నటుడు దర్శన్‌కు జైల్లో రాచమర్యాదలు
ABN, Publish Date - Aug 27 , 2024 | 04:29 AM
హత్య కేసులో నిందితుడిగా ఉన్న కన్నడ సినీనటుడు దర్శన్‌కు కర్ణాటకలోని పరప్పన అగ్రహార జైల్లో రాచమర్యాదలు అందుతున్న ఫొటో, వీడియో సోషల్‌ మీడియాలో హల్‌చల్‌ చేస్తున్నాయి. రిమాండ్‌ ఖైదీగా ఉన్న...
హత్య కేసులో నిందితుడిగా ఉన్న కన్నడ సినీనటుడు దర్శన్‌కు కర్ణాటకలోని పరప్పన అగ్రహార జైల్లో రాచమర్యాదలు అందుతున్న ఫొటో, వీడియో సోషల్‌ మీడియాలో హల్‌చల్‌ చేస్తున్నాయి. రిమాండ్‌ ఖైదీగా ఉన్న దర్శన్‌తోపాటు మరో ముగ్గురు జైలు ఆవరణలోని ఒక పచ్చిక మైదానంలో ప్లాస్టిక్‌ కుర్చీల్లో కూర్చొని జల్సాగా గడుపుతున్నట్టు ఆ ఫొటోలో ఉంది. దర్శన్‌ ఒక చేతిలో కాఫీ కప్పు, మరో చేతిలో సిగరెట్‌ ఉన్నాయి. దర్శన్‌ ఎదురుగా ఆయన మేనేజర్‌తోపాటు ఈ కేసులో సహనిందితులుగా ఉన్న రౌడీషీటర్లు విల్సన్‌ గార్డెన్‌ నాగ, కుల్ల సీన కూర్చుని ఉన్నారు. జైల్లో ఖైదీలకు రాచమర్యాదలు అందుతున్నాయని విమర్శలు వెల్లువెత్తడంతో కర్ణాటక ప్రభుత్వం ఘటనపై విచారణకు ఆదేశించింది. ఏడుగురు జైలు అధికారులను సస్పెండ్‌ చేసింది.
కొంప ముంచిన వీడియోకాల్‌
రౌడీషీటర్‌ జానీ అలియాస్‌ జనార్దన్‌ కుమారుడు సత్య మే 7న మార్కెట్‌ ధర్మ అనే రౌడీషీటర్‌కు వీడియోకాల్‌ చేశాడు. తన సెల్‌ పక్కనే నటుడు దర్శన్‌ ఉన్నాడని చూపించి.. దర్శన్‌తో హాయ్‌ చెప్పించాడు. ఈ వీడియోను రికార్డు చేసుకున్న సత్య.. తన దర్జాను చాటుకునేందుకు కలాసిపాళ్యలోని కొందరికి షేర్‌ చేశాడు. అదే దర్శన్‌ కొంప ముంచింది. మరోవైపు సత్యను పోలీసులు అదుపులోకి తీసుకున్నారు.
బెంగళూరు (ఆంధ్రజ్యోతి)