Mahesh Babu: నువ్వు కాపాడిన 3772వ ప్రాణం సామీ..
ABN , Publish Date - Oct 24 , 2024 | 04:14 PM
సూపర్ స్టార్ మహేష్ బాబు చేసిన సాయం.. ఆయన అభిమానులను ఎంతగానో కదిలించింది. ఆంధ్రప్రదేశ్‌లో ఓ గ్రామంలో ఉన్న రెండేళ్ల చిన్నారికి ఉచితంగా హార్ట్ సర్జరీ చేయించిన మహేష్ బాబు కోసం ఆ గ్రామంలో ఉన్న ఆయన అభిమానులు ఏం చేశారంటే..
‘ఖలేజా’ సినిమాలో సూపర్ స్టార్ మహేష్ బాబుని దేవుడిగా భావిస్తూ.. రావు రమేష్ అండ్ టీమ్ దండాలు పెడుతుంటారు. మా ఊరిని కాపాడమంటూ వెంటపడుతుంటారు. మహేష్ బాబు చేతి స్పర్శతో పాప బతికితే.. నువ్వు కాపాడిన ప్రాణం సామీ ఇది. ఇది నీ దర్శనం.. ఇది నిదర్శనం అంటూ రావు రమేష్ పలికే డైలాగ్స్ ఇప్పటికీ వైరల్ అవుతూనే ఉంటాయి. ఆ సినిమా గురించి మాట్లాడుకునేలా చేస్తూనే ఉంటాయి. ఇదంతా రీల్ స్టోరీ. కానీ రియల్ లైఫ్‌లో కూడా మహేష్ బాబుని ఎన్నో కుటుంబాలు దేవుడిగా భావిస్తున్నాయి. ఆ కథలోకి వస్తే..
Also Read- War 2: ఒకే ఫ్రేమ్‌లో ముగ్గురు స్టార్లు..
మన ఇంటి బిడ్డకు వచ్చిన ఆపద నుంచి కాపాడేందుకు మనం ఉన్నాం. మనకి డబ్బు ఉంది కాబట్టి మనం కాపాడుకున్నాం. డబ్బులేని వారి పరిస్థితి ఏమిటి? అనే ఒకే ఒక్క ఆలోచన మహేష్ బాబుతో మహేష్ బాబు ఫౌండేషన్ స్థాపించేలా చేసింది. ఆంధ్ర హాస్పిటల్ సౌజన్యంతో ఎందరో చిన్నారుల గుండె సంబంధిత ప్రాబ్లమ్స్‌కు మహేష్ బాబు ఉచితంగా సేవలను అందిస్తూ వస్తున్నారు. తన కుమారుడు గౌతమ్ పుట్టినప్పుడు వచ్చిన ఈ ఆలోచన ఇప్పటికీ కంటిన్యూ అవుతూనే ఉంది. ఎందరికో ప్రాణదానం చేస్తూనే ఉంది. తాజాగా ఈ లిస్ట్‌లోకి మరో ప్రాణం చేరింది. ఆంధ్రప్రదేశ్‌లోని తూర్పు గోదావరి జిల్లా కత్తుల వారి పేటకు చెందిన రెండేళ్ల రిత్విక‌కు హార్ట్ ప్రాబ్లమ్‌ ఉండటంతో.. ఇప్పుడా పాపకు మహేష్ బాబు ఫౌండేషన్ ఉచితంగా హార్ట్ సర్జరీ చేయించింది. ఈ సాయానికి కృతజ్ఞతగా మహేష్ బాబు అభిమానులు చేసిన పని.. ఇప్పుడు వార్తలలో హైలెట్ అవుతోంది. ఇంతకీ ఫ్యాన్స్ చేశారంటే..
సేమ్ టు సేమ్ ‘ఖలేజా’ సినిమాలో మహేష్ బాబుని ఉద్దేశించి రావు రమేష్ చెప్పే డైలాగ్స్‌తో ఓ ఫ్లెక్సీని ఏర్పాటు చేశారు. ఈ ఫ్లెక్సీ సోషల్ మాధ్యమాల్లో చర్చనీయాంశంగా మారింది. ఫ్యాన్స్ ఇలా కూడా ఉంటారా? అనేలా చర్చనీయాంశం అవుతోన్న ఆ ఫ్లెక్సీలో ఏముందంటే.. ‘‘నువ్వు కాపాడిన 3772వ ప్రాణం మా పి గన్నవరం ది స్వామి. పూజించే రాళ్లలో దేవుడు ఉన్నాడో లేదో మాకు తెలియదు. కానీ 3772 ప్రాణాలు కాపాడిన మా మహేశ్వరుడులో ఉన్నాడు. అలాంటి ఆయనకు మేము భక్తులం.. మాకు ఆయనే దేవుడు.. మేమంతా ఆయన భక్తులం’’ అంటూ ఓ పెద్ద ఫ్లెక్సీని అభిమానులు ఆ ఊరంతా తిప్పడం అందరినీ ఆశ్చర్యానికి గురి చేస్తోంది. ఈ వీడియోను మహేష్ బాబు అభిమానులు సోషల్ మీడియాలో వైరల్ చేస్తున్నారు. దీంతో మహేష్ బాబు పేరు మరోసారి ట్రెండ్ అవుతోంది.