పాన్ ఇండియా మూవీగా ‘ఆకాశ‌వాణి విశాఖప‌ట్టణ కేంద్రం’.. పాట విడుదల

శివకుమార్ (Shivakumar), హుమయ్ చంద్ (Humai Chand), అక్షత శ్రీధర్ (Akshatha Sreedhar), అర్చన (Archana)  హీరోహీరోయిన్లుగా మిథున ఎంట‌ర్‌టైన్‌మెంట్స్ ప్రై.లి. స‌మ‌ర్పణ‌లో సైన్స్‌ స్టూడియోస్ ప్రొడ‌క్షన్స్‌ బ్యాన‌ర్‌పై రూపొందుతున్న చిత్రం ‘ఆకాశ‌వాణి విశాఖప‌ట్టణ కేంద్రం’ (Akashvani Visakhapatnam Kendram). జ‌బ‌ర్దస్త్ ఫేం స‌తీష్ బ‌త్తుల (Sathish Battula) ఈ చిత్రంతో దర్శకుడిగా ప‌రిచయం అవుతున్నారు. ఎం.ఎం. అర్జున్‌ (M.M. Arjun) నిర్మాత‌. థ్రిల్లింగ్ ల‌వ్ ఎంట‌ర్‌టైన‌ర్‌గా తెర‌కెక్కుతోన్న ఈ చిత్రాన్ని తెలుగు, త‌మిళ‌, క‌న్నడ‌, మ‌ల‌యాళ, హిందీ భాష‌ల్లో పాన్ ఇండియా మూవీగా విడుద‌ల చేస్తున్నారు. కార్తీక్ కొడ‌కండ్ల సంగీతం అందించిన ఈ సినిమా నుంచి తొలి పాట‌ను చిత్ర యూనిట్ శుక్రవారం విడుద‌ల చేసింది. 

ఈ సంద‌ర్భంగా నిర్మాత ఎం.ఎం.అర్జున్ మాట్లాడుతూ.. ‘‘సతీష్‌ చెప్పిన కథ ఎంతగానో నచ్చింది. ఆయ‌న సినిమాను నెరేట్ చేసిన దాని కంటే చ‌క్కగా సినిమాని తెర‌కెక్కించారు. ఓ మంచి సినిమాను రూపొందించ‌డంలో నిర్మాత‌గా నా వంతు బాధ్యత‌ను స‌మ‌ర్ధవంతంగా నిర్వర్తించానని అనుకుంటున్నాను. హీరోహీరోయిన్లు శివ కుమార్, హుమయ్ చంద్, అక్షత శ్రీధర్, అర్చన చ‌క్కగా న‌టించారు. యూనివర్సల్ పాయింట్ కావటంతో సినిమాను పాన్ ఇండియా మూవీగా తెలుగు, త‌మిళ‌, క‌న్నడ‌, మ‌ల‌యాళ‌, హిందీ భాష‌ల్లో విడుద‌ల చేయాలని నిర్ణయించుకున్నాం. కార్తీక్ కొడ‌కండ్ల సంగీతం అందించిన ఈ సినిమా నుంచి తొలి పాట‌ను విడుద‌ల చేస్తున్నాం. త్వర‌లోనే చిత్ర విడుదలకు సంబంధించిన వివరాలను తెలియజేస్తాం..’’ అని అన్నారు.

దర్శకుడు సతీష్ బత్తుల మాట్లాడుతూ.. ‘ఆకాశ‌వాణి విశాఖ‌ప‌ట్టణ కేంద్రం’ చిత్రం డిఫ‌రెంట్ ల‌వ్ ఎంట‌ర్‌టైన‌ర్‌. థ్రిల్లింగ్‌గా అనిపిస్తుంది. నిర్మాత స‌పోర్ట్ లేక‌పోతే ఇంత దూరం రాగ‌లిగే వాళ్లం కాదు. మేకింగ్‌లో ఆయన ఎక్కడా కాంప్రమైజ్ కాలేదు. పాన్ ఇండియా మూవీగా సినిమా రిలీజ్‌కి సన్నద్ధమవుతుంది. మంచి నటీనటులు, సాంకేతిక నిపుణులు ఈ చిత్రానికి కుదిరారు. సినిమా చాలా బాగా వ‌చ్చింది. తప్పకుండా పాన్ ఇండియా స్థాయిలో ప్రేక్షకులని మెప్పిస్తుందని ఆశిస్తున్నానని అన్నారు.