జీబ్రా సూపర్‌హిట్‌ అవుతుంది
ABN, Publish Date - Nov 13 , 2024 | 04:34 AM
‘సత్యదేవ్‌లాంటి విలక్షణ నటుల కొరత తెలుగు పరిశ్రమలో ఉంది. తను అద్భుతమైన నటుడే అయినా అతనికి మంచి సినిమాలు పడడం లేదనిపించేది. ఆ లోటును ‘జీబ్రా’ చిత్రం తీరుస్తుందని నమ్ముతున్నాను. ఈ సినిమా కచ్చితంగా...
‘సత్యదేవ్‌లాంటి విలక్షణ నటుల కొరత తెలుగు పరిశ్రమలో ఉంది. తను అద్భుతమైన నటుడే అయినా అతనికి మంచి సినిమాలు పడడం లేదనిపించేది. ఆ లోటును ‘జీబ్రా’ చిత్రం తీరుస్తుందని నమ్ముతున్నాను. ఈ సినిమా కచ్చితంగా సూపర్‌ హిట్‌ అవుతుంది’ అని చిరంజీవి అన్నారు. సత్యదేవ్‌ కథానాయకుడిగా ఈశ్వర్‌ కార్తిక్‌ దర్శకత్వం వహించిన చిత్రం ‘జీబ్రా’. ఈ నెల 22న విడుదలవుతోంది. చిత్రబృందం మంగళవారం ట్రైలర్‌ విడుదల కార్యక్రమాన్ని హైదరాబాద్‌లో నిర్వహించింది. చిరంజీవి ముఖ్య అతిథిగా హాజరై ‘జీబ్రా’ ట్రైలర్‌ను విడుదల చేశారు. ఈ సందర్భంగా ఆయన మాట్లాడుతూ ‘‘జీబ్రా చిత్రం మంచి కంటెంట్‌తో వస్తోంది. సత్యదేవ్‌, ధనంజయ్‌, సత్యరాజ్‌ లాంటి ప్రతిభావంతులైన నటులు ఉన్నారు. వినోదంతో పాటు కుటుంబ ప్రేక్ష కులను ఆకట్టుకునే అంశాలు ఈ సినిమాలో ఉన్నాయి’ అని చెప్పారు. సత్యదేవ్‌ మాట్లాడుతూ ‘చిరంజీవి గారు నాపైన నమ్మకంతో ‘గాడ్‌ఫాదర్‌’ సినిమాలో అవకాశం ఇచ్చారు. ఆ సినిమా వల్లే మా నిర్మాతలు ‘జీబ్రా’ సినిమాలో నాకు అవకాశం ఇచ్చారు.
ఇక నుంచి ప్రేక్షకులు కొత్త సత్యదేవ్‌ను చూస్తారు’ అని అన్నారు. ఈశ్వర్‌ కార్తిక్‌ మాట్లాడుతూ ‘సత్యదేవ్‌, డాలీ ఇద్దరూ అద్భుతంగా నటించారు. ప్రేక్షకులకు మంచి సినిమాను అందించబోతున్నాం. పతాక సన్నివేశాలు ప్రేక్షకులను అలరిస్తాయి’ అని తెలిపారు. వినూత్నమైన కథతో జీబ్రాని తెరకెక్కించామని నిర్మాత ఎస్‌.ఎన్‌ రెడ్డి చెప్పారు. ఇదొక కంప్లీట్‌ ఫ్యామిలీ మాస్‌ యాక్షన్‌ ఎంటర్‌టైనర్‌ అని డాలీ ధనంజయ్‌ అన్నారు.