RAPO 22: మళ్ళీ 'డబుల్ ఇస్మార్ట్' ప్లాన్.. రామ్ పోతినేని

‘ఉస్తాద్‌’ రామ్‌ పోతినేని (Ram) హీరోగా మైత్రి మూవీ మేకర్స్‌ (Mythri movie makers) సంస్థ ‘మిస్‌ శెట్టి మిస్టర్‌ పోలిశెట్టి’ డైరెక్టర్ మహేష్‌బాబు (Mahesh Babu) దర్శకత్వంలో 'RAPO 22' తెరకెక్కిస్తున్న విషయం తెలిసిందే. ఇటీవల ఈ సినిమా పూజ కార్యక్రమాలు పూర్తి చేసుకుంది. ఈ సినిమాలో రామ్ సరసన భాగ్యశ్రీ బోర్సే హీరోయిన్‌గా నటిస్తున్నారు.‌ ప్రస్తుతం ఇతర నటీనటులు, సాంకేతిక నిపుణుల ఎంపిక చేస్తే పనుల్లో దర్శక నిర్మాతలు బిజీగా ఉన్నారు. ఈ క్రమంలోనే ఒక డబుల్ ఇంప్యాక్ట్ క్రియేట్ చేసేందుకు మేకర్స్ సరికొత్త ప్లాన్ తో ముందుకొస్తున్నారు. ఇంతకీ ఆ ప్లాన్ ఏంటంటే..

తెలుగు చలనచిత్ర పరిశ్రమకు ప్రతిభావంతులను పరిచయం చేసే విషయంలో ఉస్తాద్ రామ్ పోతినేని ఎప్పుడూ ముందుంటారు. ఈ సినిమా కోసం టాలెంటెడ్ అండ్ కోలీవుడ్ సెన్సేషనల్ మ్యూజిక్ డైరెక్టర్స్ వివేక్ - మెర్విన్ సంగీతం అందించనున్నట్లు ఆయన ఈ రోజు ప్రకటించారు. ఈ సంచలన సంగీత ద్వయానికి రామ్ సోషల్ మీడియా ద్వారా స్వాగతం పలికారు. ''తెలుగు తెరపై సరికొత్త సంగీత సంచలనానికి స్వాగతం' అని రామ్ ట్వీట్ చేశారు.

వివేక్ శివ, మెర్విన్ సాల్మన్... ఇద్దరూ కలిసి వివేక్ - మెర్విన్ పేరుతో మ్యూజిక్ చేయడం మొదలు పెట్టారు. తమిళంలో తొలి సినిమా 'వడా కర్రీ'తో మంచి పేరు తెచ్చుకున్నారు. అయితే... వాళ్లిద్దరూ సంగీతం అందించిన ప్రయివేట్ మ్యూజిక్ ఆల్బమ్ సాంగ్ 'ఓర్శాడా...', 'పక్కం నీయుమ్ ఇళ్లై...' చార్ట్ బస్టర్లుగా నిలిచాయి. ధనుష్ హీరోగా నటించిన 'పటాస్' చిత్రానికి సంగీతం అందించారు. ఆ సినిమాలోని 'చిల్ బ్రో...' సాంగ్, ఇంకా ప్రభుదేవా 'గులేబకావళి'లోని గులేబా సాంగ్, కార్తీ 'సుల్తాన్' సినిమాలోని సాంగ్స్... ఇలా వివేక్ - మెర్విన్ సూపర్ డూపర్ హిట్ పాటలకు మ్యూజిక్ అందించారు.