ఆ నింద మోయాల్సిందే : కీర్తి సురేశ్‌

సినిమా ఇండస్ట్రీలో స్టార్‌గా ఎదిగిన ప్రతి కథానాయిక మొదట ‘ఐరెన్‌ లెగ్‌’ అనే నింద మోయాల్సిందే. తొలి చిత్రంతో సక్సెస్‌ అందుకున్న కొద్ది మంది కథానాయికలకు మాత్రమే ఆ నింద తప్పుతుంది. టాలీవుడ్‌లో స్టార్లుగా వెలుగుతున్న చాలామంది దానిని దాటుకుని వచ్చిన వారే! ఇదే విషయంపై తాజాగా కీర్తి సురేశ్‌ స్పందించారు. ‘‘ఓ కొత్త కథానాయిక తెరపై కనిపించింది అంటే.. తొలి ఫలితాన్ని బట్టి ఓ ముద్ర పడుతుంది. సినిమా సక్సెస్‌ అయితే అంతా బాగానే ఉంటుంది. పొరపాటున మొదటి సినిమా ఫెయిల్‌ అయిందంటే.. సక్సెస్‌ చూసే వరకూ నిందలు మోయాల్సిందే! ఐరన్‌లెగ్‌ అనే ముద్ర వేసుకు తిరగాల్సిందే! అందుకు నేనేమీ మినహాయింపు కాదు. నేనూ ఆ నిందలు మోశాను. ఓ మలయాళ చిత్రంతో నటిగా నా కెరీర్‌ మొదలైంది. ఆ సినిమా ప్రారంభంలోనే ఆగిపోయింది. తెలుగులోనూ నా మొదటి చిత్రం విడుదల కాలేదు. దానితో నాకు ఐరన్‌లెగ్‌ అనే ట్యాగ్‌ ఇచ్చారు. ఆ అమ్మాయిని హీరోయిన్‌గా తీసుకుంటే సినిమాలు ఆగిపోతున్నాయ్‌ అని ప్రచారం చేశారు. ఆ మాటలు విని కాస్త బాధపడినా ధైర్యంగా ముందుకెళ్లా. నా కష్టమే సక్సెస్‌ రూపంలో సమాధానం చెప్పింది. ఇప్పుడు ఆ విమర్శన్నీ కనుమరుగైపోయాయి’’ అని కీర్తి సురేశ్‌ అన్నారు. తాజాగా ‘గుడ్‌ లక్‌ సఖి’తో ప్రేక్షకులను అలరించిన ఆమె చిరంజీవి ‘భోళా శంకర్‌’, మహేశ్‌ ‘సర్కారువారి పాట’ చిత్రాల్లో నటిస్తున్నారు.