సూర్య, జ్యోతిక‌లపై ఎఫ్‌ఐఆర్ నమోదు చేయాలని కోర్టు ఆదేశాలు

కోలీవుడ్ స్టార్ సూర్య హీరోగా నటించిన సినిమా ‘జై భీమ్’. టీజే. జ్ఞానవేల్ దర్శకత్వం వహించారు. వాస్తవ సంఘటనల ఆధారంగా కోర్టు డ్రామాగా ఈ చిత్రాన్ని రూపొందించారు. గతేడాది నవంబర్‌లో అమెజాన్ ప్రైమ్‌లో విడుదలైన ఈ మూవీ అభిమానుల మన్ననలు పొందడంతో పాటు విమర్శకుల ప్రశంసలు దక్కించుకుంది. సూర్య, జ్యోతిక కలసి తమ సొంత నిర్మాణసంస్థపై ఈ చిత్రాన్ని నిర్మించారు. ‘జై భీమ్’ చిత్రంలోని క్యాలెండర్ సీన్‌పై గతంలోనే వివాదం చెలరేగిన సంగతి తెలిసిందే. 

వన్నియార్ కమ్యూనిటీని కించపరిచేలా క్యాలెండర్ సీన్ ఉందని ఆ సంఘం నేతలు గతేడాది నవంబర్‌లో కోర్టులో పిటిషన్ దాఖలు చేశారు. ఆ సీన్‌ను తొలగించాలని కోరారు. ఆ పిటిషన్‌ను సైదాపేట కోర్టు విచారణ జరిపింది. హీరో సూర్య, అతడి భార్య జ్యోతిక, దర్శకుడు టీజే.జ్ఞానవేల్‌పై ఎఫ్‌ఐఆర్‌ను నమోదు చేయాలని చెన్నై పోలీసులను ఆదేశించింది. కేసును దర్యాప్తు చేయాలని పేర్కొంది. తదుపరి విచారణను మే 20కు వాయిదా వేసింది. సినిమా విడుదలైప్పుడే ఆ సీన్‌పై అభ్యంతరం వ్యక్తం చేస్తూ వన్నియార్ సంఘం సూర్య, టీజే. జ్ఞానవేల్, అమెజాన్ ప్రైమ్‌కు లీగల్ నోటీసులు పంపించింది. రూ. 5కోట్ల నష్టపరిహారం చెల్లించాలని కోరింది.