Vijay Deverakonda: 'పుష్ప'పై విజయ్ దేవరకొండ పోస్ట్.. ఏమన్నాడంటే

ప్రస్తుతం దేశవ్యాప్తంగా 'పుష్ప' మేనియా నడుస్తోంది. ఈ నేపథ్యంలోనే పలువురు నెటిజన్లు తమకు నచ్చిన ఊహాగానాలను రాసుకొస్తున్నారు. ఈ క్రమంలోనే 11 నెలల క్రితం రౌడీ బాయ్ విజయ్ దేవరకొండ పెట్టిన ట్వీట్ ప్రస్తుతం వైరల్ అవుతోంది. 'పుష్ప: ది రైజ్' చిత్రానికి కొనసాగింపుగా 'పుష్ప: ది రూల్' సినిమా తెరకెక్కిన విషయం తెలిసిందే. ది రూల్ కి కూడా కొనసాగింపు మూవీ ఉంటుందా అనే ఊహాగానాలు మొదలైన వేళా విజయ్ దేవరకొండ ఏమన్నారంటే..

ఈ ఏడాది జనవరి 11న డైరెక్టర్ సుకుమార్ పుట్టినరోజు సందర్భంగా విజయ్ దేవరకొండ విష్ చేస్తూ.. 'పుట్టిన రోజు శుభాకాంక్షలు సుకుమార్ సార్. మీకు సంపూర్ణ ఆరోగ్యం, సంతోషం ప్రాప్తించాలని కోరుకుంటున్న. మీతో సినిమా చేయడానికి వెయిట్ చేస్తున్న, లవ్ అండ్ హగ్స్. 2021- 'పుష్ప: ది రైజ్'. 2022- 'పుష్ప: ది రూల్', 2023- ‘పుష్ప3: ది ర్యాంపేజ్‌’" అంటూ ట్వీట్ చేశాడు. ఈ నేపథ్యంలోనే 'పుష్ప 3' సినిమా ఉంటుంది అనే ఊహాగానాలకు బలమొచ్చింది.

మరోవైపు "పుష్ప చిత్రాలు ఇంత అద్భుతంగా రావడానికి బన్నీ మీదున్న ప్రేమే కారణం. మరో మూడేళ్లు సమయం ఇస్తే పుష్ప -3 కూడా తీస్తాను" అని సోమవారం జరిగిన ప్రీ రిలీజ్ ఈవెంట్ లో సుకుమార్ అన్నారు. అయితే పుష్ప 3 కూడా ఉంటుందనే విషయం చాన్నాళ్లుగా వైరల్ అవుతోంది. అది నిజం చేస్తూ, తాజాగా ఓ ఫొటో బయటకు వచ్చింది. ఈ సినిమాకు సౌండ్‌ ఇంజినీర్‌గా ఆస్కార్‌ అవార్డు విజేత రసూల్‌ పూకోట్టి పని చేశారు. ఆయన తన టీమ్‌తో కలిసి దిగిన ఫొటో వెనుక ‘పుష్ప3’ టైటిల్‌ ఉంది. అందులో ‘పుష్ప3: ది ర్యాంపేజ్‌’ అని ఉండటంతో పార్ట్‌-2 చివరిలో మూడో భాగానికి సంబంధించిన హింట్స్ ఇవ్వబోతున్నారని తెలుస్తోంది. అల్లు అర్జున్‌ కథానాయకుడిగా సుకుమార్‌ దర్శకత్వంలో రూపొందిన ‘పుష్ప2: ది రూల్‌’ ఈ నెల 5న ప్రేక్షకుల ముందుకు రానుంది.

‘పుష్ప3’కి సంబంధించిన కొన్ని ఆసక్తికర విషయాలు కొన్నాళ్ల కింద ట్రెండ్‌ అయ్యాయి. ‘పార్ట్‌3’ ఉంటుందని బెర్లిన్‌ ఫిల్మ్ ఫెస్టివల్‌ సందర్భంగా అల్లు అర్జున్‌ కూడా స్పష్టం చేశారు. అయితే, ‘పుష్ప2’ క్లైమాక్స్‌లో ‘పార్ట్‌-3’కి లీడ్‌ ఇస్తూ కొన్ని సన్నివేశాలను చూపిస్తారట. ‘పుష్ప3’ కచ్చితంగా ఉంటుందని చిత్ర సన్నిహిత వర్గాలు చెబుతున్నాయి. అయితే, రెండో భాగం పూర్తయిన వెంటనే మాత్రం అది పట్టాలెక్కదని అంటున్నారు. రెండు, మూడేళ్ల తర్వాతే ‘పార్ట్‌3’కి అవకాశం ఉందని చెబుతున్నారు.