Sarangapani Jathakam: తెలుగు వారు నటించిన పరిపూర్ణమైన తెలుగు సినిమా

ప్రియదర్శి(PriyaDarshi), రూప కొడువాయూర్ (Roopa kodavayur) జంటగా మోహనకృష్ణ ఇంద్రగంటి (Mohan krishna Indraganti) దర్శకత్వంలో శ్రీదేవి మూవీస్ పతాకంపై శివలెంక కృష్ణప్రసాద్ నిర్మించిన ‘సారంగపాణి జాతకం’ (Sarangapani Jathakam) సినిమా ఏప్రిల్ 18న విడుదలవుతోంది. ఈ నేపథ్యంలో ఈ సినిమా ప్రీ రిలీజ్ వేడుక హైదరాబాద్‌లో జరిగింది. ప్రియదర్శి మాట్లాడుతూ, ‘‘నేను ప్రామిస్ చేసి చెబుతున్నాను. ఇది ఒక గ్రేట్ మూవీ. అందరినీ నవ్వించే సినిమా. ఏప్రిల్ 18 నుంచి తెలుగు ప్రేక్షకులకు సంపూర్ణ వినోదం అందబోతోంది. ఈ మూవీ టీమ్ బ్రిలియంట్ టీమ్.. ఇది నా డ్రీమ్ టీమ్.. ఇంద్రగంటి దర్శకత్వంలో నటించాలన్న నా కల ‘సారంగపాణి జాతకం’ సినిమాతో తీరింది. ఫేవరెట్ టీచర్‌ దగ్గర చదువుకోవడం లాంటిది ఆయనతో పనిచేయడం. నిర్మాత శివలెంక కృష్ణప్రసాద్ గారికి ధన్యవాదాలు. ఆయనా ఒక పాజిటవ్ ఫోర్స్. మా యూనిట్ అందరి జాతకాలు చాలా బాగున్నాయి. మేం చక్కని విజయాన్ని అందుకోబోతున్నాం’’ అన్నారు.  

 

నిర్మాత శివలెంక కృష్ణప్రసాద్ మాట్లాడుతూ ‘‘నా సెకండ్ ఇన్నింగ్స్ ప్రారంభమైంది ఇంద్రగంటి మోహనకృష్ణ మూవీ నాని జెంటిల్‌మన్, దాని తర్వాత చక్కని ప్రేమకథతో, సుధీర్‌బాబుతో సమ్మోహనం. ఈ రెండూ కూడా మంచి పేరు, సక్సెస్ తెచ్చాయి. ఇప్పుడు ఆ విజయాలను ‘సారంగపాణి జాతకం’ కొనసాగిస్తుంది. జంధ్యాల గారితో ‘చిన్నోడు-పెద్దోడు’ సినిమా రాయించుకున్నాను.. ‘ఆదిత్య 369’ సినిమా రాయించుకున్నాను. జంధ్యాల గారితో ఒక కామెడీ సినిమా తీయాలని అనుకున్నాను. కానీ కుదరలేదు. మంచి కామెడీ సినిమా తీయాలన్న కోరిక ‘సారంగపాణి జాతకం’తో తీరింది. ఈ సినిమాని రెండు నెలల ముందే విడుదల చేయాలని అనుకున్నప్పటికీ, హర్రీగా విడుదల చేయడం, పుష్ప్ర-2 స్వింగ్‌లో విడుదల చేయడం మంచిది కాదు.. ఇది సమ్మర్‌లో కుటుంబ సమేతంగా చూడాల్సిన సినిమా అనే ఉద్దేశంతో ఏప్రిల్ 18 విడుదల చేస్తున్నాను. ఫ్యామిలీ మొత్తం సినిమా చూడాలంటే సమ్మరే కరెక్టని భావించాను. ఇది జాతకాల మీద తీసిన సినిమా. నేను భగవంతుణ్ణి, జాతకాలని నమ్ముతాను. ఎందుకు నమ్ముతానంటే, ఒక బ్యాడ్ పిరియడ్ ఉన్నప్పుడు ఇన్నాళ్ళు నాకు బ్యాడ్ పిరియడ్ తప్పదు అని కొంతమంది చెప్పారు. నా పరిస్థితి ఏమిటని అడిగితే,  2015 నుంచి నీ జీవితం అద్భుతంగా వుంటుందని చెప్పారు. అందుకే ఒక ‘జంటిల్‌మన్’ వచ్చింది. ఒక ‘సమ్మోహనం’ వచ్చింది. ఒక ‘యశోద’ వచ్చింది.. యశోద  ఒక కాంట్రవర్షియల్ పాయింట్‌తో తీసింది. చాలామంది వద్దు అని  నిరుత్సాహపరిచారు. అయినా సమంతతో విజయం అందుకున్నాను. ‘సారంగపాణి  జాతకం’ కథ విన్న తర్వాత ‘అద్భుతం.. మనం హిట్ కొడుతున్నాం’ అన్నాను. నమ్మకంతో ఈ సినిమాని నిర్మించాను. సినిమా విడుదల రెండు నెలలు ఆగింది. ఎందుకు ఆగింది... అది ఈశ్వరేచ్ఛ.. ఏప్రిల్ 18 తర్వాత నేను అందరి చేత అభినందనలు అందుకుంటానన్న నమ్మకం నాకు వుంది. దాదాపు 40 సంవత్సరాలుగా పరిశ్రమలో వున్న నాకు వున్న నమ్మకం ఇది. నాకు పేరుతోపాటు డబ్బు కూడా వస్తుంది. కేవలం జాతకాలను మాత్రమే నమ్మకూడదు.. మనం చేయాల్సింది మనం చేయాలి అని చెప్పే సినిమా ఇది. ఇలాంటి సినిమా చేసినందుకు నేను చాలా గర్వపడుతున్నాను.
 

