Vishwak Sen: ప్రతిసారి తగ్గను.. మరోసారి విష్వక్‌సేన్‌ ట్వీట్‌

‘లైలా’ (Laila) ప్రీరిలీజ్‌ వేడుకలో నటుడు పృథ్వీ (Pruthvi Raj) చేసిన రాజకీయ వ్యాఖ్యలు సోషల్‌ మీడియాలో వైరలై చర్చనీయాశంమైన సంగతి తెలిసిందే. దీనిపై విష్వక్‌సేన్‌, చిత్ర నిర్మాత సాహు గారపాటి స్పందించి అలా జరిగినందుకు క్షమాపణ చెప్పారు. అయినా ‘లైలా’కు వ్యతిరేకంగా ఎక్స్‌ వేదికగా పోస్ట్‌లు పెడుతూనే ఉన్నారు. తాజాగా దీనిపై విష్వక్‌ సేన్‌ మరోసారి స్పందించారు. తనను, తన సినిమాను రాజకీయాల్లోకి లాగొద్దంటూ ట్వీట్‌లో పేర్కొన్నారు. బుధవారం విడుదల కానున్న ఈ సినిమా పాట పోస్టర్‌లను విష్వక్‌సేన్‌ (Vishwak sen) షేర్‌ చేశారు. ‘‘నా సినిమాకు సంబంధించిన ప్రతి పోస్టర్‌.. నా సినిమాకు సంబంధించింది మాత్రమే. సినిమాల పోస్టర్స్‌, పోస్ట్‌లను షేర్‌ చేేస ప్రతిసారీ రెండుసార్లు ఆలోచించలేను. ఈ ఫొటోలో ఉంది సోనూ మోడల్‌.. ఫిబ్రవరి 14న మీ ముందుకు వస్తున్నాడు’’ అని అన్నారు.

ఎక్స్‌లో ట్రెండ్‌ అవుతోన్న బాయ్‌కాట్‌ లైలా(Boycottlaila) హ్యాష్‌ట్యాగ్‌ గురించి మాట్లాడుతూ.. ‘‘ నేను ప్రతిసారీ తగ్గను. ప్రీరిలీజ్‌ ఈవెంట్‌లో జరిగిన దానికి నిన్న మనస్ఫూర్తిగా క్షమాపణలు చెప్పాను. అతిగా ఆలోచించొద్దు. ప్రశాంతంగా ఉండండి. మళ్లీ చెబుతున్నాను.. నేను నటుడిని మాత్రమే. నన్ను, నా సినిమాను రాజకీయాల్లోకి లాగొద్దు’’ అని విష్వక్‌ సేన్‌ అన్నారు.