Tollywood: సాయి కుమార్ కి కొమరం భీమ్ జాతీయ పురస్కారం
ABN , Publish Date - Mar 11 , 2025 | 08:15 PM
ప్రముఖ నటుడు సాయికుమార్ నట స్వర్ణోత్సవం జరుపుకున్నారు. ఆయన నటనకు, చేస్తున్న సేవా కార్యక్రమాలకు గుర్తుగా కొమరం భీమ్ జాతీయ అవార్డును ఇవ్వబోతున్నారు.
నటుడిగా స్వర్ణ ఉత్సవం జరుపుకుంటున్న డైలాగ్ కింగ్ సాయి కుమార్ (Saikumar) కి 2024 సంవత్సరానికి గాను కొమరం భీమ్ (Komaram Bheem) ప్రతిష్టాత్మక జాతీయ పురస్కారానికి ఎంపికచేసినట్లు సెలక్షన్ చైర్మన్ సి.పార్ధ సారధి ఐ.ఎ.ఎస్., కో-చైర్మన్ నాగబాల డి. సురేష్ కుమార్, కన్వీనర్ కొమరం సోనే రావు, శిడాం అర్జు మాస్టారు, అధికారిక ప్రకటనలో తెలియచేశారు.
గత 12 సంవత్సరాలుగా 'భారత కల్చరల్ అకాడమి, ఓం సాయి తేజ ఆర్ట్స్, ఆదివాసి సాంస్కృతిక పరిషత్' సంయుక్త నిర్వహణలో ఈ అవార్డ్ ను అందిస్తున్నామని, గతంలో ఈ కొమరం భీమ్ అవార్డును సుద్దాల అశోక్ తేజ, అల్లాణి శ్రీధర్, లెజెండరీ ఆర్టిస్ట్ రాజేంద్ర ప్రసాద్, గూడ అంజయ్య వంటి దిగ్గజాలకు ఈ పురస్కారం తో సన్మానించమని, అవార్డు తో పాటు జ్ఞాపిక ను, యాబై ఒక వెయ్యి రూపాయల నగదు అందిస్తామని, కమిటీ సభ్యులు తెలియచేసారు. మార్చ్ 23 వ తేది ఈ పురస్కారోత్సవం కొమరం భీమ్ జిల్లా, ఆసిఫాబాద్ కేంద్రంలోని ప్రమీల గార్డెన్స్ లో స్థానిక శాసనసభ్యులు కోవా లక్ష్మి, ప్రముఖ బీజేపీ నాయకులు అరిగెల నాగేశ్వర రావు పర్యవేక్షణలో జరుపుతున్నామని, రాజకీయ, సినీ, వ్యాపార, గిరిజన ప్రముఖులు పెద్ద సంఖ్యలో హాజరుకానున్నారని వారు తెలిపారు. ఈ సందర్భంగా గిరిజన కళాకారులతో పలు గిరిజన సాంప్రదాయ నృత్యాల ప్రదర్శన ఆకర్షణగా నిలువబోతందని అన్నారు.