మెగాస్టారుకో ముద్దు

తనదైన నటనతో కోట్లాదిమంది అభిమానుల హృదయాలను చూరగొన్నారు చిరంజీవి. ఒక్కసారి ఆయన్ను చూస్తే చాలు అనుకొనే అభిమానులకు కొదవలేదు. ఎన్నో ఏళ్లుగా తెరపైన చూస్తూ ఆరాధించిన మెగాస్టార్‌ కళ్లముందు ప్రత్యక్షమైతే అభిమానుల ఆనందానికి అవధులుండవు. ఇలాంటి ఓ అపురూపమైన దృశ్యానికి లండన్‌ ఎయిర్‌పోర్ట్‌ వేదికైంది. యూకే పార్లమెంట్‌లో సన్మానం కోసం చిరంజీవి లండన్‌ వెళ్లారు. ఆయనను చూడడానికి విమానాశ్రయానికి అభిమానులు భారీ సంఖ్యలో తరలివచ్చారు. చిరంజీవిని చూడగానే భావోద్వేగానికి గురైన ఓ మహిళా అభిమాని ఆయన్ను దగ్గరకు తీసుకొని బుగ్గను ఆత్మీయంగా ముద్దాడారు. ‘మీ ఆనందమే నా ఆనందం’ అన్నట్లు ఆ క్షణాలను చిరంజీవి సైతం సంతోషంగా ఆస్వాదిస్తున్నట్లు కనిపించారు. ప్రస్తుతం ఈ ఫొటో నెట్టింట వైరలవుతోంది. యూకే పార్లమెంట్‌ నేడు చిరంజీవిని సత్కరించనుంది. అలాగే బ్రిడ్జ్‌ ఇండియా సంస్థ జీవిత సాఫల్య పురస్కారం అందించనుంది.