కపిల్కు నా కంటే పెద్ద ఇల్లుంది: అక్షయ్
ABN, First Publish Date - 2020-10-30T17:30:20+05:30
అక్షయ్ కుమార్.. బాలీవుడ్లో బడా హీరో.
అక్షయ్ కుమార్.. బాలీవుడ్లో బడా హీరో. విరామం లేకుండా వరుస సినిమాల్లో నటిస్తూ, అత్యధిక పారితోషికం అందుకుంటూ భారీ సంపాదన ఆర్జిస్తున్న కథానాయకుడు. అయితే అక్షయ్ కంటే టీవీ హోస్ట్ కపిల్ శర్మ మరింత ఎక్కువ సంపాదిస్తున్నాడట. ఈ విషయాన్ని తాజాగా అక్షయ్ వెల్లడించాడు. తమ కొత్త సినిమా `లక్ష్మి` ప్రమోషన్ కోసం తాజాగా `ది కపిల్ శర్మ కామెడీ షో`కు అక్షయ్, కియార హాజరయ్యారు.
అక్షయ్ సంవత్సరంలోని 365 రోజులూ అత్యంత బిజీగా ఉండే హీరో అని, తను బ్రాండ్ అంబాసిడర్గా ఉన్న ఓ ప్రోడక్ట్ను కూడా ఇటీవల అక్షయ్ లాగేసుకున్నాడని కపిల్ పేర్కొన్నాడు. దీనికి స్పందించిన అక్షయ్.. `కపిల్ గతంలో ఎండార్స్ చేసిన ఓ బ్రాండ్ ఇప్పుడు నా చేతికి వచ్చింది. ఏదేమైనా ఈ షో ద్వారా కపిల్ సంపాదిస్తున్నంతగా వేరెవరూ సంపాదించలేరు. గతంలో ఒక రోజు కపిల్ ఇంటికి వెళ్లా. ఆ ఇంటిని చూసి ఆశ్చర్యపోయా. నా ఇల్లు కూడా అంత పెద్దగా లేద`ని అక్షయ్ వ్యాఖ్యానించాడు.