KK Senthil Kumar: ఒక సినిమా చేయకపోతే అంతేనా.. సెంథిల్‌కుమార్‌ ఫైర్‌
ABN , Publish Date - Nov 17 , 2024 | 09:00 PM
భారీ బడ్జెట్‌ లేదా చిన్న సినిమాలు అని కాదు.. మంచి అవకాశం వేస్త ఏ సినిమా కోసమైనా వర్క్‌ చేస్తా. మహేశ్‌ - రాజమౌళి మూవీ కోసం నేను వర్క్‌ చేయడం లేదు.
మహేశ్‌బాబు (Mahesh Babu) హీరోగా దర్శకధీరుడు రాజమౌళి (SS Rajamouli) దర్శకత్వంలో భారీ బడ్జెట్‌ చిత్రం SSMB29 రూపుదిద్దుకోనున్న విషయం తెలిసిందే. ఈ సినిమాలో తాను పని చేయడం లేదని సినిమాటోగ్రాఫర్‌ (DOP) కె.కె.సెంథిల్‌ కుమార్‌ (KK Senthil Kumar) తెలిపారు. తాజాగా ఓ కార్యక్రమంలో పాల్గొన్న ఆయన ఈ విషయాన్ని తెలిపారు. ‘‘నిఖిల్‌ హీరోగా నటిస్తోన్న ‘స్వయంభు’ కోసం ప్రస్తుతం వర్క్‌ చేస్తున్నా. భారీ బడ్జెట్‌ లేదా చిన్న సినిమాలు అని కాదు.. మంచి అవకాశం వేస్త ఏ సినిమా కోసమైనా వర్క్‌ చేస్తా. మహేశ్‌ - రాజమౌళి మూవీ కోసం నేను వర్క్‌ చేయడం లేదు. తన సినిమాలోకి ఎవరిని తీసుకోవాలనేది పూర్తిగా దర్శకుడి నిర్ణయం. ఈ చిత్రానికి కొత్త టెక్నిషియన్‌ అయితే బాగుంటుందని ఆయన భావించి ఉండొచ్చు’’ అన్నారు. ‘మీ మధ్య రిలేషన్‌ దెబ్బతిందని వార్తలు వస్తున్నాయి?’ అని ప్రశ్నించగా.. ‘‘అలాంటిది ఏమీ లేదు. మా మధ్య మంచి అనుబంధం ఉంది. ఆయన చాలా గొప్ప వ్యక్తి. ఒక సినిమా చేయకపోతే సంబంధాలు దెబ్బతిన్నాయని ఎలా అనుకుంటారు. గతంలోనూ మేమిద్దరం కలిసి వర్క్‌ చేయని సందర్భాలు ఉన్నాయి కదా’’ అని సమాధానమిచ్చారు.
సెంథిల్‌ కుమార్‌ - రాజమౌళిలది లాంగ్‌ జర్నీ. రాజమౌళి తెరకెక్కించిన ‘సై’, ుఛత్రపతి’, ‘యమదొంగ’, ‘మగధీర’, ‘ఈగ’, ‘బాహుబలి 1, 2’, ‘ఆర్‌ఆర్‌ఆర్‌’ చిత్రాలకు ఆయన సినిమాటోగ్రాఫర్‌గా వర్క్‌ చేశారు. తన కెమెరా పనితనంతో జక్కన్న టీమ్‌లో ఒక కీలక వ్యక్తిగా గుర్తింపు తెచ్చుకున్నారు. ఇప్పుడు కూడా మహేశ్‌ - రాజమౌళి మూవీలోనూ ఆయన భాగమవుతారని అంతా అనుకున్నారు. కానీ ఆయన ఎస్‌ఎస్‌ఎంబీ 29 చిత్రానికి పని చేయడం లేదు. భారతీయ చిత్ర పరిశ్రమలో ఇప్పటి వరకూ చూడని సరికొత్త ప్రపంచాన్ని రాజమౌళి ఆవిష్కరించబోతున్నారని రచయిత విజయేంద్రప్రసాద్‌ పలు ఇంటర్యూల్లో తెలిపారు. అమెజాన్‌ అడవుల నేపథ్యంలో సాగే ఈ కథలో పలువురు విదేశీ నటులు కనిపించనున్నారు. ఈ చిత్రానికి ‘గరుడ’ అనే టైటిల్‌ ప్రచారంలో ఉంది. పి.ఎస్‌.వినోద్‌ ఈ చిత్రానికి సినిమాటోగ్రాఫర్‌గా పని చేస్తున్నారని టాక్‌.