Nandamuri Balakrishna: 'భగవంత్ కేసరి' షూటింగ్ లో బిజీగా వున్న బాలకృష్ణ
ABN, First Publish Date - 2023-09-18T12:59:38+05:30
ఒక పక్క రాజకీయ సమావేశాలు, ఇంకో పక్క తాను చేయాల్సిన సినిమాలు ఇలా రెండిటిమీద దృష్టి పెడుతూ వెళుతున్నారు నందమూరి బాలకృష్ణ. ఇప్పుడు 'భగవంత్ కేసరి' సినిమా షూటింగ్ లో బిజీ గా ఉంటూ ఆ సినిమా పూర్తి చెయ్యాలన్న ఆలోచనలో వున్నట్టుగా తెలిసింది.
నందమూరి బాలకృష్ణ (NandamuriBalakrishna), పవన్ కళ్యాణ్ (PawanKalyan) ఇద్దరూ సినిమాలలో బిజీ గా ఉంటూ, అటు రాజకీయాల్లో కూడా అంతే బిజీ గా వుంటున్నారు. అయితే ఇద్దరూ కొన్ని సినిమాలని ఒప్పుకొని ఆ సినిమాల షూటింగ్స్ కూడా పూర్తి చెయ్యాలని అనుకుంటున్నారు. బాలకృష్ణ 'భగవంత్ కేసరి' #BhagavanthKesari అనే సినిమా షూటింగ్ విరామం లేకుండా చేస్తూ వస్తున్నారు, కానీ అనుకోకుండా అతని బావగారు, తెలుగు దేశం (TDP) అధినేత అయిన చంద్రబాబు నాయుడు (ChandrababuNaidu) అక్రమంగా అరెస్టు కావటంతో షూటింగ్ మధ్యలో ఆపేసి అటువేపుకి వెళ్లాల్సి వచ్చింది.
రాజమండ్రి జైలులో చంద్రబాబునాయుడిని కలిసి, ఆ తరువాత మళ్ళీ పవన్ కళ్యాణ్ తో బయటకి వచ్చి ప్రెస్ మీట్ లో పాల్గొన్నారు. ఇక ఆ తరువాత పార్టీ నాయకులని కలిసి, తన అల్లుడు నారా లోకేష్ (NaraLokesh) కి ధైర్యం చెప్పి మళ్ళీ హైదరాబాద్ వచ్చేసారు. 'భగవంత్ కేసరి' షూటింగ్ లో బిజీ గా వున్నట్టుగా తెలిసింది. అనిల్ రావిపూడి (AnilRavipudi) దీనికి దర్శకుడు, కాజల్ అగర్వాల్ (KajalAggarwal) కథానాయిక, ఇంకొక కథానాయిక శ్రీలీల (Sreeleela) కూడా ఇందులో వుంది, ఆమె బాలకృష్ణ కూతురిగా నటిస్తోంది.
ఈ సినిమా విడుదల తేదీని కూడా అక్టోబర్ 19 అని ప్రకటించేశారు. ఆ తేదీని అందుకోవాలంటే బాలకృష్ణ విరామం లేకుండా షూటింగ్ చెయ్యాల్సిందే. అందుకనే పార్టీ పనుల్లో బిజీ గా వున్నా కూడా ఇక్కడకి వచ్చి షూటింగ్ కూడా ఆగకుండా చేస్తున్నట్టుగా తెలిసింది. ఇంకొన్ని రోజుల్లో ఈ సినిమా షూటింగ్ పూర్తవుతుందని, ఆ తరువాత కొన్ని రోజులు బాలకృష్ణ రాజకీయ పనులకు కేటాయిస్తారని తెలుస్తోంది. ఇదే పరిస్థితి జనసేన పార్టీ అధ్యక్షుడు పవన్ కళ్యాణ్ కి కూడా. అతను 'ఉస్తాద్ భగత్ సింగ్' షూటింగ్ చేస్తున్నట్టుగా తెలిసింది.