Rashmika Mandanna: అతను పక్కన ఉంటే మ్యాజిక్‌ జరుగుతుంది
ABN , Publish Date - Jan 31 , 2025 | 06:22 PM
‘ఛావా’ చిత్రంలో ఓ దైవత్వం, అంతులేని ప్రేమ ఉంటుంది. అందుకే ఈ చిత్రాన్ని చేయాలని ఫిక్స్‌ అయ్యా. ఈ సినిమా చూసిన ప్రతీ సారి ఏడ్చేస్తాను.
విక్కీ కౌశల్‌, రష్మిక మందన్న (Rashmika Mandanna)ప్రధాన పాత్రల్లో నటించిన చిత్రం ‘ఛావా’ (Chhaava movie) . దినేష్‌ విజన్‌ నిర్మాతగా లక్ష్మణ్‌ ఉటేకర్‌ దర్శకత్వంలో తెరకెక్కిన ఈ మూవీ ఫిబ్రవరి 14న రిలీజ్‌ కాబోతోంది. పాన్‌ ఇండియా ప్రాజెక్ట్‌గా రిలీజ్‌ కాబోతోన్న ఈ సినిమా ప్రమోషన్స్‌ ప్రస్తుతం ఊపందుకున్నాయి. శుక్రవారం హైదరాబాద్‌లో జరిగిన ఈవెంట్‌లో ఓ పాటను విడుదల చేశారు.
రష్మిక మందన్న మాట్లాడుతూ '‘ఈ చిత్రంలో మాటలకు అందని భావం ఉంటుంది. ఇందులో ఓ దైవత్వం, అంతులేని ప్రేమ ఉంటుంది. అందుకే ఈ చిత్రాన్ని చేయాలని ఫిక్స్‌ అయ్యా. ఈ సినిమా చూసిన ప్రతీ సారి ఏడ్చేస్తాను. అంత అద్భుతంగా ఉంటుంది. ఏ ఆర్‌ రెహమాన్‌ మ్యూజిక్‌, జానే తూ అనే పాట అందరినీ మెస్మరైజ్‌ చేస్తుంటుంది. విక్కీ చుట్టూ అద్భుతమైన ఆరా ఉంటుంది. ఆయన పక్కన నిలబడితేనే ఓ మ్యాజిక్‌ జరుగుతుంది. 'ఛావా' పాత్రకు విక్కీ అద్భుతంగా సెట్‌ అయ్యారు. అందుకే లక్ష్మణ్‌ విక్కీని ఈ పాత్రకు తీసుకున్నారు’’ అని అన్నారు.
విక్కీ కౌశల్‌ (Vicky kaushal) మాట్లాడుతూ "ఛావా’ సినిమా కోసం శారీరకంగా, మానసికంగా ఎంతో ప్రిపేర్‌ అయ్యాను. యుద్ధాలు, గుర్రపు స్వారీల్లో శిక్షణ తీసుకున్నాను. వీటన్నంటి కంటే కూడా ఛత్రపతి శంభాజీ మహారాజ్‌ అనే పాత్రలోకి పరకాయ ప్రవేశం చేయడం, నా మనసుని ఆ పాత్ర కోసం సన్నద్దం చేసుకోవడం సవాలుగా అనిపించింది. ఛత్రపతి శివాజీ మహారాజ్‌ శ్రీరాముని వంటి వారు. ఛత్రపతి శంభాజీ మహారాజ్‌ సింహం వంటి యోధుడు. ఈ పాత్రను ఇంత కంటే గొప్పగా నేను వర్ణించలేను. లక్ష్మణ్‌ మొదటి నుంచి నన్ను పాత్ర పేరుతోనే పిలుస్తుంటారు. నేను ఈ పాత్రను పోషించగలను అనే నమ్మకాన్ని అలా ఆయన నాలో ముందు నుంచీ కలిగిస్తూనే వచ్చారు. నిజమైన యోధుడి కథను చెబుతున్నందుకు నాకెంతో గర్వంగా ఉంది. ఇంత గొప్ప చిత్రాన్ని నిర్మించిన దినేష్‌ విజన్‌కు, లక్ష్మణ్‌ ఉటేకర్‌కు ధన్యవాదాలు. రెహమాన్‌ గారి సంగీతం సినిమా స్థాయిని పెంచేసింది. ఇలాంటి పాత్ర నాకు దొరకడం నా అదృష్టం. జీవితంలో ఒక్కసారే ఇలాంటి అవకాశం వస్తుంది. అవుట్‌పుట్‌ అద్భుతంగా వచ్చింది. అందరూ మెచ్చే చిత్రమవుతుంది’’ అని అన్నారు.