Mr Celebrity: ‘మిస్టర్ సెలెబ్రిటీ’ గజానన పాట.. వరలక్ష్మీ విశ్వరూపం

సుదర్శన్ పరుచూరి హీరోగా వరలక్ష్మీ శరత్ కుమార్, శ్రీ దీక్ష, నాజర్, రఘుబాబు వంటి వారు ముఖ్య పాత్రలలో నటిస్తోన్న చిత్రం ‘మిస్టర్ సెలెబ్రిటీ’. వినాయక చవితి పండుగను పురస్కరించుకుని ఈ సినిమాలోని ‘గజానన’ అనే వీడియో సాంగ్‌ని మేకర్స్ విడుదల చేశారు. చాలా రోజుల తరువాత వరలక్ష్మీ శరత్ కుమార్ ఈ పాటలో ఎంతో ఎనర్జీగా డ్యాన్స్ చేస్తూ కనిపించారు.

సుదర్శన్ పరుచూరి (Sudarshan Paruchuri) హీరోగా వరలక్ష్మీ శరత్ కుమార్ (Varalaxmi Sarathkumar), శ్రీ దీక్ష, నాజర్, రఘుబాబు వంటి వారు ముఖ్య పాత్రలలో నటిస్తోన్న చిత్రం ‘మిస్టర్ సెలెబ్రిటీ’ (Mr Celebrity). ఈ చిత్రాన్ని ఎన్. పాండురంగారావు, చిన్నరెడ్డయ్య సంయుక్తంగా ఆర్‌పి సినిమాస్ బ్యానర్‌పై నిర్మిస్తున్నారు. ఈ సినిమాకు చందిన రవి కిషోర్ దర్శకత్వం వహిస్తున్నారు. రీసెంట్‌గా ఈ మూవీ నుంచి విడుదల చేసిన టీజర్ మంచి స్పందనను రాబట్టుకోగా.. తాజాగా వినాయక చవితి స్పెషల్‌గా ఓ హుషారైన భక్తి గీతాన్ని మేకర్స్ వదిలారు.

Also Read- Tollywood: సాయి ధరమ్, వరుణ్ తేజ్.. ఇప్పటి వరకు ఎవరెవరు ఎంతెంత విరాళం ఇచ్చారంటే..

ప్రస్తుతం వినాయక చవితి పండుగను పురస్కరించుకుని అన్ని చోట్ల గణేష్ మండపాలు రెడీ అవుతున్నాయి. ఈ మండపాలలో మైక్ సెట్స్‌లో మోత మోగే పాటలా.. ‘గజానన’ (Gajanana Song) అంటూ సాగే ఈ పాటని మేకర్స్ రెడీ చేశారు. ఆ వినాయకుడి నామస్మరణే వినిపించేలా ‘గజానన’ అంటూ సాగిన ఈ పాటను మంగ్లీ ఆలపించారు. గణేష్ రాసిన ఈ పాటకు వినోద్ యాజమాన్య ఇచ్చిన బాణీ ఎంతో హుషారుగా అనిపించింది. ఇక ఈ వినాయక చవితి నవరాత్రుల్లో ఈ పాట మార్మోగిపోవడం పక్కా అని చెప్పొచ్చు.

ముఖ్యంగా ఈ ‘గజానన’ పాటలో వరలక్ష్మీ శరత్ కుమార్ వేసిన స్టెప్పులు అందరినీ ఆకట్టుకునేలా ఉన్నాయి. ఈ మధ్య కాలంలో వరలక్ష్మీ కొన్ని కీలక పాత్రలలో మాత్రమే కనిపిస్తోంది. సీరియస్ రోల్స్‌లో నటిస్తోంది. కానీ, చాలా రోజుల తరువాత వరలక్ష్మీ శరత్ కుమార్ ఇంత ఎనర్జీగా డ్యాన్స్ చేస్తూ కనిపించారు. ఈ వీడియో సాంగ్‌ని చూస్తుంటే నిజంగానే ఉత్సవం జరిగినట్టు అనిపిస్తోంది. తెరపై ఈ పాట కచ్చితంగా ఓ పండుగలా ఉండబోతోందని మేకర్స్ చెబుతున్నారు. త్వరలోనే ఈ సినిమాకు సంబంధించిన రిలీజ్ డేట్‌ను ప్రకటించనున్నామని ఈ సందర్భంగా మేకర్స్ తెలియజేశారు.

Read Latest Cinema News