SSMB29: చరణ్‌ చెప్పింది నిజమైతే.. సూపర్‌స్టార్‌ ఫ్యాన్స్‌కి పండగే...
ABN , Publish Date - Jan 03 , 2025 | 11:55 AM
రాజమౌళితో సినిమా అంటే ఎంత పెద్ద స్టార్‌ అయినా సై అనాల్సిందే. ఆ కాంబినేషన్‌ ఫ్యాన్స్‌కు పండగ. అయితే హీరో మాత్రం మినిమం మూడేళ్లు మరో పని లేకుండా లాక్‌ అయిపోవాల్సిందే. జక్కన్నతో సినిమా అంటే మరో మూడేళ్లు అభిమాన హీరో తెరపై కనిపించడనే భయం అభిమానులకు ఉంటుంది.
రాజమౌళితో (SS Rajamouli) సినిమా అంటే ఎంత పెద్ద స్టార్‌ అయినా సై అనాల్సిందే. ఆ కాంబినేషన్‌ ఫ్యాన్స్‌కు పండగ. అయితే హీరో మాత్రం మినిమం మూడేళ్లు మరో పని లేకుండా లాక్‌ అయిపోవాల్సిందే. జక్కన్నతో సినిమా అంటే మరో మూడేళ్లు అభిమాన హీరో తెరపై కనిపించడనే భయం అభిమానులకు ఉంటుంది. రాజమౌళితో సినిమా ఫిక్సయితే, మినిమం మూడు నాలుగేళ్లు ఆ సినిమాకే అంకితం అయిపోవాలి. పండగలకు, ఇతర సెలబ్రేషన్‌లకు ఫస్ట్‌ లుక్‌, టీజర్‌, గ్లింప్స్‌ అంటూ ఏ హడావిడి ఉండదు. హీరోలు కూడా జక్కన్కన కండీషన్స్‌కు రెడీ అయిపోతారు. ప్రస్తుతం మహేష్‌ బాబు రాజమౌళితో ఓ సినిమా చేస్తున్నాడు. ఇది సూపర్‌స్టార్‌ ఫ్యాన్స్‌ అందరికీ సంబరమే. ఇప్పుడు మూడేళ్లు మహేశ్‌ (Mahesh Babu) జక్కన్న కాంపౌండ్‌లో లాక్‌ అయిపోయాడనే భయం వాళ్లలో ఉంటుంది. అయితే తాజాగా రామ్‌ చరణ్‌ మాటలు మహేష్‌ అభిమానుల చెవుల్లో అమృతం నింపినట్లయింది. ‘అన్నీ అనుకొన్నట్టు కుదిరితే.. (SSMB29) ఏడాదిన్నరలో మహేష్‌ సినిమా వచ్చేస్తుంది’ అంటూ ‘గేమ్‌ ఛేంజర్‌’ ట్రైటర్‌ ఈవెంట్‌లో రామ్‌చరణ్‌ చెప్పారు. తను తెలిసి చెప్పాడో, తెలియక చెప్పాడో తెలీదు కానీ, ‘చరణ్‌ మాటలు నిజమైతే సూపర్‌గా ఉంటుంది’ అని ఫ్యాన్స్‌ దేవుళ్లను మొక్కేస్తున్నారు. అయితే చరణ్‌ మాటలను అంత లైట్‌ తీసుకోవలసిన పని లేదు. రాజమౌళి ప్లానింగ్‌ గురించి చరణ్‌కు బాగా తెలుసు. ‘బాహుబలి’, ‘ఆర్‌.ఆర్‌.ఆర్‌’ సినిమాల్లాగా మహేష్‌ సినిమా లేట్‌ కాకపోవొచ్చన్నది ఇన్‌ సైడ్‌ వర్గాల మాట.
ఈసారి రాజమౌళి ప్రీ ప్రొడక్షన్‌కి చాలా టైమ్‌ తీసుకున్నారు. ప్రొడక్షన్‌ మాత్రం చక చక పూర్తి చేయాలన్నది ఆయన ప్లాన్‌. నిజానికి లాక్‌ డౌన్‌ లేకపోతే ‘ఆర్‌.ఆర్‌.ఆర్‌’ కూడా చాలా త్వరగా పూర్తయ్యేది. కరోనా వల్ల ఆ సినిమా లేటయింది. 2026 చివర్లో మహేష్‌ ఎస్‌ఎస్‌ఎంబీ29 చిత్రాన్ని విడుదల చేయాలన్నది రాజమౌళి ప్లాన్‌. అయితే ఈ విషయాన్ని ఆయన బయటకు చెప్పడం లేదు. ఎందుకంటే ఓ రిలీజ్‌ డేట్‌ చెప్పడం, అది చేయి జారిపోవడం, మరో రిలీజ్‌ డేట్‌ ప్రకటించడం.. ఇలా కన్‌ఫ్యూజన్‌ సృష్టించడం జక్కన్నకు ఇష్టం లేదు. ‘ఆర్‌.ఆర్‌.ఆర్‌’కు రిలీజ్‌ డేట్లు చాలా మారాయి. ఈ సారి అలా కాకుండా ఉండాలనుకుంటున్నారు జక్కన్న. అంతే కాదు వీలైనంత లో ప్రొఫైల్‌గా ఉండాలని భావిస్తున్నారు. అందుకే ఎక్కడా ఈ సినిమా గురించి మాట్లాడటం లేదు.రాజమౌళి ఏ సినిమా మొదలుపెట్టినా ప్రెస్‌ మీట్‌ పెట్టి కథేంటో చెప్పడం అలవాటు. ఈ సారీ అదీ లేదు. ఎందుకంటే ఇప్పటికే సినిమా ప్రారంభానికి కొబ్బరికాయ కొట్టేశారు. రెగ్యులర్‌ షూటింగ్‌ మొదలెట్టే పనుల్లో ఉన్నారు.