NBK109: బాలయ్య 109 సినిమా టైటిల్ ఇదే.. మరో బ్లాక్‌బస్టర్
ABN , Publish Date - Nov 15 , 2024 | 10:30 AM
ఫ్యాన్స్ ఎప్పుడెప్పుడా అని ఎదురు చూస్తున్న ఆ సమయం వచ్చేసింది. నందమూరి నటసింహం బాలయ్య నటిస్తోన్న NBK109 మూవీకి టైటిల్ ఫిక్సయింది. కార్తీక పౌర్ణమి స్పెషల్‌గా ఈ చిత్ర టైటిల్ టీజర్‌ని మేకర్స్ వదిలారు. బాబీ కొల్లి దర్శకత్వంలో రూపుదిద్దుకుంటోన్న ఈ చిత్రాన్ని సితార ఎంటర్‌టైన్‌మెంట్స్‌, ఫార్చ్యూన్‌ఫోర్ సినిమాస్‌ పతాకాలపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు.
ఈ మధ్య వరుస భారీ విజయాలతో దూసుకుపోతున్న గాడ్ ఆఫ్ మాసెస్ నందమూరి బాలకృష్ణ నటిస్తోన్న 109వ చిత్రానికి టైటిల్ ఫిక్సయింది. శుక్రవారం ఈ మూవీ టైటిల్‌ని రివీల్ చేస్తూ.. మేకర్స్ టీజర్ వదిలారు. కార్తీక పౌర్ణమి పర్వదినాన్ని పురస్కరించుకుని వదిలిన ఈ టైటిల్ టీజర్.. సినిమాపై బ్లాక్‌బస్టర్ వైబ్స్‌ని క్రియేట్ చేస్తోంది. ఇంతకీ ‘NBK109’ టైటిల్ ఏంటని అనుకుంటున్నారా? ‘డాకు మహారాజ్’. బ్లాక్ బస్టర్ దర్శకుడు బాబీ కొల్లి దర్శకత్వంలో రూపుదిద్దుకుంటోన్న ఈ చిత్రానికి ఇప్పటి వరకు చాలా పేర్లు వినిపించాయి. ఫైనల్‌గా మేకర్స్ ‘డాకు మహారాజ్’ అనే టైటిల్‌నే ఖరారు చేశారు. అయితే బాలయ్య ఫ్యాన్స్ కోరుకునే సింహం టైటిల్‌లో మిస్సయినప్పటికీ.. ఈ టైటిల్ కూడా పవర్‌ఫుల్‌గానే ఉందంటూ ఫ్యాన్స్ కామెంట్స్ చేస్తున్నారు.
Also Read-Kasthuri: నటి కస్తూరికి షాకిచ్చిన మద్రాస్ హైకోర్టు
ఈ సినిమాకు సంబంధించి ఇప్పటికే విడుదలైన ప్రచార చిత్రాలు విశేషంగా ఆకట్టుకొని, ఈ సినిమాపై అంచనాలను రెట్టింపు చేశాయి. పోస్టర్లు, రెండు భారీ యాక్షన్ గ్లింప్స్‌లు అందరినీ కట్టిపడేశాయి. ముఖ్యంగా బాలకృష్ణను మునుపెన్నడూ చూడని కొత్త అవతారంలో దర్శకుడు బాబీ చూపిస్తున్న తీరుకి అందరూ ఫిదా అయ్యారు. ఇప్పుడు టైటిల్ టీజర్ కూడా సినిమాపై భారీగా అంచనాలను పెంచేస్తోంది. ఇంకా చెప్పాలంటే ఈ కార్తీక పూర్ణిమకి నందమూరి నటసింహం ఇచ్చిన ట్రీట్ అదిరిందంటూ అప్పుడే కామెంట్స్ కూడా మొదలయ్యాయి.
ఈ టైటిల్ టీజర్ విషయానికి వస్తే.. థమన్ మరోసారి బాలయ్య కోసం తను ఎలా మారిపోతాడనేది చూపించారు. ‘అఖండ’ సినిమాతో సౌండ్ బాక్సులు బద్దలైన విషయం తెలిసిందే. ఇప్పుడు ముందుగానే మంచి సౌండ్ బాక్సులు సిద్ధం చేసుకోండి అనేలా ఈ టీజర్ హింట్ ఇచ్చేస్తోంది. ఇక ఈ టీజర్‌లో బాలయ్య‌ని చూపించిన తీరు ఫ్యాన్స్‌కి మరోసారి ఫుల్ మీల్స్ రాబోతుందనేలా సిగ్నల్స్ పంపుతోంది. ఓవరాల్‌గా అయితే.. ఈ సంక్రాంతికి రికార్డులు బ్రేక్ చేయడానికి ఈ నటసింహం ‘డాకు మహారాజ్’ రూపంలో దిగబోతున్నాడనేలా టీజర్.. సినిమాపై హైప్ పెంచేస్తోంది.
బాలీవుడ్ నటుడు బాబీ డియోల్ ఈ చిత్రంలో కీలక పాత్ర పోషిస్తున్నారు. ప్రముఖ ఛాయాగ్రాహకుడు విజయ్ కార్తీక్ కన్నన్ కెమెరా బాధ్యతలు నిర్వహిస్తున్న ఈ చిత్రానికి సంచలన స్వరకర్త ఎస్.థమన్ సంగీతం అందిస్తున్నారు. కళా దర్శకుడిగా అవినాష్ కొల్లా, ఎడిటర్ గా నిరంజన్ దేవరమానే వ్యవహరిస్తున్నారు. సితార ఎంటర్‌టైన్‌మెంట్స్‌, ఫార్చ్యూన్‌ఫోర్ సినిమాస్‌ పతాకాలపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు. శ్రీకర స్టూడియోస్ సమర్పిస్తోంది. చిత్రీకరణ చివరి దశలో ఉన్న ఈ చిత్రం, 2025 సంక్రాంతి కానుకగా ప్రపంచవ్యాప్తంగా భారీస్థాయిలో విడుదల కానుంది.
