Manchu Manoj: పెళ్లి కాదు.. మనోజ్ చేసిన అనౌన్స్‌మెంట్ ఇదే

మంచు మనోజ్ (Manchu Manoj) రెండు రోజుల క్రితం ట్విట్టర్‌లో చేసిన ఓ ట్వీట్‌తో.. ఒక్కసారిగా ట్రెండ్ అయ్యాడు. రెండు రోజుల్లో మీకు ఓ విషయం చెప్పబోతున్నానంటూ ఆయన చేసిన ట్వీట్‌పై రకరకాలుగా..

మంచు మనోజ్ (Manchu Manoj) రెండు రోజుల క్రితం ట్విట్టర్‌లో చేసిన ఓ ట్వీట్‌తో.. ఒక్కసారిగా ట్రెండ్ అయ్యాడు. రెండు రోజుల్లో మీకు ఓ విషయం చెప్పబోతున్నానంటూ ఆయన చేసిన ట్వీట్‌పై రకరకాలుగా వార్తలు వైరల్ అయ్యాయి. ముఖ్యంగా ఆయన రెండో పెళ్లికి సంబంధించిన వార్త ఏదో చెప్పబోతున్నాడనేలా వార్తలు వైరల్ అవుతున్నాయి. ఇక ఆయన చెప్పిన సమయం పూర్తయింది.. ఆయన చెప్పాలనుకున్న విషయం రివీలైంది. అయితే.. అందరూ అనుకున్నట్లుగా పెళ్లి వార్త కాకుండా.. సినిమాకు సంబంధించిన అప్‌డేట్‌ని మంచు మనోజ్ తెలియజేశారు. అయితే ఈ ప్రకటన కూడా అందరికీ మాంచి కిక్ ఇచ్చింది. ఎందుకంటే.. ఆయన చేసిన పోస్ట్, వదిలిన పోస్టర్ చూస్తుంటే.. ఇది సామాన్యమైన సినిమా అయితే కాదనేలా క్లారిటీ వచ్చేసింది. దీంతో మంచు అభిమానులు ఆనందం వ్యక్తం చేస్తూ.. మంచు మనోజ్‌ పేరును ట్రెండ్ చేస్తున్నారు.

ఆరు సంవత్సరాల విరామం తర్వాత మంచు మనోజ్ శుక్రవారం అధికారికంగా ప్రకటించిన కొత్త ప్రాజెక్ట్‌ తో గతంలో కంటే ఎక్కువ ఎనర్జీతో తిరిగి వస్తున్నారనేది తెలుస్తోంది. ‘వాట్ ది ఫిష్’ (WHAT THE FISH) అనే ఆసక్తికరమైన టైటిల్‌తో తెరకెక్కుతున్న ఈ చిత్రానికి వరుణ్ దర్శకత్వంతో పాటు కథ, స్క్రీన్‌ప్లే అందిస్తున్నారు. అనౌన్స్‌మెంట్ పోస్టర్ ప్రపంచ స్థాయి వైబ్‌‌లను కలిగిస్తుంది. పోస్టర్ చిత్రానికి సంబంధించిన ముఖ్య అంశాల అంతర్గత వివరాలను వెల్లడిస్తుంది. ఈ ఆసక్తికరమైన పోస్టర్‌ లో చాలా మంది తెలియని వ్యక్తులను ఎదుర్కోవటానికి మనోజ్ సిద్ధమవుతున్నట్లు కనిపిస్తోంది. గాగుల్ మాస్క్‌‌తో ఉన్న అమ్మాయి క్యారియేచర్ చిత్రాన్ని కూడా చూపిస్తుంది. బ్యాక్ పోజ్‌లో మనోజ్ ఫిట్‌ గా కనిపిస్తున్నాడు. మనోజ్ మేకోవర్ ఈ సినిమాలో అద్భుతంగా ఉండబోతుందనేది ఈ లుక్‌తో తెలిసిపోతుంది. అయితే.. అతని కొత్త గెటప్‌ను చూడటానికి మరికొంత సమయం వేచి చూడక తప్పదు. ఈ సినిమాకి ‘మనం మనం బరంపురం’ అనేది ట్యాగ్ లైన్.

ఈ అనౌన్స్‌మెంట్ సందర్భంగా దర్శకుడు వరుణ్ (Varun) మాట్లాడుతూ.. “మనోజ్ మంచు గారితో సినిమా చేయడం ఒక గౌరవంగా భావిస్తున్నాను. డార్క్ కామెడీ, హై-ఆక్టేన్ థ్రిల్లింగ్ హిలేరియస్ ఫ్యామిలీ ఎంటర్‌టైనర్‌ ‘వాట్ ది ఫిష్’ని అనౌన్స్ చేస్తున్నందుకు మేము సంతోషిస్తున్నాము. భారతీయ సాంస్కృతిక కంటెంట్‌‌ని అంతర్జాతీయంగా చూపించాలనే చిత్తశుద్ధితో ఈ ప్రాజెక్ట్ వచ్చింది” అని తెలిపారు.

‘‘నేను సినిమా చేసి చాలా కాలం అవుతుంది. అయినా మీరు నాపై చూపిస్తున్న ప్రేమలో మాత్రం ఏ మార్పూ లేదు. ఆ ప్రేమను మీకు కూడా తిరిగి ఇచ్చేందుకు టైమ్ వచ్చేసింది. అందరికీ క్రేజీ ఎక్స్‌పీరియన్స్ ఇచ్చేందుకు ‘వాట్ ది ఫిష్’ అనే క్రేజీ చిత్రంతో మీ ముందుకు వస్తున్నాను’’ అని మంచు మనోజ్ ట్వీట్‌లో పేర్కొన్నారు. కాగా, ఈ సినిమా షూటింగ్ అందమైన టొరంటో నగరం, కెనడాలోని వివిధ ప్రదేశాలలో 75 రోజుల పాటు జరగనుందని.. ప్రతిభావంతులైన తెలుగు నటీనటులు, ప్రపంచ ప్రఖ్యాత నటీనటులు, సిబ్బంది ఈ చిత్రం కోసం పని చేస్తున్నారని.. అత్యున్నత నిర్మాణ విలువలు, అత్యుత్తమ సాంకేతిక ప్రమాణాలతో భారీ స్థాయిలో రూపొందనున్న ఈ చిత్రాన్ని.. పాన్-ఇండియా, ప్రపంచవ్యాప్తంగా విడుదల చేస్తామని.. త్వరలోనే పూర్తి వివరాలు తెలియజేస్తామని 6ix సినిమాస్ బ్యానర్‌ మేకర్స్ తెలిపారు. (Manchu Manoj New film Announcement)