Sandhya Theatre: సంధ్య థియేటర్.. ఇది ఎవరూ ఊహించలే!
ABN , Publish Date - Dec 17 , 2024 | 06:03 PM
సంధ్య థియేటర్ వద్ద జరిగిన తొక్కిసలాట కేసు రోజుకో మలుపు తిరుగుతోంది. ఇంతకు ముందు పోలీసులే సరిగా స్పందించలేదంటూ వార్తలు వచ్చిన నేపథ్యంలో.. ఈ కేసును పోలీసులు సీరియస్‌గా తీసుకున్నారు. ఇప్పటికే అల్లు అర్జున్ బెయిల్‌ని రద్దు చేయించేలా ప్రయత్నాల్లో ఉన్న పోలీసులు.. ఇప్పుడు సంధ్య థియేటర్‌ని పూర్తిగా క్లోజ్ చేయించే పనిలో ఉన్నట్లుగా అర్థమవుతోంది. విషయం ఏమిటంటే..
ఇటీవల ‘పుష్ప 2’ ప్రీమియర్ నిమిత్తం సంధ్య థియేటర్ వద్ద జరిగిన తొక్కిసలాట కేసు ఊహించని మలుపులు తిరుగుతోంది. ఈ కేసులో ఐకాన్ స్టార్ అల్లు అర్జున్‌ను అరెస్ట్ చేసిన పోలీసులు.. ఆ తర్వాత మధ్యంతర బెయిల్ రావడంతో విడుదల చేశారు. అల్లు అర్జున్ బెయిల్ రద్దు కోసం సుప్రీం కోర్టును ఆశ్రయించాలని హైదరాబాద్ పోలీసులు నిర్ణయించినట్లుగా వార్తలు వచ్చిన కాసేపటికే.. చిక్కడపల్లి పోలీసులు ఊహించని ట్విస్ట్ ఇచ్చారు. సంధ్య థియేటర్ యాజమాన్యానికి చిక్కడపల్లి పోలీసులు.. థియేటర్ లైసెన్స్ పై షోకాజ్ నోటీసులు జారీ చేశారు.
ఈ షోకాజ్ నోటీసులో..
‘‘ఒక మహిళ మరణానికి దారి తీసిన ఘటనపై సినిమాటోగ్రాఫ్ లైసెన్స్‌ను ఎందుకు రద్దు చేయకూడదో పోలీసులు వివరణ అడిగారు. పది రోజుల్లోపు వివరణ ఇవ్వాలంటూ థియేటర్ యాజమాన్యానికి ఇచ్చిన నోటీసుల్లో పేర్కొన్నారు. సంధ్య 70MM థియేటర్ నిర్వహణలో లోపాలను గమనించిన పోలీసులు, ఆ లోపాలను ఈ నోటీసులో తెలిపారు. సంధ్య 70MM మరియు సంధ్య 35MM థియేటర్లు ఒకే ప్రాంగణంలో ఉన్నాయి.. ఎంట్రీ అండ్ ఎగ్జిట్ ఒకే వైపు ఉన్నాయి. రెండు థియేటర్లలో కలిపి దాదాపు 2520 మంది కూర్చునే సామర్థ్యం ఉంది. ఎంట్రీ అండ్ ఎగ్జిట్‌లను సూచించే సరైన సైన్ బోర్డులు లేవు. ప్రజలకు దారి చూపడానికి ఎంట్రీ, ఎగ్జిట్ ప్రదర్శించే సరైన సైన్ బోర్డులు లేవు. అనుమతి లేకుండా థియేటర్ వెలుపల ఫ్లెక్సీలు ఏర్పాటు చేసి ప్రేక్షకులు పోగవ్వడానికి అవకాశం ఇచ్చారు. థియేటర్లో మౌళిక సదుపాయాలు సరిగా లేవు.
Also Read-Allu Arjun: అల్లు అర్జున్ బెయిల్ రద్దు? పోలీసుల షాకింగ్ డెసిషన్..
ఇటీవల హీరో అల్లు అర్జున్ రాక గురించి స్థానిక పోలీసులకు తెలియజేయడంలో థియేటర్ నిర్వాహకులు విఫలమయ్యారు. అల్లు అర్జున్ రాకపై థియేటర్ యాజమాన్యానికి సమాచారం ఉన్నప్పటికీ ఎంట్రీ, ఎగ్జిట్ సీటింగ్ ప్లాన్ చేయలేదు. అలాగే అల్లు అర్జున్‌తో పాటు తన ప్రైవేట్ సెక్యూరిటీని కూడా థియేటర్ లోపలికి అనుమతించారు. టిక్కెట్‌లను తనిఖీ చేయడానికి సరైన వ్యవస్థ లేదు, అనధికారిక ప్రవేశాన్ని అనుమతించి థియేటర్ లోపల రద్దీ పెరిగేలా చేశారు..’’ వంటి కారణాలతో సంధ్య థియేటర్ లైసెన్స్ పై షోకాజ్ నోటీసులను పోలీసులు జారీ చేశారు. దీంతో ఈ థియేటర్ మూతపడే అవకాశాలే ఉన్నాయనేలా అప్పుడే ఇండస్ట్రీలో టాక్ మొదలైంది. మరి దీనిపై థియేటర్ యాజమాన్యం ఎలా రియాక్ట్ అవుతారో చూడాల్సి ఉంది.