Sairabanu: రెహమాన్‌ ఆరోగ్యంపై సైరాబాను ఏమన్నారంటే..

సంగీత దర్శకుడు ఏఆర్‌ రెహమాన్‌ (Ar Rahman) అస్వస్థతకు గురైనట్లు ఆదివారం ఉదయం వార్తలు హల్‌చల్‌ చేసిన సంగతి తెలిసిందే. డీహైడ్రేషన్‌, గ్యాస్ట్రిక్ 
సమస్య కారణంగా ఆయన అస్వస్థతకు గురయ్యారని.. ఈ మేరకు చికిత్స తీసుకున్నారని ఆయన సోదరి, వైద్యులు తెలిపారు. చికిత్స అనంతరం ఆయన్ని డిశ్చార్జ్‌ చేసినట్లు వెల్లడించారు. అయితే తాజాగా రెహమాన్‌ ఆరోగ్య పరిస్థితిని ఉద్దేశించి ఆయన సతీమణి సైరా బాను (Sairabanu) ఒక ప్రకటన విడుదల చేశారు. ఆయన ఆరోగ్యంగా ఉండాలని కోరుకున్నారు. అంతేకాకుండా, తన గురించి ప్రస్తావించేటప్పుడు రెహమాన్‌ మాజీ భార్య అనొద్దని ఆమె కోరారు. తాము ఇంకా అధికారికంగా విడాకులు పొందలేదని తెలిపారు. కొంతకాలంగా తాను అనారోగ్యంతో ఇబ్బంది పడుతున్నానని.. అందుకే దూరంగా ఉంటున్నామని మరోసారి చెప్పారు. అంతేకానీ విడాకులు తీసుకోలేదని స్పష్టం చేశారు. ఏఆర్‌ రెహమాన్‌, సైరా బాను 1995లో పెళ్లి చేసుకున్నారు.  29 ఏళ్ల వైవాహిక బంధం తర్వాత వీరు విడిపోతున్నట్లు గతేడాది ప్రకటించారు. విడాకులపై ఏఆర్‌ రెహమన్‌ మాట్లాడుతూ ‘మా వైవాహిక బంధం త్వరలోనే 30 ఏళ్లకు చేరుతుందని సంతోషించాం. అయితే అనుకోని విధంగా ముగింపు పలకాల్సి వచ్చింది. ఇలాంటి కఠిన పరిస్థితుల్లో స్నేహితులు మా వ్యక్తిగత గోప్యతను అర్థం చేసుకుంటారని భావిస్తున్నాం’’ అని ఎక్స్‌ వేదికగా పోస్ట్‌ పెట్టారు.