Telangana State Commission for Women: కొరియోగ్రాఫర్స్... ఖబడ్దార్...
ABN , Publish Date - Mar 20 , 2025 | 01:33 PM
సినిమా ఐటమ్ సాంగ్స్ లోని స్టెప్స్ శ్రుతిమించు తున్నాయి. దీనిపై తెలంగాణ మహిళా కమిషన్ దృష్టి పెట్టింది.
ఇటీవల కొన్ని సినిమాల్లోని పాటలపై పలువురు అభ్యంతరాలు వ్యక్తం చేస్తున్నారు. మరీ ముఖ్యంగా అగ్రకథానాయకులు సైతం అసభ్యకరంగా పాటల్లో స్టెప్స్ వేయడాన్ని ఆక్షేపిస్తున్నారు. ఇక ఐటమ్ సాంగ్స్ (Item Songs) లో హీరోయిన్లు, స్పెషల్ డాన్సర్స్ వేసే స్టెప్పుల గురించి ఎంత తక్కువ మాట్లాడుకుంటే అంత మంచిది అన్నట్టుగా ఉంది వ్యవహారం. కొరియోగ్రాఫర్స్ ఒకరితో ఒకరు పోటీపడుతూ, పరమ దారుణమైన స్టెప్స్ ను కంపోజ్ చేస్తున్నారు. మరీ శృతిమించితే... సెన్సార్ (Censor) వారు చూసుకుంటారులే అనే ధైర్యంతో ఈ పాటలను తెరకెక్కిస్తున్నట్టు అనిపిస్తోంది. అయితే... ఈ విషయంపై తెలంగాణ రాష్ట్ర మహిళా కమిషన్ దృష్టి సారించింది. తాజాగా ఓ హెచ్చరికనూ జారీ చేసింది.
మహిళా కమిషన్ (Commission for Women) ఛైర్ పర్శన్ నేరెళ్ళ శారద (Nerella Sarada) తాజాగా ఓ ప్రకటనను విడుదల చేశారు. ఇటీవల కొన్ని సినిమా పాటల్లో ఉపయోగిస్తున్న డాన్స్ స్టెప్స్ అసభ్యంగా, మహిళలను కించపరిచే విధంగా ఉన్నాయని పలు ఫిర్యాదులు తమకు అందాయని పేర్కొన్నారు. ఈ అంశాన్ని కమిషన్ తీవ్రంగా తీసుకుంటున్నట్టు తెలిపారు. సినిమా అనేది సమాజంపై ప్రభావం చూపే శక్తివంతమైన మాధ్యమం కావడంతో, ఇందులో మహిళలను అవమానించే లేదా అసభ్యకరంగా చూపించే అంశాలు తీవ్ర ఆందోళనకు గురిచేస్తున్నాయని కమిషన్ ఛైర్ పర్శన్ ఆందోళన వ్యక్తం చేశారు. ఈ నేపథ్యంలో సినిమా దర్శకులు, నిర్మాతలు, కొరియోగ్రాఫర్లు, సంబంధిత వర్గాలు బాధ్యతాయుతంగా వ్యవహరించాలని మహిళా కమిషన్ హెచ్చరించింది. మహిళలను తక్కువ చేసి చూపించే, అసభ్యకరమైన డాన్స్ స్టెప్స్‌ను వెంటనే నిలిపివేయాలని, తమ హెచ్చరికను పాటించకపోతే, సంబంధిత చట్టాల ప్రకారం కఠిన చర్యలు తీసుకోవడానికి సిద్ధంగా ఉన్నామని తెలిపారు.
సినిమా రంగం సమాజానికి సానుకూల సందేశాలను అందించడం, మహిళల గౌరవాన్ని కాపాడటం అనేది నైతిక బాధ్యతగా భావించాలని, అలానే యువత, పిల్లలపై సినిమాలు చూపించే ప్రభావాన్ని దృష్టిలో ఉంచుకొని, సినిమా పరిశ్రమ స్వీయ నియంత్రణ పాటించాల్సిన అవసరం ఉందని ఆ ప్రకటనలో పేర్కొన్నారు. అంతేకాదు... ఈ అంశాలపై ప్రజలు, సామాజిక సంస్థలు తమ అభిప్రాయాలను మహిళా కమిషన్‌కు తెలియజేయవచ్చ తెలిపారు. తమకు అందే ఫిర్యాదులను నిశితంగా పరిశీలించి, అవసరమైన చర్యలు తీసుకుంటామని హామీ ఇచ్చారు.
Also Read: Gaddar Telangana Film Awards: ఆ అవార్డులు కొనసాగుతాయి...
మరిన్ని సినిమా వార్తల కోసం ఇక్కడ క్లిక్ చేయండి