Jr NTR : సైఫ్‌ అలీఖాన్‌పై దాడి.. తారక్‌ స్పందన.

బాలీవుడ్‌ నటుడు సైఫ్‌ అలీఖాన్‌పై (Saif Ali khan) గుర్తుతెలియని దుండగుడు దాడి చేసిన సంగతి తెలిసిందే. ప్రస్తుతం ఆయన ఆస్పత్రిలో చికిత్స పొందుతున్నారు. దీనిపై నటుడు ఎన్టీఆర్‌ (Jr NTR) స్పందించారు. ఈ మేరకు ఆయన ట్వీట్‌ చేశారు. విషయం తెలిసి షాకయ్యానన్నారు. ‘‘సైఫ్‌ సర్‌పై దాడి గురించి తెలిసి షాకయ్యా. ఇది నిజంగా బాధాకరం. ఆయన త్వరితగతిన కోలుకోవాలని ఆరోగ్యంగా తిరిగి రావాలని కోరుకుంటున్నా’’ అని పేర్కొన్నారు.  గురువారం తెల్లవారుజామున 2.30 గంటలకు దాడి ఘటన చోటుచేసుకుంది. సైఫ్‌, అతడి కుటుంబ సభ్యులు నిద్రలో ఉండగా.. ఇంట్లోకి చొరబడిన దుండగుడు దొంగతనానికి యత్నించాడు. అతడిని గమనించిన సైఫ్‌ అడ్డుకునేందుకు ప్రయత్నించగా.. దాడి చేసి పరారైనట్లు తెలుస్తోంది. దొంగతో జరిగిన ఘర్షణలో సెఫ్‌కు ఆరుచోట్ల కత్తి గాయాలయ్యాయి. రెండు చోట్ల లోతుగా గాయమైనట్లు వైద్యులు తెలిపారు. ప్రస్తుతం సైఫ్‌కు సర్జరీ జరుగుతోంది. ఈ విషయంపై పోలీసులు కేసు నమోదు చేసుకొని దర్యాప్తు చేస్తున్నారు. గతేడాది విడుదలైన ‘దేవర’ చిత్రంలో ఎన్టీఆర్‌, సైఫ్‌ అలీఖాన్‌ నటించారు. ఎన్టీఆర్‌ ద్విపాత్రాభినయం చేసిన ఈ చిత్రంలో సైఫ్‌ భైౖరవ అనే ప్రతినాయకుడి పాత్ర పోషించారు.  (Saif ali khan Stabbing case)