Rajamouli Mahesh film: జనవరి నుంచి మహేష్ బాబు, రాజమౌళి సినిమా స్టార్ట్
ABN, First Publish Date - 2023-10-09T17:50:26+05:30
రాజమౌళి, మహేష్ బాబు కాంబినేషన్ లో సినిమా ఎప్పుడు మొదలవుతుందా అని మహేష్ బాబు అభిమానులు, సినిమా ప్రేమికులు ఎదురు చూస్తున్నారు. ఈ సినిమా జనవరి నుంచి మొదలయ్యే సూచనలు ఉన్నాయని సూచనప్రాయంగా తెలిసింది
అగ్ర దర్శకుడు రాజమౌళి (SSRajamouli) తన తదుపరి సినిమా సూపర్ స్టార్ మహేష్ బాబుతో (MaheshBabu) చేయనున్న సంగతి తెలిసిన విషయమే. ప్రస్తుతం మహేష్ బాబు, దర్శకుడు త్రివిక్రమ్ శ్రీనివాస్ (TrivikramSrinivas) తో 'గుంటూరు కారం' #GunturKaaram షూటింగ్ లో బిజీ గా వున్నాడు. ఈ సినిమా షూటింగ్ నవంబర్ నెల చివరికి పూర్తి చేసేయ్యాలని మహేష్ బాబు చాలా క్లియర్ గా వున్నాడు, అందుకే ఈ సినిమాకి ఇప్పుడు గ్యాప్ లేకుండా షూటింగ్ చేసుకుంటూ వెళుతున్నాడు అని తెలిసింది.
ఇదిలా ఉండగా, మహేష్ బాబు, రాజమౌళి సినిమా ఎప్పుడెప్పుడు మొదలవుతుంది అని సినిమా ప్రేమికులు, మహేష్ అభిమానులు కూడా చాలా ఆసక్తిగా ఎదురుచూస్తున్నారు. ఈ సినిమాకి కెఎల్ నారాయణ (KLNarayana) నిర్మాత. ఆమధ్య ఒక ఫంక్షన్ లో నారాయణ ని కలిసి ఈ సినిమా గురించి అడిగినప్పుడు వచ్చే జనవరి నుండి ఈ సినిమా మొదలవుతుందని చెప్పారు. అంటే జనవరి నుండి మహేష్ బాబు ఇక వేరే సినిమాలకి పని చెయ్యకుండా కేవలం రాజమౌళి సినిమా మీదే దృష్టి పెడతాడని తెలుస్తోంది.
అందుకనే ఇప్పుడు చేస్తున్న 'గుంటూరు కారం' కూడా నవంబర్ చివరి నాటికి మొత్తం షూటింగ్ పూర్తయ్యేట్టు చూసుకుంటున్నారు. డిసెంబర్ లో ఆ సినిమా పోస్ట్ ప్రొడక్షన్ పనులు పూర్తి చేసి సంక్రాంతికి విడుదల చేస్తారు. ఆ తరువాత వెంటనే రాజమౌళి సినిమా మీదే ఉంటాడని, మధ్యలో ఇక వేరే ఎవరితోనూ సినిమాలు చెయ్యడని తెలుస్తోంది. రాజమౌళి సినిమా మొదలయ్యేలోపు అనిల్ రావిపూడి (AnilRavipudi) తో సినిమా ఉంటుంది అనే వార్తలు కూడా వచ్చాయి, కానీ మహేష్ ఇక వేరే సినిమాలు చెయ్యకుండా రాజమౌళి సినిమా మొదలెట్టేస్తాడని తెలిసింది.