Aamani - Naari: మహిళ సాధికారత, స్త్రీ శక్తిని చాటే 'నారి' 

ఆమని (Aamani) కీలక పాత్ర పోషిస్తున్న చిత్రం 'నారి' (Naari).  వికాస్ వశిష్ట, మౌనిక రెడ్డి, కార్తికేయ దేవ్, ప్రగతి, సునయన, ప్రమోదిని, నిత్య శ్రీ, కేదార్ శంకర్, రాజమండ్రి శ్రీదేవీ ఇరత పాత్రధారులు.  షి ఫిల్మ్స్, హైదరాబాద్ స్టూడియోస్ బ్యానర్లపై  శశి వంటిపల్లి నిర్మాతగా సూర్య వంటిపల్లి తెరకెక్కిస్తున్నారు.   ఓ విద్యార్థిని ఈ సమాజంలో ఎదుర్కొనే కష్టాలు, సమస్యల నేపథ్యంలో తెరకెక్కుతున్న సినిమా ఇది. ఈ సినిమా టీజర్ ను స్త్రీ, శిశు సంక్షేమ శాఖా మంత్రి సీతక్క విడుదల చేసి చిత్ర బృందానికి శుభాకాంక్షలు తెలిపారు.  హైకోర్టు జస్టిస్ శ్రీమతి రాధారాణి గారు, ఐఏఎస్ పూనం మాలకొండయ్య, ఐపీఎస్ జయచంద్ర గార్ల చేతుల మీదుగా ర్యాప్ సింగర్ సీషోర్ పాడిన ‘ఈడు మగాడేంట్రా బుజ్జి’ పాట 8 మిలియన్ల వ్యూస్‌తో సోషల్ మీడియాలో దూసుకుపోతోంది.

మహిళా దినోత్సవం సందర్భంగా ఈ  చిత్రాన్ని మార్చి 7న రిలీజ్ చేయబోతోన్నట్టుగా మేకర్స్ ప్రకటించారు. తాజాగా ఈ సినిమా నుంచి ఓ పాటను రిలీజ్ చేశారు. ఈ పాటను చిన్మయి శ్రీపాద ఆలపించారు. వినోద్ కుమార్ విన్ను బాణీ అందరినీ ఆకట్టుకునేలా ఉంది. మహిళా సాధికారత, స్త్రీ శక్తిని చాటేలా ఈ పాటను ప్రసాద్ సానా రచించారు. దర్శకుడు సూర్య వంటిపల్లి మాట్లాడుతూ.. ‘ఎప్పుడూ ఫీమేల్ ఓరియెంటెడ్ చిత్రాలు, మహిళల సమస్యల మీద తీస్తున్న చిత్రాలను ఆడియెన్స్ ఆదరిస్తుంటారు. ఈ చిత్రంలో ఆమని గారి నట విశ్వరూపం చూస్తారు. క్లైమాక్స్ కంటతడి పెట్టించేలా ఉంటుంది. అందరినీ ఆలోచింపజేసేలా ఈ సినిమా ఉంటుంద’ని అన్నారు. మహా శివరాత్రి సందర్భంగా ఈ మూవీ ట్రైలర్‌ను ప్రముఖ నిర్మాత చేతుల మీదుగా రిలీజ్ చేయబోతోన్నట్టుగా మేకర్స్ ప్రకటించారు.