Ram Pothineni: రూట్ మార్చిన రామ్.. రాపో కుదురుతుందా

‘ఉస్తాద్‌’ రామ్‌ పోతినేని (Ram) హీరోగా మైత్రి మూవీ మేకర్స్‌ (Mythri movie makers) సంస్థ ఓ చిత్రం తెరకెక్కించడానికి రంగం సిద్దమైన విషయం తెలిసిందే. తెలుగు, తమిళ, మలయాళ, హిందీ భాషల్లో అగ్ర హీరోలతో పాన్‌ ఇండియా చిత్రాలు తీస్తున్న ‘మైత్రి’ సంస్థ రామ్‌ పోతినేనితో తీస్తున్న తొలి చిత్రమిది. నవీన్‌ పోలిశెట్టితో ‘మిస్‌ శెట్టి మిస్టర్‌ పోలిశెట్టి’ సినిమా డైరెక్ట్‌ చేసి, ఘన విజయం అందుకున్న దర్శకుడు మహేష్‌బాబు (Mahesh Babu) దర్శకత్వంలో ఈ చిత్రం రూపొందనుంది. తాజాగా ఈ సినిమా అప్డేట్‌కి సంబంధించిన పోస్టర్ ఒకటి రిలీజ్ చేశారు. ఆ పోస్టర్ ఎలా ఉందంటే..

వరుసగా యాక్షన్ ఫిలిమ్స్ చేస్తూ.. రామ్ బొక్కాబోర్లాపడ్డారు. దీంతో ఆయన ఈ సారి రూట్ మార్చినట్లు తెలుస్తోంది. కెరీర్ లో కాస్త గ్యాప్ తీసుకొని మైత్రితో స్నేహం ఏర్పరుచుకున్నారు. సో, వీరి కాంబినేషన్‌లోనే సినిమా సెట్ అయ్యింది. తాజాగా నిర్మాతలు పోస్టర్ విడుదల చేశారు. ఈ ప్రీ లుక్ పోస్టర్‌లో రామ్ ఒక మధ్యతరగతి వ్యక్తిగా కనిపిస్తున్నాడు. తన సైకిల్‌తో పాటు నడుస్తూ కనిపిస్తున్న ఈ పోస్టర్ వింటేజ్ వైబ్స్ ఇస్తుంది. వైట్ బ్యాక్‌గ్రౌండ్‌లో హ్యుజ్ షాడో తో ఈ పోస్టర్ ఆసక్తికరంగా కనిపిస్తుంది. రామ్ 22వ చిత్రంగా తెరకెక్కుతున్న ఈ సినిమా నవంబర్ 21 పూజ కార్యక్రమాలు జరుపుకోనుంది. ఆ తర్వాత రెగ్యులర్ షూట్ స్టార్ కానున్నట్లు తెలుస్తోంది.

నిర్మాతలు నవీన్‌ యెర్నేని, వై.రవిశంకర్‌ మాట్లాడుతూ.. రామ్‌ పోతినేనితో సినిమా చేయడం చాలా ఆనందంగా వుందని, హై ఎనర్జీతో న్యూ ఏజ్‌ స్టోరీ టెల్లింగ్‌తో ఈ చిత్రం వుంటుందని తెలిపారు. కథానాయిక, ఇతర తారాగణం, సాంకేతిక బృందం వివరాలు త్వరలో ప్రకటించనున్నారు. ఫ్రెష్ లుక్ లో రామ్ కనిపిస్తుండటంతో ఫ్యాన్స్ ఫుల్ ఖుషి అవుతున్నారు. మరోవైపు సినీ ప్రియుల్లోనూ ఈ సినిమాపై ఆసక్తి పెరుగుతోంది.