‘తండేల్‌’ (Thandel) 0సినిమా విడుదలైన కొన్ని గంటల్లోనే పైరసీ బారిన పడింది. రెండో రోజున ఏపీఎస్‌ ఆర్టీసీ బస్సులో (Apsrtc) దీన్ని ప్రదర్శించడం చర్చనీయాంశమైంది. దీనిపై నిర్మాత బన్నీ వాసు స్పందించారు. ఈ ఘటనకు పాల్పడిన వారిపై చర్యలు తీసుకోవాలని ఆ సంస్థ ఛైౖర్మన్‌కు విజ్ఞప్తి చేశారు. దీంతో ఏపీఎస్‌ఆర్టీసీ ఛైర్మన్‌ కొనకళ్ల నారాయణరావు తాజాగా దీనిపై విచారణకు ఆదేశించారు. ఈ ఘటనపై ఎంక్వైరీ చేసి పూర్తి వివరాలు సమర్పించాలని ఉత్తర్వుల్లో పేర్కొన్నారు. (Thandel Piracy copy)

‘తండేల్‌’ పైరసీ సినీ ఇండస్ట్రీలో తీవ్ర చర్చనీయాంశమైంది. దీని గురించి ఆ సినిమా నిర్మాతలు అల్లు అరవింద్‌ (Allu Aravind), బన్నివాసు (bunny vasu) ప్రెస్‌మీట్‌ నిర్వహించారు. పైరసీని ప్రోత్సహిస్తోన్న వారిపై మండిపడ్డారు. ఏపీఎస్‌ఆర్టీసీ బస్సుల్లో ఆ పైరసీ ప్రింట్‌ ప్రదర్శించడం దారుణమని.. చిత్ర విజయాన్ని ఆస్వాదించే సమయంలో ఇదొక ప్రతిబంధకం అయిందని ఆవేదన వ్యక్తం చేశారు. కొందరు తెలిసి, మరికొందరు తెలియక ఇలా సినిమాల్ని పైరసీ చేస్తున్నారని.. వాట్సప్‌, టెలిగ్రామ్‌ గ్రూప్స్‌లో ఆ లింక్స్‌ను ఫార్వర్డ్‌ చేస్తున్నారని అన్నారు. దాన్ని ప్రోత్సహిస్తున్న వారిని గుర్తించి కేసులు పెడుతున్నామని.. వాళ్లంతా జైలుకు వెళ్లడం ఖాయమని హెచ్చరించారు.

నాగచైతన్య, సాయి పల్లవి జంటగా చందూ మొండేటి దర్శకత్వం వహించిన ఈ చిత్రం గత శుక్రవారం ప్రేక్షకుల ముందుకొచ్చి పాజిటివ్‌ టాక్‌ తెచ్చుకుంది. రాజు, సత్య పాత్రల్లో చైతన్య, సాయి పల్లవి ఇమిడిపోయారు. తమ నటనతో ప్రేక్షకులను ఫిదా చేశారు. 

ALSO READ: Victory Veduka: ఊహకు మించి చేరువ..  2027లో మళ్లీ సంక్రాంతికి వస్తాం

మరిన్ని సినిమా వార్తల కోసం క్లిక్ చేయండి