Connect: నయన్‌ సినిమాకు సమస్య!
ABN, First Publish Date - 2022-12-19T22:06:02+05:30
నయనతార కీలక పాత్రలో నటించిన చిత్రం ‘కనెక్ట్‌’. అశ్విన్‌ శరవణన్‌ దర్శకుడు. ఈ నెల 22న తెలుగు, తమిళ భాషల్లో విడుదల చేసేందుకు సన్నాహాలు చేస్తున్నారు.
నయనతార (NayanaTara) కీలక పాత్రలో నటించిన చిత్రం ‘కనెక్ట్‌’.(Connect) అశ్విన్‌ శరవణన్‌ (Aswin saravanan)దర్శకుడు. ఈ నెల 22న తెలుగు, తమిళ భాషల్లో విడుదల చేసేందుకు సన్నాహాలు చేస్తున్నారు. తమిళ మీడియా కథనాల ప్రకారం ఈ చిత్రం విడుదలకు ఎదురు దెబ్బ తగిలిందని తెలుస్తోంది. ఇంటర్వెల్‌ లేకుండా ప్రేక్షకుల ముందుకు రానున్న ఈ చిత్రాన్ని విడుదల చేసేందుకు తమిళనాడులోని థియేటర్‌ యజమానులు ఆసక్తి కనబర్చడం లేదని తమిళ మీడియా కథనాలు ప్రచురించాయి. ఇంటర్వెల్‌ సమయంలో అమ్మే చిరు తిళ్లు అమ్మకాల వల్ల ఎంతోకొంత ఆదాయం వస్తుంది. విరామం లేకుండా సినిమా ప్రదర్శిస్తే తమ ఆదాయానికి గండిపడుతోందని థియేటర్‌ యజమానులు భావిస్తున్నారని తెలిసింది. ఈ విషయం గురించే చిత్ర నిర్మాతలతో చర్చిస్తున్నారని తమిళ మీడియా కోడైకూస్తుంది. ‘మాయ’ తర్వాత అశ్విన్‌–నయనతార కాంబినేషన్‌లో వస్తోన్న చిత్రమిది. లాక్‌డౌన్‌ సమయంలో ఇంటికే పరిమితమైన ఓ కుటుంబంలో ఓ అమ్మాయి చేసిన పని వల్ల ఆ కుటుంబం ఎలాంటి ఇబ్బందులు ఎదుర్కొందనే ఇతివృత్తంతో రూపొందిన చిత్రమిది. 90 నిమిషాల నిడివితో ఈ చిత్రం తెరకెక్కింది. ఈ చిత్రానికి ఇంటర్వెల్‌ ఉండదని దర్శకుడు తెలిపిన సంగతి తెలిసిందే! విఘ్నేశ్‌ శివన్‌ నిర్మించిన ఈ చిత్రాన్ని తెలుగులో యూవీ క్రియేషన్స్‌ సంస్థ విడుదల చేస్తుంది.