆరంభంలోనే మంచి సినిమాలతో తనదైన క్రేజ్ సంపాదించుకున్న ఈ డైరెక్టర్.. 'ఎద్దేలు మంజునాథ' సినిమాకి ప్రతిష్టాత్మక స్టేట్ అవార్డుతో పాటు ఫిల్మ్‌ఫేర్ అవార్డు సొంతం చేసుకున్నారు. ఆ తర్వాత 'డైరెక్టర్ స్పెషల్', 'ఎరడనే సలా', 'రంగనాయక' సినిమాలు తీసిన పెద్దగా ఆడలేదు. ఈ క్రమంలోనే ఆయనకు ఒక దిక్కు అప్పులు, మరో దిక్కు కుటుంబ కలహాలు ఏర్పడాయి. ఇటీవలే ఆయన రెండో పెళ్లి చేసుకున్నారు. తాజాగా దనాయకహళ్లిలోని తన నివాసంలో సూసైడ్ చేసుకొని కనిపించారు.
పునీత్ రాజ్ కుమార్ నటించిన 'హుడుగరు', ఉపేంద్ర 'సూపర్ రంగా', 'విజిల్' సినిమాలకు ఆయన డైలాగ్స్ అందించారు. ఇక 'మఠ', 'ఎద్దేలు మంజునాథ','హుడుగరు', 'జిగర్తాండ', 'అనంతు వర్సెస్ నుస్రత్', 'బడవా రాస్కెల్', 'మైలారి' మొదలగు చిత్రాలలో నటుడిగా మెప్పించారు. పలు రియాలిటీ షోలకు జడ్జిగా వ్యవహరించారు. 52 ఏళ్లకే మరణించడంతో కన్నడ సినీ ఇండస్ట్రీ ప్రముఖులతో పాటు ఇతర ఇండస్ట్రీలకు చెందిన పలువురు సంతాపం వ్యక్తం చేస్తున్నారు.