Prabhas: 'సలార్' రెండు పార్టులు షూటింగ్ కంప్లీట్ అయిపోయిందని టాక్
ABN, First Publish Date - 2023-12-11T18:04:43+05:30
దర్శకుడు ప్రశాంత్ నీల్ చాలా తెలివిగా 'సాలార్' రెండు పార్టులు షూటింగ్ పూర్తి చేశారని ఒక టాక్ నడుస్తోంది పరిశ్రమలో. మొదటి పార్టులో ప్రభాస్ పాత్ర తక్కువగా ఉంటుందని, షూటింగ్ చేసిన సన్నివేశాలు ఎక్కువగా రెండో పార్టులోనే కనిపిస్తాయని అంటున్నారు. అందువలన రెండో పార్టు కూడా తొందరగానే విడుదల చేయొచ్చు అని ఒక టాక్ నడుస్తోంది.
ప్రభాస్ (Prabhas), శృతి హాసన్ (ShrutiHaasan) జంటగా, ప్రశాంత్ నీల్ (Prashanth Neel) దర్శకత్వంలో వస్తున్న 'సలార్' #SalaarCeaseFireOnDec22 డిసెంబర్ 22 న విడుదలకు సిద్ధం అవుతోంది. అందులో భాగంగా ఈరోజు సెన్సార్ క్లియరెన్స్ సర్టిఫికెట్ వచ్చింది. ఈ సినిమాకి 'ఏ' సర్టిఫికెట్ ఇచ్చారు, అలాగే సినిమా కూడా మూడు గంటలకి ఒక ఐదు నిముషాలు మాత్రమే తక్కువ అంటే 2 గంటల 55 నిముషాలు సినిమా నిడివి వుంది. మలయాళం నటుడు పృథ్విరాజ్ సుకుమారన్ (Prithviraj Sukumaran) ఇందులో విలన్ గా నటిస్తున్నారు, అలాగే శ్రీయ రెడ్డి కూడా ఒక ముఖ్య పాత్ర పోషిస్తున్నారు.
ఇదిలా ఉండగా డిసెంబర్ 22న ఈ సినిమా మొదటి పార్టు 'సాలార్: ది సీజ్ ఫైర్' విడుదలవుతోంది. ఈ సినిమాని రెండు పార్టులుగా విడుదల చేస్తున్నామని ముందే ప్రకటించిన విషయం తెలిసిందే. అయితే ఈ రెండో పార్టు ఎప్పుడు విడుదల అవుతుంది అనేది ఇంకా ప్రకటించాలి వుంది. ఈ సినిమాని హోంబలే ఫిలిమ్స్ బ్యానర్ మీద విజయ్ కిరగండూర్ (Vijay Kiragandur) నిర్మిస్తున్నారు. (Shooting of Salaar two parts completed)
ఇదిలా ఉండగా ఈ సినిమా రెండో పార్టు కూడా షూటింగ్ పూర్తయిపోయింది ఒక టాక్ పరిశ్రమలో వినపడుతోంది. ముందుగా ప్రభాస్ కి ఒక పార్టు అని చెప్పే షూటింగ్ మొదలెట్టినా, తరువాత ఇది రెండు పార్టులుగా విడుదల చేస్తున్నామని చెప్పారు. అయితే అప్పటికే ఈ సినిమా రెండు పార్టులకి సరిపడా షూటింగ్ దర్శకుడు ప్రశాంత్ నీల్ పూర్తి చేశారని, ఇక రెండో పార్టు కోసం ప్రత్యేకంగా ఏమీ చెయ్యాల్సిన పని లేదని ఒక టాక్ నడుస్తోంది. ఈ రెండో పార్టుకు అవసరం అనుకుంటే ఒకటి రెండు పాటలు మాత్రమే షూటింగ్ ఉండొచ్చు అని, లేదా అవి కూడా అవసరం లేకుండా రెండో పార్టు వచ్చే సంవత్సరం విడుదల చెయ్యాలని అనుకుంటున్నట్టుగా టాక్ నడుస్తోంది.
'సాలార్: ది సీజ్ ఫైర్' ట్రైలర్ డిసెంబర్ 1 న విడుదలైంది, అందులో ప్రభాస్ కనిపించేది సుమారు రెండు నిముషాలు అయిన తరువాత మాత్రమే. సినిమాలో కూడా ప్రభాస్ దాదాపు 40 నిముషాల వరకు కనిపించరని, ప్రభాస్ మీద తీసిన సన్నివేశాలు ఎక్కువగా రెండో పార్టు కోసం మాత్రమే దర్శకుడు పెట్టుకున్నారని తెలిసింది. ఈ సినిమాకి ప్రచారాలు కూడా ఇంతవరకు మొదలెట్టలేదు, ప్రభాస్ ఈమధ్యనే ఇటలీ నుండి హైదరాబాదు వచ్చారు కానీ ఈ సినిమా ప్రచారాలకి దూరంగా వున్నారు. బహుశా విడుదలకి వారం వుందనగా మీడియా ముందుకు రావొచ్చు అని కూడా అంటున్నారు. మొదటి పార్టు విడుదలైన తరువాత రెండో పార్టు విడుదల తేదీ కూడా తొందరగానే ప్రకటించే అవకాశం వుంది అని అంటున్నారు.
ఇంకో పక్క అదే తేదీకి విడుదలవుతున్న షా రుఖ్ ఖాన్ (Shah Rukh Khan) సినిమా 'డంకి' #Dunki ప్రచారాలు ఎప్పుడో మొదలెట్టేసారు, చాలా విస్తృతంగా కూడా చేస్తున్నారు. ఇప్పటికే ఆ సినిమా నుంచి పాటలు, ట్రైలర్ ఇంకా చాలా ప్రచార చిత్రాలు విడుదలయ్యాయి. షా రుఖ్ ఖాన్, ఇతర ముఖ్య నటీనటులు, సాంకేతిక నిపుణులు ఆ సినిమా గురించి మాట్లాడుతూనే వున్నారు.