Rakesh Varre: ఎట్టకేలకు ఓటీటీలో జితేందర్ రెడ్డి చిత్రం

ఏబీవీపీ, బీజేవైఎం నాయకుడు జితేందర్ రెడ్డి (Jithender Reddy) బయోపిక్ ను అదే పేరుతో ఆయన సోదరుడు ముదుగంటి రవీందర్ రెడ్డి నిర్మించారు. సెన్సార్ కష్టాలను అధిగమించి ఆ సినిమా గత యేడాది నవంబర్ 8న జనం ముందుకు వచ్చింది. 'ఎవరికీ చెప్పొద్దు' చిత్రంలో హీరోగా నటించిన రాకేశ్‌ వర్రే (Rakesh Varre) 'జితేందర్ రెడ్డి'లో టైటిల్ క్యారెక్టర్ పోషించాడు. రియా సుమన్ , వైశాలి, సుబ్బరాజు (Subbaraju), రవిప్రకాశ్ (Ravi Prakash) ఇందులో కీలక పాత్రలను చేశారు. 'ఉయ్యాల జంపాల, మజ్ను' చిత్రాలను రూపొందించిన విరించి వర్మ (Virinchi Varma) దీనికి దర్శకుడు. గోపీసుందర్ (Gopisunder) సంగీతం అందించాడు. అయితే... ఈ సినిమాకు థియేటర్లలో మిశ్రమ స్పందన లభించింది.

ఇవాళ పెద్ద, చిన్న అనే తేడా లేకుండా ఏ సినిమా అయినా థియేటర్లలో విడుదలైన మూడు, నాలుగు వారాలకు ఓటీటీలో ప్రత్యక్షమౌతోంది. కానీ 'జితేందర్ రెడ్డి'కి అక్కడా ఎదురుచూపులు తప్పలేదు. ఎట్టకేలకు ఈ సినిమా ఈటీవీ విన్ లో ఈ నెల 20 నుండి స్ట్రీమింగ్ కాబోతోంది. ఈ విషయాన్ని చిత్ర ఎగ్జిక్యూటివ్ ప్రొడ్యూసర్ వాణిశ్రీ తెలిపారు. జాతీయవాది అయిన జితేందర్ రెడ్డిని నక్సలైట్లు అతి కిరాతకంగా హతమార్చారని, అతని జీవితం ఈ తరానికి స్ఫూర్తి నింపాలనే ఉద్దేశ్యంతో ఎన్నో కష్టనష్టాలకు ఓర్చి ఈ సినిమాను నిర్మించామని, గురువారం నుండి ఓటీటీలో ప్రసారం కాబోతున్న తమ చిత్రానికి చక్కని ఆదరణ లభిస్తుందనే నమ్మకం ఉందని ఆమె అన్నారు.

Also Read: Singeetam Srinivasa Rao: సింగీతం అందించిన కానుక 'ఆదిత్య 369'

మరిన్ని సినిమా వార్తల కోసం ఇక్కడ క్లిక్ చేయండి