Toxic Movie: చిక్కుల్లో యశ్‌ టాక్సిక్‌.. విడుదల డౌటే

కేజీయఫ్‌ చిత్రాలతో దేశవ్యాప్తంగా గుర్తింపు తెచ్చుకున్న కన్నడ నటుడు యశ్‌. ఆయన కథానాయకుడిగా గీతూ మోహన్‌ దాస్‌ దర్శకత్వంలో రూపొందుతున్న చిత్రం ‘టాక్సిక్‌’. ప్రస్తుతం చిత్రీకరణ దశలో ఉన్న ఈ మూవీ చిక్కుల్లో పడింది. పర్యావరణానికి హాని కలిగీంచేలా చెట్లను కొట్టేసి షూటింగ్‌ చేస్తున్నారని ఆరోపణలు వచ్చిన నేపథ్యంలో అధికారులు ఈ చిత్ర బృందానికి షోకాజ్‌ నోటీసులు జారీ చేశారు. కర్ణాటక అటవీశాఖ మంత్రి ఈశ్వర్‌ బి.ఖాండ్రే ఈ విషయాన్ని ధ్రునివీకరించారు. గతేడాది అక్టోబర్‌ నుంచి బెంగళూరు సమీపంలోని పీన్య ప్రాంతంలో ‘టాక్సిక్‌’ షూటింగ్‌ జరుగుతోంది. చిత్రీకరణ కోసం అక్కడున్న వందల చెట్లను నరికేసి, భారీ సెట్స్‌ వేసినట్లు అటవీశాఖకు ఫిర్యాదులు అందాయి. ఈ క్రమంలో మంత్రి ఈశ్వర్‌ ఖండ్రే షూటింగ్‌ జరుగుతున్న  ప్రాంతానికి వెళ్లి పరిస్థితిని సమీక్షించారు. ఆ భూమికి సంబంధించిన వివరాలను కూడా అడిగి తెలుసుకున్నారు. అనంతరం అధికారులని చిత్ర నిర్మాతలకు నోటీసుని పంపారు.

‘టాక్సిక్‌’ షూటింగ్‌ జరుగుతున్న ప్రాంతాన్ని అధికారులు హిందుస్థాన్‌ మెషీన్‌ టూల్స్‌ (హెచ్‌ఎంటీ) సంస్థకు కట్టబెట్టారనే ఆరోపణలున్నాయి. దీనిపై ప్రస్తుతం కోర్టులో విచారణ జరుగుతోంది. హెచ్‌ఎంటీకి కేటాయించిన తర్వాత దాన్ని అటవీ ప్రాంతంగా గుర్తించాల్సిన అవసరం లేదనేది వాదన. అయితే, మంత్రిమండలి ఆమోదం లేకుండా డీ-నోటిఫికేషన్‌ చేయడాన్ని సవాల్‌ చేస్తూ ప్రభుత్వం కోర్టుకు వెళ్లింది. ప్రస్తుతం దీనిపై విచారణ జరుగుతోంది. ఈ క్రమంలోనే హెచ్‌ఎంటీ నుంచి కెనరా బ్యాంకు సదరు ప్రాంతాన్ని కొనుగోలు చేసి ‘టాక్సిక్‌’ చిత్ర బృందానికి లీజుకు ఇచ్చింది. దీనిపైనా ప్రస్తుతం స్కూటీ ని చేస్తున్నారు. ఆ స్థలం చుట్టూ వివాదాలు చుట్టుముట్టడంతో షూటింగ్‌ ఆపాలంటూ నోటీసులు ఇచ్చారు. ప్రభుత్వం ఆ భూమిని తిరిగి స్వాధీనం చేసుకుని, అక్కడ పార్క్‌ను అభివృద్థి చేయాలన్న ఆలోచనలో ఉన్నట్లు మంత్రి ఖాండ్రే తెలిపారు. ‘ఇది బెంగళూరు నగరానికి మరింత ఊపిరి అందిస్తుంది. దానికి వెలకట్టలేం’ అని మంత్రి చెప్పడం గమనార్హం. ప్రస్తుతం షూటింగ్‌ వాయిదా పడితే, సినిమా విడుదల మరింత ఆలస్యం కానుంది. షెడ్యూల్‌ ప్రకారం ఈ ఏడాది డిసెంబరులో ‘టాక్సిక్‌’ను విడుదల చేయాలని భావిస్తున్నారు. ఈ క్రమంలో వివాదంతో షూటింగ్‌ మరింత ఆలస్యమయ్యే అవకాశం ఉంది.