Anupama Parameswaran: 'టిల్లు స్క్వేర్' లో అనుపమ విశ్వరూపం!

అనుపమ పరమేశ్వరన్ కెరీర్ 'టిల్లు స్క్వేర్' సినిమాతో మారనుందని పరిశ్రమలో ఒక టాక్ నడుస్తోంది. ఈ సినిమా ట్రైలర్ విడుదలైంది, అందులో ఆమెని చూసాక ఆమె పాత్ర చాలా గ్లామరస్ గా ఉంటుంది అని ఇది ఆమె ఇంతకుముందు చేసిన పాత్రలకి భిన్నంగా ఉందని అంటున్నారు

సిద్ధు జొన్నలగడ్డ 'డీజే టిల్లు' చిత్రంతో సంచలన బ్లాక్‌బస్టర్‌ను అందుకున్నాడు. ఆ సినిమాలో అతను పోషించిన టిల్లు పాత్ర యువతలో మంచి ఫాలోయింగ్‌ను సంపాదించుకుంది, అలాగే అందులో రాధిక పాత్ర కూడా అంతే వైరల్ అయింది. ఇప్పుడు 'డీజే టిల్లు' కి సీక్వెల్ గా వస్తున్న 'టిల్లు స్క్వేర్' మార్చి 29న విడుదలకు సిద్ధం అవుతోంది. మొదటి పార్టులో రాధికగా నేహా శెట్టి మెప్పించి ఆమెని అందరూ రాధికగానే బయట చూసారు, అంటే ఆ సినిమాలో అంతలా ఆ పాత్ర పాపులర్ అయింది.

ఇప్పుడు అదే రాధిక పాత్రని ఈ సీక్వెల్ లో అనుపమ పరమేశ్వరన్ చేస్తోంది. ఈ మలయాళం భామ, తెలుగులో 'అ. ఆ..' సినిమాతో ఆరంగేట్రం చేసి మంచి నటి అని పేరు తెచ్చుకొంది. అయితే మొదట్లో గ్లామర్ పాత్రల్లో కనపడని అనుపమ కొన్ని సినిమాలు కూడా వదులుకున్నట్టుగా పరిశ్రమలో టాక్. ఎందుకంటే ఆమె పాత్రలు చాలా గ్లామర్ గా ఉన్నాయని ఆమె వదులుకుంది అని, ఉదాహరణకి 'గీత గోవిందం' మొదటగా అనుపమనే అనుకున్నారు, కానీ ఆమె చెయ్యలేదు.

ఇప్పుడు ఈ 'టిల్లు స్క్వేర్' లో అనుపమ ఇంతకు ముందు చేసిన సినిమాలకి భిన్నంగా ఒక గ్లామర్ పాత్రలో కనపడబోతోంది. ఈ సినిమా ట్రైలర్ ఫిబ్రవరి 14 వాలెంటైన్స్ డే సందర్భంగా విడుదల చేశారు. ఈ ట్రైలర్ లో అనుపమ విశ్వరూపం చూపించింది అని నెటిజన్స్ ఆమెకి కామెంట్స్ చేస్తున్నారు. ఈ చిత్రంతో ఆమె, పక్కింటి అమ్మాయిలా ఉంటుందనే తన ఆన్-స్క్రీన్ ఇమేజ్‌ని మార్చుకోవాలని నిర్ణయించుకుంది. అనుపమ పరమేశ్వరన్ లుక్స్‌తో పాటు ఆమె బాడీ లాంగ్వేజ్ మరియు సిద్ధూతో ఆమె కెమిస్ట్రీ ఈ ట్రైలర్‌లో హైలైట్‌గా నిలిచాయి.

ట్రైలర్ లో ఆమె సిద్ధూతో ఏకంగా ముద్దు సన్నివేశాల్లో నటించడమే కాకుండా, అందులో చాలా ఇంటెన్స్ గా నటించి చూపించింది. ఈ సినిమాతో అనుపమ పరమేశ్వరన్ అంటే ఏమిటే ప్రేక్షకులకు తెలియచెప్పేందుకే ఆమె ఇలాంటి ఒక గ్లామర్ పాత్ర ఎంచుకుందని ఒక టాక్ వినిపిస్తోంది.

ఈ సినిమాలో పాటలు ఇప్పటికే బాగా పాపులర్ అయ్యాయి. అందులో ఒక పాటలో అనుపమని ఎంత గ్లామర్ గా చూపించాలో అంత గ్లామర్ గా కూడా చూపించారు. ఇంతవరకు అనుపమ కెరీర్ ఒకలా ఉంటే, ఈ 'టిల్లు స్క్వేర్' సినిమాతో ఆమె కెరీర్ మారనుందని, ఆమెకి ఇక అవకాశాలు వెల్లువలా వస్తాయని పరిశ్రమలో ఇంకో టాక్ కూడా వినిపిస్తోంది.

మల్లిక్ రామ్ ఈ చిత్రానికి దర్శకత్వం వహిస్తున్నారు. అలాగే ఈ సినిమాకి ప్రత్యేక సంగీత దర్శకుడు ఎస్ఎస్ థమన్ నేపధ్య సంగీతం అందిస్తున్నారు, రామ్ మిరియాల సంగీతం సమకూరుస్తున్నారు. సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్‌ పతాకాలపై సూర్యదేవర నాగవంశీ ఈ చిత్రాన్ని నిర్మిస్తున్నారు.