ఇంద్రగంటి మోహనకృష్ణ మాట్లాడుతూ ‘‘ఈ సంస్థలో ఇది నాకు మూడో సినిమా.  శివలెంక కృష్ణప్రసాద్ గారికి నాపై నమ్మకం. ‘సారంగపాణి జాతకం’ సకుటుంబ సపరివార సమేతంగా మాత్రమే కాకుండా పరకుటుంబ సమేతంగా కూడా చూడదగ్గ చక్కని హాస్యభరిత సినిమా. ప్రియదర్శితో కలసి పనిచేయడం చాలా సంతోషాన్ని కలిగిస్తోంది. ఆయన మంచి కథలను ఎంపిక చేసుకుని సినిమాలు చేస్తున్నారు. తాజాగా ఆయన సినిమా ‘కోర్ట్’ చక్కని విజయం సాధించింది. మాకు ఎప్పటి నుంచో పరిచయం వుంది. ఈ సినిమాతో మా ఇద్దరి కాంబినేషన్ కుదిరింది. ప్రియదర్శి తప్ప ఈ సినిమా ఆయనకు టైలర్‌మేడ్‌లా వుంటుంది. తెలుగమ్మాయి రూప కొడువాయూర్ చాలా బాగా చక్కగా నటించింది. ఈ సినిమాలో నాన్ తెలుగు యాక్టర్లు ఎవరూ లేరు. అందరూ తెలుగువారు నటించిన పరిపూర్ణమైన తెలుగు సినిమా ఇది. అందరూ ఎవరి డబ్బింగ్ వాళ్ళే చెప్పుకున్నారు. సమ్మర్లో విడుదల చేయడం అనేది కృష్ణప్రసాద్ గారు తీసుకున్న సరైన నిర్ణయం. అన్ని వయసుల వారికి వినోదాన్ని అందించే ఆరోగ్యకరమైన హాస్యభరిత సినిమా ఇది. ఈ సినిమా చూసేటప్పుడు తల్లిదండ్రులు తమ పిల్లల కళ్ళకు, చెవులకు చేతులు అడ్డు పెట్టాల్సిన అవసరం లేదు’’ అన్నారు.

రూప కొడువాయూర్ మాట్లాడుతూ ‘‘నాకు జాతకాల మీద నమ్మకం వుండేది కాదు. నేను గతంలో ఒక ఇంటర్వ్యూ ఇచ్చినప్పుడు, నా ఫేవరెట్ డైరెక్టర్ మోహనకృష్ణ ఇంద్రగంటి అని చెప్పాను. ఊహించని విధంగా ఆయన సినిమాలో నటించే ఆఫర్ రావడం నాకు చాలా సంతోషాన్ని కలిగించింది. ఈ సినిమాలో ఒక మంచి పాత్ర ధరించే అవకాశం లభించింది. ఒక చక్కని అవగాహన వున్న నిర్మాత శివలెంక కృష్ణప్రసాద్ గారు. ఆయన సినిమాలో నటించే అవకాశం రావడం చాలా సంతోషకరం. ఈ సినిమా ఘన విజయం సాధిస్తుందన్న నమ్మకం వుంది’’ అన్నారు.