కాపీరైట్ వివాదంలో JugJugg Jeeyo.. విడుదలకు ముందే తమకు చూపించాలంటున్న రాంచీ కోర్టు..

బాలీవుడ్‌లో అనేక సినిమాలకు దర్శకుడు, నిర్మాతగా వ్యవహరించి ఫేమ్ సంపాదించుకున్న వ్యక్తి కరణ్ జోహార్ (Karan Johar). ధర్మ ప్రొడక్షన్స్ (Dharma Productions) అనే సొంత నిర్మాణ సంస్థ ఉంది. ఈ ప్రొడక్షన్ హౌస్‌పై ఆయన తాజాగా నిర్మించిన సినిమా ‘జుగ్‌జుగ్ జీయో’ (Jugjugg Jeeyo). వరుణ్ ధావన్ (Varun Dhawan), కియారా అడ్వాణీ (Kiara Advani) హీరో, హీరోయిన్‌లుగా నటించారు. ఈ చిత్రం జూన్ 24న విడుదల కానుంది. విడుదల తేదీ దగ్గరపడుతున్న తరుణంలో కరణ్ జోహార్‌కు షాక్ తగిలింది. తాను పంపించిన పాయింట్స్‌ని కాపీ కొట్టి ‘జుగ్‌జుగ్ జీయో’ ని నిర్మించారని ఓ వ్యక్తి ఆరోపించారు. అందుకు సంబంధించిన స్ర్రీన్ షాట్స్‌ను సోషల్ మీడియా వేదికగా షేర్ చేశారు. వివరాల్లోకి వెళ్లితే..

రాంచీకి చెందిన రైటర్ విశాల్ సింగ్ (Vishal Singh). ‘బన్నీ రాణీ’ అనే టైటిల్‌తో కొన్ని పాయింట్స్‌ను ధర్మ ప్రొడక్షన్స్‌కు పంపించారు. ఆ సంస్థ నుంచి రిప్లై కూడా వచ్చింది. కానీ, ఆ పాయింట్స్‌ను సినిమాగా మారుస్తున్నట్టు ధర్మ ప్రొడక్షన్స్ పేర్కొనలేదు. తాజాగా ట్రైలర్‌ను చూడగా తన స్క్రిఫ్ట్‌‌లోని పాయింట్స్ ఆధారంగానే ‘జుగ్‌జుగ్ జీయో’ ను రూపొందించినట్టు ఆయనకు తెలిసింది. దీంతో రాంచీ కోర్టులో ఆయన దావా వేశారు. ఈ పిటిషన్‌ను స్వీకరించిన రాంచీ కమర్షియల్ కోర్టు సినిమా విడుదలకు ముందే తమకు చూపించాలని ఉత్తర్వులు జారీ చేసింది. స్క్రీనింగ్ అనంతరం ఇరువైపులా వారి వాదనలు వింటామని పేర్కొంది. కాపీ రైట్ ఉల్లంఘన జరిగిందో, లేదో తేల్చుతామని వెల్లడించింది. ఈ వివాదంపై కరణ్ జోహార్ నిర్మాణ సంస్థ ఇప్పటి వరకు అధికారికంగా స్పందించలేదు. ‘జుగ్‌జుగ్ జీయో’ లో  నీతూ కపూర్, అనిల్ కపూర్ కీలక పాత్రలు పోషించారు. రాజ్ మెహతా దర్శకత్వం వహించారు. రొమాంటిక్ ఫ్యామిలీ ఎంటర్ టైనర్‌గా ఈ చిత్రం రూపొందింది.