Chhaava:'ఛావా'తో బాలీవుడ్ కు ఊపిరి

ఈ యేడాది బాలీవుడ్ కు జనవరి మాసం ఓ రకంగా దెబ్బేసింది. కాస్తంత అంచనాలు ఉన్న స్టార్ హీరోల చిత్రాలు బాక్సాఫీస్ బరిలో చేతులెత్తేశాయి. సోనూసూద్ 'ఫతే' (Fateh) , అక్షయ్ కుమార్ 'స్కై ఫోర్స్' (Sky Force) , కంగనా రనౌత్ 'ఎమర్జెన్సీ' (Emergency) చిత్రాలు ఫర్వాలేదనిపించాయి కానీ గొప్ప విజయాన్ని మాత్రం అందుకోలేకపోయాయి. ఇక షాహిద్ కపూర్ 'దేవా' (Deva) అయితే బాక్సాఫీస్ దగ్గర ఘోర పరాజయాన్ని మూటకట్టుకుంది. ఇది 2013లో వచ్చిన మలయాళ చిత్రం 'ముంబై పోలీస్'కు ఇది రీమేక్. ఈ సినిమాను తెలుగులోనూ సుధీర్ బాబు 'హంట్' (Hunt) పేరుతో రీమేక్ చేశాడు. ఇక్కడా అది ఫ్లాప్ అయ్యింది. అలానే తమిళ రీమేక్ 'లవ్ టుడే' (Love today) ను శ్రీదేవి చిన్నకూతురు 'లవ్ యాపా' (Loveyapa) గా చేసింది. ఈ మూవీలో ఆమీర్ ఖాన్ తనయుడు జునైద్ ఖాన్ హీరోగా నటించాడు. ఈ స్టార్ కిడ్స్ మూవీ జనాలపై ఎలాంటి ప్రభావం చూపలేకపోయింది. అలానే అజయ్ దేవ్ గన్, అతని మేనల్లుడు ఆమన్ దేవ్ గన్ నటించిన 'ఆజాద్' (Azad) చిత్రానిదీ అదే దారి... ఇలా పలు పరాజయాలతో జనవరి మాసం, ఫిబ్రవరి మొదటి వారం నీరసంగా వెళ్ళిపోయాయి.

ఈ నేపథ్యంలో ఫిబ్రవరి 14న వచ్చిన 'ఛావా' (Chhaava) పై జనాలు భారీ ఆశలు పెట్టుకున్నారు. అయితే మూవీ విడుదల కాగానే జాతీయ మీడియా ఈ సినిమాపై పెదవి విరిచింది. కొందరు విమర్శకులు మాత్రం 'ఛావా'పై ప్రశంసల వర్షం కురిపించారు. ముఖ్యంగా విక్కీ కౌశల్ (Vicky Kaushal) నటన అద్భుతంగా ఉందని కితాబిచ్చారు. అతని భార్య యేసు బాయిగా నటించిన రశ్మికా మందణ్ణకు స్క్రీన్ స్పేస్ ఎక్కువగా లభించకపోయినా... కనిపించిన సన్నివేశాల్లో బాగా చేసిందని అభినందించారు. ఇందులోని కొన్ని సన్నివేశాలు గూజ్ బంప్స్ తెప్పిస్తే, మరికొన్ని సన్నివేశాలు కన్ళీళ్ళు తెప్పించాయని అన్నారు. నిదానంగా 'ఛావా' జనాలకు ఎక్కేయడం మొదలైంది. ఇప్పుడీ సినిమాను జనాలు గుంపులు గుంపులుగా చూస్తున్నారు. ఉత్తరాదినే కాకుండా దక్షిణాదిన ముఖ్యంగా తెలంగాణ, ఆంధ్రాలో ఈ సినిమాను ప్రేక్షకులు ఆదరించడం మొదలెట్టారు. థియేటర్లలో 'జై శివాజీ జై భవానీ, శంభాజీ మహారాజ్ కీ జై' అంటూ యువత నినాదాలు చేస్తోంది.

విశేషం ఏమంటే... 'ఛావా' సినిమా కలెక్షన్స్ రోజు రోజుకూ పెరుగుతున్నాయి. బాలీవుడ్ ట్రేడ్ వర్గాలు చెబుతున్న దాని ప్రకారం మొదటి రోజున ఈ సినిమా రూ. 33.10 కోట్ల గ్రాస్ ను, రెండో రోజు 39.30 కోట్ల గ్రాస్ ను, మూడో రోజైన ఆదివారం 49.3 కోట్ల గ్రాస్ ను వసులూ చేసింది. అంటే ఆదివారానికి ఈ సినిమా రూ. 121.43 కోట్ల గ్రాస్ ను వరల్డ్ వైడ్ వసూలు చేసింది. ఓరకంగా 'ఛావా' మొదటి రోజు కలెక్షన్స్ కూడా రికార్డ్ సృష్టించినట్టే. ఎందుకంటే విక్కీ కౌశల్ కెరీర్ లో ఇంతవరకూ మొదటి రోజున డబుల్ డిజిట్ సాధించిన సినిమానే లేదు. ఆ లోటును 'ఛావా' తీర్చేసింది. విక్కీ కౌశల్ సినిమాల్లో మొదటి రోజున బ్యాడ్ న్యూస్ (Bad Newz) రూ.8.62 కోట్లు, ఉరి (Uri) రూ.8.20 కోట్లు, రాజీ (Raazi)రూ. 7.53 కోట్లు, శామ్ బహదూర్ రూ. 6.25 కోట్లు, జర హఠ్ కే జర బచ్ కే రూ. 5.49 కోట్లు, భూత్ (Bhoot) రూ. 5.10 కోట్లు, మన్ మర్జియాన్ (Manmarziyaan) రూ. 3.52 కోట్లు, రామన్ రాఘవన్ 2.0 రూ. 1.10 కోట్లు గ్రాస్ వసూలు చేశాయి. దాంతో 'ఛావా'కు వచ్చిన ఓపెనింగ్స్ తో విక్కీ కౌశల్, అతని అభిమానులు ఫుల్ ఖుషీగా ఉన్నారు.

ఇక బుధవారం ఛత్రపతి శివాజీ మహారాజ్ (Chhatrapati Shivaji Maharaj) జయంతి. మహారాష్ట్రలో దీనిని ఘనంగా జరుపుకుంటారు. ఆ రోజు పబ్లిక్ హాలిడే కూడా. సో శివాజీ తనయుడు శంభాజీ సినిమా 'ఛావా' ను చూడటం కంటే వారికి మరో ప్రత్యామ్నాయం లేదు! ఆ రోజున కూడా యాభై కోట్లకు పైగా గ్రాస్ వసూలు అయ్యే ఆస్కారం ఉందని ట్రేడ్ పండింట్స్ చెబుతున్నారు. అదే జరిగితే... 'ఛావా' సినిమా బుధ, గురువారాలకు రెండు వందల కోట్ల క్లబ్ లో చేరిపోవడం ఖాయం.