Indian 2: సినీ ప్రియుల కోరిక మేరకు ఏం చేశారంటే!

కమల్‌హాసన్‌ (Kamal haasan) హీరోగా దర్శకుడు శంకర్‌ (Shankar) కాంబినేషన్‌లో తెరకెక్కిన చిత్రం ‘భారతీయుడు 2’ (Indian2) ఎన్నో అంచనాల మధ్య ఇటీవల ప్రేక్షకుల ముందుకొచ్చింది. మేకింగ్‌ పరంగా సినిమా ఉన్నతంగా ఉన్నప్పటికీ 3 గంటలకుపైగా నిడివి చాలా ఎక్కువగా ఉందంటూ సోషల్‌మీడియా వేదికగా సినీ ప్రియులు కామెంట్లు చేస్తున్నారు. ఈ విషయం చిత్ర బృందం దృష్టికి వెళ్లగా త్వరితగతిన మార్పులు చేసింది. సినిమా నిడివి తగ్గించింది. దాదాపు 20 నిమిషాల నిడివిగల సన్నివేశాలను తొలగించింది. సుమారు 2 గంటల 40 నిమిషాల నిడివితో శనివారం సాయంత్రం నుంచి ‘భారతీయుడు 2’ చిత్రం థియేటర్స్‌లో సందడి చేస్తోంది. 1996లో విడుదలైన ‘భారతీయుడు’ తర్వాత శంకర్‌ - కమల్‌హాసన్‌ కాంబినేషన్‌లో తెరకెక్కిన చిత్రమిది. సిద్థార్థ్‌, రకుల్‌ ప్రీత్‌ సింగ్‌, ఎస్‌జే సూర్య, బాబీ సింహా, వివేక్‌, ప్రియా భవానీ శంకర్‌, బ్రహ్మానందం, సముద్రఖని కీలక పాత్రలుపోషించారు. సినిమాకు మిశ్రమ స్పందన వచ్చినా కమల్‌హాసన్‌ నటన, ఆయన గెటప్పులు ప్రేక్షకులను ఆకట్టుకున్నాయి. ఈ చిత్రానికి కొనసాగింపుగా ‘భారతీయుడు 3’ రానుంది.