Indain Idol Season3: తెలుగు ఇండియన్ ఐడల్ 3.. కుశాల్ ఎలిమినేట్! లంచ్‌కి ఆహ్వానించిన‌ థమన్

వీకెండ్ లో ఆహా ఓటీటీ ప్లాట్‌ఫారమ్‌లో ప్రసారమైన తాజా ఎపిసోడ్‌లో కంటెస్టెంట్ కుశాల్ శర్మ ఎలిమినేట్ కావడంతో తెలుగు ఇండియన్ ఐడల్ సీజన్ 3(TeluguIndainIdolS3) లో కాంపిటేషన్ రసవత్తరంగా మారింది. జూన్ 14, 2024న ప్రారంభమైన ఈ షో ఇప్పుడు కీలకమైన ఎలిమినేషన్ దశలోకి ప్రవేశించింది, ప్రేక్షకుల ఓటింగ్‌తో పాటు న్యాయమూర్తుల స్కోర్‌లు కంటెస్టెంట్స్ భవిష్యత్తును నిర్ణయిస్తున్నాయి. ప్రతి శుక్రవారం, శనివారం రాత్రి 7 గంటలకు ఆహా (aha videoin) ఓటీటీలో మాత్ర‌మే ఈ తెలుగు ఇండియన్ ఐడల్ సీజన్ 3 కార్య‌క్ర‌మం ప్ర‌సారం అవుతుంది.

శ్రీరామ్ చంద్ర హోస్ట్ చేసిన మొదటి ఎలిమినేషన్ రౌండ్లో, ముగ్గురు కంటెస్టెంట్స్-స్కంద, భరత్ రాజ్ కుశాల్ శర్మ- జడ్జిల నుండి తక్కువ స్కోర్లు అందుకుని డేంజర్ జోన్‌లోకి ప్రవేశించారు. తోటి కంటెస్టెంట్స్ భరత్ రాజ్, స్కందతో కుశాల్ తలపడ్డాడు. స్కంద అత్యధిక ఓట్లను పొంది, మొదట సేఫ్ అయ్యారు. కుశాల్, భరత్‌ ఎలిమినేషన్ లోకి వచ్చారు. ఫైనల్ గా ప్రేక్షకుల నుండి తక్కువ ఓట్లు పొందిన కుశాల్ ఎలిమినేట్ అయ్యాడు.

ఈ సంద‌ర్భంగా కుశాల్ మాట్లాడుతూ.. ఈ పోటీలో పాల్గొని చాలా విష‌యాలు నేర్చుకున్నానని, విలువైన అనుభవాలను పొందానని తెలిపాడు. కుశాల్ ఎలిమినేష‌న్‌తో తోటి కంటెస్టెంట్స్ ఎమోషనల్ అయ్యారు. అనంత‌రం పోటీలో మిగిలిన‌ 11 మంది కంటెస్టెంట్స్ ప్రతిష్టాత్మకమైన టైటిల్ కోసం పోటీ పడ‌నున్నారు. ఇక‌పై ప్రతి వీక్‌ ఒక కంటెస్టెంట్ ఎలిమినేట్ అవడం కొన‌సాగుతూ చివరి వారాల్లో వైల్డ్ కార్డ్ ఎంట్రీ ఉండే అవకాశం ఉంది. ఇదిలాఉండ‌గా షో నుంచి ఎలిమినేష‌న్ అయిన కుశాల్ శ‌ర్మ అత‌ని త‌ల్లి గారిని త‌మ‌న్ ఇంటికి లంచ్‌కు అహ్వ‌నించ‌డం విశేషం.